“Lalimue eteke tua liyevele okuti tu soliwe calua!” Eci oco ukãi umue kofeka yo Ucrânia a popia noke yoku yeva oku tangiwa kunda umue u kuete esilivilo wa tunda Kosungu Yolombangi Via Yehova. Eye wa kala umue pokati keci ci soka 165.000 Yolombangi Via Yehova, via yevelela manji Stephen Lett o panga onepa Kosungu Yolombangi via Yehova, vokuenda kuepasu liaye oku upisa keteke 10 toke 11 ya Kupemba wo 2014.

Oku tangiwa kukanda kuenda olohundo, via pongoluiwa kalimi atãlo kuenda via pitiyiwa kueci ci soka 700 Kolonjango Viusoma vo Ucrânia.

Kesulilo liaco liosemana, manji Mark Sanderson okuti o pangavo onepa Kosungu Yolombangi Via Yehova, wa tanga ukanda vokuenda kuohongele yi li kasi ya lingiwila Olombangi Via Yehova ko Rússia. Ohongele yaco ya pongoluiwa kueci ci soka 14 kalimi kuenda ya pitiyiwa kueci ci soka 180.413 komanu, kakongelo a soka 2.500 ko Belarus kuenda vo Rússia.

Ukanda Wosungu Yolombangi Via Yehova wa sonehiwila akongelo osi o ko Rússia kuenda ko Ucrânia. Manji Sanderson wa tanga ukanda waco kelimi lio russo. Ombala Yolombangi Via Yehova ko Rússia ya soneha ndoco: “Vamanji va vetiyiwa calua poku limbuka okuti va kapiwako Losungu Yolombangi Via Yehova. Ca kala ndu okuti Osungu Yolombangi Via Yehova ya tu kuata kepepe.”

Ukanda waco wa kuata ocimãho coku lembeleka kuenda oku pamisa Olombangi Via Yehova vocikanjo omo lioku lambalaliwa lolombiali. Ukanda wa vetiya vamanji oku yuvula ‘oku panga onepa koluali’ kuenda oku amamako oku likala oku panga onepa kopulitika.—Yoano 17:16.

Osungu Yolombangi Via Yehova ya vetiya vosi va kalapo oku amamako lukamba wavo la Yehova, poku likutilila, oku lilongisa kuenda oku sokolola lutate Ondaka ya Suku. Omanu va kalapo va yivuluisiwa okuti, ndaño tu liyaka loloseteko, vosi yetu tu pondola oku kolela kohuminyo Suku a linga kelivulu lia Isaya 54:17 yokuti: “lacimue ocimãlẽho va ci telela oku yaka love ci ku linga cimue.”

Ukanda Wosungu Yolombangi Via Yehova wa sulila lolondaka viokuti: “Tu vusoli calua. Kũlĩhi okuti olonjanja viosi tu vu sokololi kuenda tu kasi oku pinga ku Yehova oco a ku kuatisi.”

Catiamẽla kuvamanji va nyula, Ombala Yolombangi Via Yehova ko Ucrânia ya soneha ndoco: “Vamanji va ci sola calua poku limbuka okuti va kapiwako Losungu Yolombangi Via Yehova. Epasu lia manji Lett kuenda Manji Sanderson ko Ucrânia kuenda ko Rússia kesulilo limuamue liosemana, ca kala ocindekaise ciwa comunga yi kasi pokati kafendeli va Suku. Vamanji va limbuka ndomo Yehova kuenda Yesu va va kapako. Epasu liaco lia lingiwa velivala liwa, momo cilo tu li yevite okuti tua pamisiwa oco tu amameko oku vumba Yehova, ndaño ku iya ovitangi.”