Skip to content

Olombangi Via Yehova

Select language Umbundu

Ocipito Coku Malusula Osikola yo Gileada Yocisoko 138

Ocipito Coku Malusula Osikola yo Gileada Yocisoko 138

Ocisoko 138 Cosikola yo Gileada yo Torre de Vigia ca maluisiwa keteke 14 Yelombo, wo 2015 ko centro educacional Yolombangi Via Yehova ko Patterson, Nova York. Ocipito coku malusula ca muiwa leci cisoka 14.000 komanu kuenda ca pitiyiwa kovitumãlo vialua lekuatiso liovideo. Ulandu wo hongele wa fetika lovisikilo viovisungo viokaliye kuenda olonjoveleli via imba ovisungo viaco vokuenda kuocipito caco. *

Manji Geoffrey Jackson okuti o panga onepa Kosungu Yombangi Via Yehova eye wa kala mitavaso yocipito caco. Volondaka viaye vioku fetika wa vetiya olondoge oco ka vi kalisolekele ovo muẽle ovina va li longisa pole, va sukila oku talavaya lepindiso va tambula oco va kuatise omanu va kuavo.—2 Timoteo 2:2.

Manji Jackson wa lombolola ongangu ya Mose. Vokuenda kuotembo yalua ombalaka ya Mose ya kala ono yefendelo pokati ka va Isareli. Pole eci otavernakulu ya pangiwa, oyo ya linga ono yefendelo liocili. Cosi ci lekisa okuti Mose ka kuatele omoko yoku iñila Vohondo yi Kola votavernakulu momo ovitunda ovio lika via kuatele esumulũho liaco. Eci ka ci lekisa okuti Mose wa lisiõsiõla omo liepongoloko liaco. Pole eye wa lekisa ekolelo kuenda wa kuatisa Arone kocikele a tambula coku kala ocitunda cinene. (Etundilo 33:7-11; 40:34, 35) Nye tu lilongisa kulandu waco? Manji Jackson wa tambulula hati: ‘Velisipo asumũluho vu kuete pole ka u ka a soleki.’

“U ka Kuata hẽ Usumba Wonjuela Yemẽla Limue?” Eyi ya kala osapi yohundo ya lingiwa lamanji Kenneth Flodin okuti, oñuatisi Yocisoko Celilongiso Cosungu Yolombangi Via Yehova. Eye wa popia okuti olondonge vikaliyaka lovitangi vialua ndeci elambalalo ale ovikele vina okuti ka via lelukile. Poku tukula olonda vi sangiwa kelivulu Liovisila 26:36 manji Kenneth Flodin wa vetiya olondonge oku tenda ovitangi viaco ndamẽla a kukuta. Noke manji Flodin wa tukula ongangu yupostolo Paulu, wa tẽla oku liyaka lovitangi vialua momo wa kolelele Yehova.—2 Va Korindo 1:8, 10.

“Nye o Kasi Oku Sandiliya?” Manji Mark Sanderson okuti o panga onepa Kosungu Yolombangi Via Yehova, wa linga ohundo ya kuamamo yakunamela kelivulu Liolosapo 13:12 ku popia hati: ‘Elavoko kalia tẽlisiwuile likoka evalo kutima.’ Ci sumuisa calua oku limbuka okuti omanu valua va sumua vokuenda kuomuenyo wavo wosi omo va sandiliya ovina vina okuti la limue eteke va vi sanga ndeci, ekemãlo kuenda olombongo.

Koloneke via Yesu, omanu vamue va kuatele elavoko ka lia sungulukile ca tiamẽla ku Yoano Upapatisi. (Luka 7:24-28) Citava okuti ovo va kala oku lavoka okuti Yoano onoño yimue yi ka va sapuila alongiso amue okuti ka ca lelukile oku kuata elomboloko lia-o. Nda oco ovo va lavokaile, citava okuti cava sumuisa, momo Yoano wa longisa esapulo limue liocili halio lialeluka. Vakuavo va kala oku lavoka ulume umue o kuete eposo likomõhisa, pole Yoano wa enda oku wala ndeci olohukũi. Pole vana va kala oku lavoka uprofeto umue, ka va lakele oku sumua momo, Yoano ka kaile lika uprofeto, pole wa pongiyavo onjila ya Mesiya!—Yoano 1:29.

Manji Sanderson wa kapako ulandu waco poku vetiya olondonge oku sanda ovina via sunguluka. Ovo va sukilile oku yuvula oku sandiliya ekemãlo ale oku tatiwa ndomanu va likasi kupange wavo, pole va sukilile oku tiamisila utima poku talavaya lepindiso va tambula oco va kuatise omanu. Ovo va ponduile oku ci linga poku sapuilako omanu vakuavo ovina va lilongisa kosikola yo Gileada, poku pamisa ekolelo lia vamanji kuenda oku lekisa ocisola kokuavo. Manji Sanderson wa popia hati: “Lekisi umbombe poku vumba Yehova kuenda vamanjene. Nda wa likolisiliko oku linga ocipango ca Yehova, lalimue eteke u ka sumua omo liovina vu ka sanga.”

“Tekuli Ava va Kasi Lonjala.” Eyi ya kala osapi yohundo ya lingiwa la Manji James Cauthon, ulongisi Wolosikola Viusoma. Manji Cauthon wa lombolola okuti vosi yetu tu kuete onjongole yoku soliwa, kuenda oku kapiwako. Ndaño muẽle Yesu, wa kuatelevo onjongole yaco omo liaco eci a papatisiwa Yehova wo pandiya.—Mateo 3:16, 17.

Yehova wa tu ĩha uloño woku vetiya kuenda oku pamisa vakuetu lolondaka vietu, kuenje o lavoka okuti tu talavaya luloño waco. (Olosapo 3:27) Manji Cauthon wa popia hati, “olonjanja viosi sandi ovina viwa omanu va kuete kuenda ku ka ivaliko oku va pandiya. Epandiyo li pondola oku kuatisa vamanjetu oku limbuka okuti alikolisilo osi va linga a kuete esilivilo.

“Likolisiliko toke kesulilo.” Manji Mark Noumair, oñuatisi yocisoko celongiso wa linga ohundo ya kuamamo. Eye wa lombolola ongangu yupostolo Paulu oco a vetiye olondonge oku likolisilako kocikele va tambula. Nda ovo va li ‘pesela’ oco va kuatise vakuavo, va ka kuata esanju ndeli Paulu a kuatele.—Va Filipoi 2:17, 18.

Ndaño muẽle eci a enda oku liyaka lovitangi, Paulu lalimue eteke a tokokele. Eye wa likolisilako toke kolofa viaye, ale toke kesulilo. Paulu wa popia lutõi hati: “Oku yoloka nda mala.” (2 Timoteo 4:6, 7) Manji Noumair, wa vetiya olondonge oco vi setukule ongangu ya Paulu poku kuatisa Usoma kupange wavo.

Ovindekaise. Manji Michael Burnett, ulongisi ukuavo wosikola yo Gileada wa linga onepa ya kuamamo. Olondonge via linga ovindekaise viovolandu va lipita la-o kupange woku kunda vocikanjo co Patterson.

Vapuluvi a litepa, olondonge via sanda apuluvi oku eca uvangi kuenda va kuata onima yiwa poku eca esapulo liocili “velimi liomanu vaco.” Umue pokati kolondonge vio Gileada, wa limbuka okuti vocikanjo a kala oku kundila muli omanu valua va vangula elimi lio Espanhol. Omo liaco, osimbu ka endele kupange woku kunda wa lilongisa olondaka vimue kelimi lio Espanhol lekuatiso lio JW Language. Keteke liaco wa sanga ulume umue o vangula elimi lio Espanhol. Lekuatiso liolondaka a lilongisa, eye wa tẽla oku vangula lulume waco kuenda wa fetika oku longisa Embimbiliya kokuaye kuenda komanu vakuãla vakuepata liaye.

Apulilo. Noke manji William Turner Jr., oñuatisi Yocisoko Cupange Wosungu Yolombangi Via Yehova, wa pulisa olondonge vikuãla catiamẽla kulandu womuenyo wavo osimbu handi ka veyile ko Gileada kuenda epindiso va tumbula kosikola.

Olondonge via lombolola atosi va sola calua vokuenda kuosikola. Ondonge yimue ya lombolola ovina a lilongisa vulandu u sangiwa kelivulu lia Luka ocipama 10. Olondonge 70 Yesu a tuma kupange woku kunda, va yeva esanju lialua omo lionima yiwa va kuata. Yesu wa yevavo esanju pole, wa longisa olondonge oku yuvula oku tiamisila lika esanju konima va kuata pole, koku kũlĩha okuti va kasi oku sanjuisa Yehova. Eci ci tu ivaluisa okuti, esanju ka li tundi kekalo lietu pole, li tunda koku taviwa la Yehova.

Manji Turner poku tukula olondaka vi sangiwa kelivulu lia Va Filipoi 1:6, wa sapuila olondonge okuti Yehova wa fetika “upange uwa” vokati kavo kuenda lalimue eteke a ka va yanduluka.

“Amamako Oku Luluvalela ku Yehova.” Manji Samuel Herd okuti o panga onepa Kosungu Yolombangi Via Yehova, wa linga ohundo ya velapo yocipito coku malusula osikola. Eye wa popia okuti ka tu pondola oku mola Yehova lovaso etu. Omo liaco, tu pondola oku luluvalela ndati kokuaye?

Tu pondola oku mola Yehova poku tala ovina eye a lulika, momo ovio vi tu longisa ovina viatiamẽla kokuaye. Handi vali, Yehova o “yikula ovitima [vietu].” (Va Efeso 1:18) Osimbu tu amamako oku tanga Embimbiliya, tu lilongisa ovina vialua viatiamẽla ku Yehova. Osimbu tu lilongisa ovina viatiamẽla ku Yehova, ukamba wetu laye u livokiya.

Tu sukila oku lilongisa lutate Avanjeliu, momo a lombolola olondaka kuenda ovituwa via Yesu vi pondola oku tu kuatisa oku kũlĩha ci wa Yehova. Yesu wa setukula ciwa ovituwa via Yehova omo liaco wa popia hati: “Wosi o mola ame, o molavo Isia.”—Yoano 14:9.

Manji Herd wa vetiya olonjeveleli okuti ka va moli lika Yehova poku vanja kongangu ya Yesu pole, va sukila oku setukula eci va lete. Ndeci Yesu a likolisilako oku tekula omanu konepa yespiritu, tu sukilavo oku likolisilako oku eca kuvakuetu okulia kuespiritu tua siata oku tambula.

Onima yi pi yi tunda koku amamako oku luluvalela ku Yehova? Tu pondola oku kuata ekolelo limue ndeli liukualosamo wa soneha ndoco: “Oloneke viosi ñapa ñapa Yehova kovaso ange. Omo eye o kasi kondio yange si sengiwa.”—Osamo 16:8.

Oku malusula. Olondonge via tambula ovicapa viavo, kuenje umue pokati kavo wa tanga ukanda wolopandu. Noke, Manji Jackson wa malusula poku popia hati, olondonge ka va sukila oku li kisika ovo muẽle oku longisa ovina viokaliye ale ovina via longa. Olonjanja vialua, ovo va ka ivaluisa vamanji vakuavo ovina ovo va kũliha ale. Manji Jackson wa lombololavo esilivilo lioku lekisa umbombe. Olondonge vi sukila oku yuvula oku litunula omo liepindiso va tambula kosikola yo Gileada, pole va sukila oku tiamisila utima Kembimbiliya kuenda kalivulu a kunamẽla Vembimbiliya. Nda va ci linga, ka va ka sumuisa omanu vana ka va kuatele epuluvi lioku pindisiwa kosikola yo Gileada pole, va ka vetiya vamanji oku talavaya ciwa lukũlĩhiso va kuete ale. Kesulilo liohongele yaco olonjeveleli viosi via yeva esanju lialua kuenda va nõlapo oku kuatisa vamanjavo.

^ tini. 2 Ovisungo viokaliye via imbiwa kohongele, via eciwa ku vamanji vosi va laikele oku kala kohongele yaco osimbu kua kambele osemana yimosi.

^ tini. 32 Olofeka haviosiko via lekisiwa vo mapa

^ tini. 34 Olondonge haviosiko vi moleha kulala.