Skip to content

Olombangi Via Yehova

Select language Umbundu

Va Likuete Omunga Omo Liocisola—Kohongele Yofeka Volupale luo Frankfurt, Kofeka Alemanha

Va Likuete Omunga Omo Liocisola—Kohongele Yofeka Volupale luo Frankfurt, Kofeka Alemanha

“Ocipito cimue cepata.” Ya kala osapi yimue vukanda wa sapulo kelimi lio alemão Frankfurter Rundschau. Omanu va kala kocipito caco va tava.

Karla o kasi kofeka yo Porto Rico wa popia hati: “Vamanji va tu tambula ciwa. Ca kala ndu okuti ñasi konjo!”

Sara, wo kofeka yo Austrália, wa popia hati: “Nda kala konepa yikuavo yoluali pole, ca kala ndu okuti ñasi oku nyula epata liange.”

Momo lie ovo va kalela ndoco? Momo liohongele yolofeka Yolombangi via Yehova. Ohongele yaco ya lingiwa oku u pisa keteke 18 toke 20 Yevambi Linene, yunyamo wo 2014. Ci panda 37.000 komanu va kala kohongele yaco yofeka.

Omanu va kalapo va liongolola oco va lilongise eci catiamẽla Kembimbiliya. Vulandu wohongele mua kongela oku tangiwa Kuembimbiliya, ovisungo, olohutililo, olondalama vivali kuenda olohundo viakunamẽla Kembimbiliya.

Kohongele yofeka, kua kala Olombangi Via Yehova viopocitumãlo kuenda eci ci pitãla 3.000 komanu va tunda kolofeka ndeci, ko África do Sul, ko Austrália, ko Estados Unidos, ko Grã-Bretanha, ko Grécia, ko Líbano kuenda ko Sérvia. Kua kalavo ci soka 234 Kolombangi via Yehova vi tunda kueci ci soka 70 kolofeka. Ovo va litumbika kovopange a likasi ndeci, upange umisionaliu.

Olonepa vimue viulandu waco via pitiyiwa vo internet kueci ci soka 19 kovitumãlo vo Alemanha, kuenda kovitumãlo vimue ko Austrália kuenda ko Suíça. Kua kala eci ci soka 204.046 komanu.

Ongongela Yimue ka yi Kuete Olongave

Volupale luo Frankfurt, ulandu wohongele wa pitiyiwa kelimi lio alemão, lio helasi kuenda liongelesi. Kovitumãlo vikuavo olohundo via pitiyiwa velivala limuamue kueci ci soka 17 kalimi oku kongelamo lio árabe, lio chinês, lio tâmil, lio turco kuenda kalimi avali oku ilaika.

Ndaño Olombangi via Yehova vi vangula alimi a litepa kuenda va tunda kolofeka via litepa kuenda va kuavituwa via litepa, ovo va likuatele omunga omo liocisola va li kuetele pokati. (Yoano 13:34, 35) Ovo va li tendele okuti vosi yavo vamanji.

Tobias wo kofeka yo Grã-Bretanha, wa popia hati: “Tua limbuka ndomo ongongela yetu voluali ka yi Kuete olongave”.

Davianna, wo kofeka yo Porto Rico wa popia hati: “Nda kũlĩha Olombangi vikuavo via Yehova vi tunda kueci ci pitãhala 20 kolofeka. Tu likuete omunga omo liocisola tu kuetele Suku kuenda vakuetu.”

Malcom, wa tunda kofeka yo Austrália wa popia hati: “Ame nda linga Ombangi ya Yehova volupale lumue lutito. Nda tanga ulandu watiamẽla kongongela yetu voluali luosi kuenda nda tala ovideo yaco. Kulo nda ci limũila. Cilo ndi tava okuti omunga yi kasi pokati ketu, yocili. Ci pamisa calua oku kala kulo.”

Oku Yekisa Kumue Okuti Lalimue Eteke ku ka Ivaliwa

Olombangi via Yehova vi kasi mueci ci soka 58 kakongelo volupale luo Frankfurt va pongiya olombanjaile kuenda va sokiya olomapalo kuteke oco vi lekisiwa ku vamanji va tunda kolofeka via litepa.

Cynthia, wo kofeka yo Estados Unidos wa popia hati: “Ovo va tu yekisa lonjila yimue yi komõhisa. Lalimue eteke ha ivalako ocisola kuenda ohenda vamanji va lekisa kokuetu.”

Simon, wo kofeka yo Alemanha wa popia hati: “Vamanji va lekisa ocisola calua. Tua yola yola calua, kuenda tua limbuka ocisola va tu kuetele. Tu pondola oku lilongisa ovina vialua lavamanjetu.”

Amy wo kofeka yo Australia, wa popia hati: “Olomapalo ovo va sokiya kuteke, via lekisa okuti etu Tulombangi Via Yehova tu solevo olomapalo. Tua kũlĩha ndomo tu linga olomapalo kuenda olomapalo vietu viwa.”

Ovina Viwa Vioku Ivailuka

Ohongele yofeka ya lingiwila volupale luo Frankfurt, yimue pokati kolohongele yolofeka ya lingiwa kueci ci soka eceya kolofeka.

Eci va pulisa komunu umue wa endele kohongele yolofeka ovina eye a sola kohongele ya lingiwila volupale luo Frankfurt, eye wa tambulula hati: “Sokola okuti wa limbuka okuti o kuete ngandiove, ndeci umue manjove. Eci o kũlĩha omunu waco, eye o ku yekisa konjo yaye kuenda oku tata ciwa. Ove o yeva esanju lialua. Kaliye sokolola esanju o kuata poku kũlĩha ci soka 37.000 ya vamanji. Eci oco nda yeva poku kala kohongele yaco yofeka.”