Skip to content

Olombangi Via Yehova

Select language Umbundu

Oku Malusuiwa Kuocisoko 137 Yosikola Yembimbiliya yo Gileada

Oku Malusuiwa Kuocisoko 137 Yosikola Yembimbiliya yo Gileada

Ocisoko 137 Yosikola Yembimbiliya yo Gileada yo Torre de Vigia, ca lingiwa keteke 13 Yenyenye Linene wo 2014 kosikola Yolombangi Via Yehova ko Patterson, Nova York. Osikola yaco yi pindisa Olombangi Via Yehova vialoñoloha oco va pamise akongelo kuenda olofiliale va tumiwa. Ovideo yulandu waco ya pitiyiwa oku upisa ko Patterson, kolonepa vimue vio Canadá, ko Estados Unidos, ko Jamaica kuenda ko Porto Rico, kuenje kua kala eci ci soka 12.333 komanu.

Manji Samuel Herd okuti o panga onepa Kosungo Yolombangi Via Yehova eye wa songola ohongele. Volondaka viaye vioku fetika wa lombolola hati ovisimĩlo via Yehova via velapo okuti vietu vi sule. (Isaya 55:8, 9) Eye wa lombololavo okuti ndaño olondonge via pita olosãi vitãlo loku lilongisa ovisimĩlo via Suku, ovo va kulĩha lika ‘efetikilo liovopange aye.’ (Yovi 26:14) Manji Samuel Herd wa lombololavo okuti ci kuete esilivilo oku liongolola oco tu kũlĩhise ovisimĩlo via Suku kuenje ulandu wohongele woku malusula osikola weca kolongeveleli epuluvi lioku ci linga.

“Epako Liespiritu Lieli . . . Epandi.” (Va Galatia 5:22) Manji John Larson, okuti o panga onepa Kocisoko Cakulu ko Betele ko Estados Unidos, wa tukula olonjila vivali vioku lekisa epandi, okuti onepa yimue yepako liepiritu lia Suku. Catete, tu sukila oku lekisa epandi ku Yehova osimbu eye a tu pindisa kuenda oku tu kuatisa oco tu pame vekolelo. (1 Petulu 5:10) Avirahama wa kala ongangu yiwa yoku lekisa epandi momo wa ecelela okuti Yehova u pindisa kuenda wa kala oku lavoka ndomo Suku a tẽlisa ohuminyo a lingile kokuaye.—Va Heveru 6:15.

Cavali, tu sukila oku lekisa epandi letu muẽle. Olondonge noke yoku mala osikola yo Gileada, citava okuti va likisika ovo muẽle oku linga ovina vialua. Kuenje, eci va pitĩla kovitumãlo va tumiwa, kuenda ovina ka vi tundi ndeci va lavokaile, va sumua loku sokolola ndoco: ‘Momo lie ñasilili ndoco?’ Manju Larson wa lombolola ulandu waye muẽle loku sapuila olondonge okuti citava oku yula ovitangi viosi viya nda tua lekisa epandi letu muẽle loku amamako oku kala vakuambili osimbu Suku a mala oku tu pindisa.—Va Heveru 6:11, 12.

“Ambombe va ka Kuata Omuenyo Kopui!” Manji Anthony Morris, okuti o panga onepa Kosungu Yolombangi Via Yehova, wa kunamela osapi yohundo yaye konepa yasulako Yosamo 22:26. Oco utima wetu u kale ‘lomuenyo otembo ka yi pui,’ tu sukila oku kala ambombe. Manji Anthony Morris wa lombolola okuti nda ka tua kaile ambombe, ka tu ka kuata esilivilo ku Yehova. Vosi yetu, ndaño okuti tunde eci tua linga Akristão pa pita ale otembo yalua, tu pondola oku ivailako esilivilo lioku kuama ongangu ya Yesu Kristu.—2 Petulu 1:9.

Embimbiliya li lombolola ulandu womanu va lekisa umbombe kuenda wa vana ka va kaile ambombe. Soma Herode Agripa wa kala ukuacipululu kuenda wa tava okuti omanu va eca kokuaye esivaye lina li sesamẽla oku eciwa lika ku Suku. Omo liaco, Soma Herode wa vetiwa lungelo wa Suku “wa liwa lapuka” kuenje wa fa. (Ovilinga 12:21-23) Petulu wa lekisa ocituwa ca litepa leci ca soma Herode. Eye ka temele eci Yesu o lungula loku u sapuila hati, ‘ka kuete ovisimĩlo via Suku, pole, viomanu.’ (Mateo 16:21-23) Eye wa tava elungulo kuenje wa linga ongangu yiwa yoku lekisa umbombe.—1 Petulu 5:5.

Omo okuti olodonge vimue vi ka tumiwa kolofiliyale Violombangi Via Yehova, manji Anthony Morris wa va sapuila okuti nda ka va lekisile umbombe, ka va ka kuata esanju kupange wavo. Pole ka ca lelukile oku limbuka nda tu sukila oku vokiya ocituwa cetu cumbombe. Manji Anthony Morris wa lombolola okuti kanyamo apita, ukulu umue wekongelo wa lunguiwa oco a vokiyeko ocituwa caye cumbombe. Ukulu wekongelo wa sonehela kofiliyale yofeka yaye hati: “ Ame nda siata oku lekisa vali umbombe okuti vakuetu ci sule.” Olondonge vi sukila oku yuvula ocituwa caco. Nda va kuata ocituwa ca sunguluka catiamẽla kunene va kuete kuenda oku limbuka okuti Yehova Suku eye wa velapo kunene kuenda Yesu Kristu, va ka amamako oku lekisa umbombe.

“Eye ka Tẽtelela Espiritu Sandu.” (Yoano 3:34) Manji Michael Burnett, umue pokati kalongisi Osikola yo Gileada, wa ivaluisa olondonge okuti espiritu sandu li ka va kuatisa oku potolola ovitangi viosi va pondola oku kuata kupange wavo. Lekuatiso liespiritu sandu lia Suku, Becalele wa tẽla oku yula ovitangi aliyaka lavio poku tunga otavernakulu. (Etundilo 35:30-35) Espiritu sandu ka lia vokiyile lika uloño Becalele a kuatele pole lio kuatisavo oku longisa vakuavo. Cimuamue haico ci kapita lolondonge via pindisiwa kosikola yo Gileada ca piãla enene nda va kapako olonumbi va lilongisa kosikola okuti oku talavaya Lembimbiliya poku longisa.

Kotembo ya Becalele, akãi va Isareli va kuatisavo poku tunga otavernakulu. (Etundilo 35:25, 26) Cimuamue haico okuti vamanji akãi va ecavo ongangu yiwa yoku kuatisa alume vavo. Manji Michael Burnett wa malusula ohundo yaye poku popia hati: “Talavayi lovoloño ene pole lekisi umbombe kuenda epokolo. Nda wa ci lingi olonjanja viosi Yehova oka kuĩhi espiritu sandu liaye.”

“Ene vu ka Pilukila Kumosi Lame?” Manji Mark Noumair oñuatisi Yocisoko Celongiso, vohundo yaye wa tukula ongangu ya Soma Daviti. Daviti eci anena ocikasia covisila vo Yerusãlai wa lekisa umbombe poku piluka lesanju kumue ‘lafeko vakuenje vaye.’ (2 Samuele 6:20-22) Ocili okuti afeko vaco lalimue eteke va ka ivalako eteke lina Soma Daviti apiluka kumosi lavo. Manji Mark Noumair wa vetiya olondonge ‘oku pilukila kumosi lafeko’. Eye wa pula hati: “Ene hẽ vu ka kulĩhĩwa ndomanu va kuatisa vana va kuete ovikele vitito ale kava kuete ocikele lacimue? ... Vu ka ka kapako hẽ vakuene omo liovituwa viwa va kuete?”

Nda olondonge viamamako oku lekisa ocisola lonjila ndeyi, va kasi oku setukula Yehova. (Osamo 113:6, 7) Ndaño okuti va kasi lomanu vana ka va lekisa umbombe, olondonge vi sukila oku yuvula oku ecelela okuti ekambo lioku lipua lia vakuavo li va sumuisa. Manji Mark Noumair wa popia hati, “olonjanja viosi li tenda ndomunu ka velelepo. Tati olomeme via Yehova ndomo eye nda a vi tata.”

“Oku Eca Uvangi Vapuluvi Osi.” Manji William Samuelson Usongui Woseketa Yolosikola Viusoma, wa tukula ongangu yupostolo Paulu ndomunu wa sanda apuluvi osi oco a kunde olondaka viwa. (Ovilinga 17:17) Noke, olondonge via linga ovindekaise viovolandu a pita kupange woku kunda osimbu va kala oku pindisiwa Kosikola yo Gileada. Ohueli yimue ya sapela lufeko umue okuti upange waye oku tambula olombongo vovenda. Ovo, va kevelela toke eci omanu va tepuluka vovenda kuenda va lekisa ovideo losapi hati: Momo lie ndi Lilongisila Embimbiliya? Ovo va lekisavo onumbi yo jw.org muna a pondola oku sanga ovolandu akuavo kelimi liaye okuti o laociano. Ohueli ya tiuka olonjanja vialua oco va mameko oku sapela lukãi waco.

“Amamako Oku Lieca Olumue Kupange Usoma.” Manji William Nonkes o talavaya Koseketa Yupange ko filiale yo Estados Unidos wa pulisa vamanji vakuãla va kala oku pindisiwa. Loku pokola kolondaka vi sangiwa kelivulu lia Isaya 6:8 ovo va lieca ale olumue kupange Usoma pole osikola ya va pongiwa oku tẽlisa ciwa upange waco. Manji Snolia Maseko wa lombolola okuti osikola yo Gileada yo kuatisa oku limbuka olonepa a sukilile oku mioñolola capiãla enene oku talavaya ciwa lotembo noke lieteke limue liupange walua. Eye wamisako hati: “Epindiso lia ñuatisa oku limbuka okuti ndi pondola oku linga ovina vialua nda simaile okuti si kuete epondolo lioku vi linga.” Manji Dennis Nielsen wa lombolola ndomo elivulu lia Sofoniya 3:17 lio kuatisa oku yuvula oku sumua kupange woku kunda. Eye wa popia hati: “Nda upange woku kunda ka wandele ciwa, ndi ivaluka okuti ndi sukila oku sanjuka momo ñasi oku lekisa ocisola ku Yehova kuenda nda kũlĩha okuti eye wa sanjuka lame.”

“Tali Olonjila Kilu.” (Mateo 6:26) Manji Stephen Lett, okuti o panga onepa Kosungu Yolombangi Via Yehova, wa linga ohundo ya velapo yoku malusula osikola. Eye wa tiamisila ulandu wohundo yaye kalongiso a Yesu poku popia okuti tu sukila oku ‘tala olonjila’ kilu ale oku lilongisa ciwa ovina viatiamẽla kolonjila, kuenda wa lombolola ovina vialua tu pondola oku lilongisila kovolandu aco.—Yovi 12:7.

Ndeci Yehova a tekula olonjila, tu pondola oku kolela okuti eye o ka tu tata. Tua tiamẽla “vonjo ya Suku,” kuenda eye o likuminya okuti o ka eca ovina viosi vangadiaye va sukila. (1 Timoteo 3:15; 5:8) Ocili okuti tu sukila oku linga onepa yetu. Ndeci olonjila vi sukila oku sanda okulia Suku a eca kokuavo, etu tu sukilavo oku amamako oku ‘sandiliya Usoma’ oco tu tambule asumũlũho a tunda kokuaye.—Mateo 6:33.

Manji Stephen Lett wa lombololavo okuti olonjila vi kaluka eci vi limbuka ohele yimue. Cimuamue haico okuti tua siata oku lungula vakuetu nda ci sukiliwa. Tu ci linga eci tu mola okuti manji umue o kasi “oku linga ekandu limue” okuti eye ka ci limbukile. (Va Galatia 6:1) Kupange woku kunda, tu lungulavo omanu catiamẽla ‘keteke lia Yehova’ li kasi ocipepi. (Sofoniya 1:14) Manji Stephen Lett wa lombololavo okuti ndeci olonjila vi palãla kolomunda oco vi sande ocitumãlo cimue coku kala, lekuatiso lia Yehova tu pondola oku yula ovitangi vina okuti ka via lelukile.—Mateo 17:20.

Oku malusula. Olondonge via tambula ovicapa viavo kuenda umue pokati kolondonge wa tanga ukanda wolopandu. Kolondaka viavo viasulako, manji Samuel Herd wa popia okuti oku kapa ovisimĩlo via Yehova vutima wetu, ci sokisiwa loku valela opeleko vevaya limue lia kõla. Oco opeleko yi ñile vevaya, ci sukila oku yi valela olonjanja vialua. Cimuamue haco okuti olondonge vi sukila oku amamako oku sokolola ovina va lilongisa kosikola yo Gileada. Manji Samuel Herd wa popia hati: “Sokiyi otembo oco ‘vu valeli’ vutima wene ovina viosi wa lilongisi.” Eye wa vokiyako hati: “Kuami ovisimĩlo via Yehova kuenda ene u ka linga esumũluho.”