Skip to content

Olombangi Via Yehova

Select language Umbundu

Elivulu Liefetikilo Kelimi Lioku Ilaika Lioko Kofeka yo Amerika

Elivulu Liefetikilo Kelimi Lioku Ilaika Lioko Kofeka yo Amerika

OVISITATŨI, via yeva esanju lialua eci kua lingiwa esapulo liokuti: “Vu ka sanjuka calua poku kũlĩha okuti alivulu amue Ovisonehua vio Heveru [O testamento Yale], a kasi oku pongoluiwa. Kuenda ovideo yelivulu Liefetikilo ya sandekiwa ale!

Esapulo liaco lia lingiwa kohundo yasulako kohongele yimue yofeka Yolombangi via Yehova ya lingiwa kelimi lioku ilaika lioko kofeka yo Amerika (ASL).

Kunyamo wo 2005, Olombangi Via Yehova via fetika oku pongolola o Tradução do Novo Mundo das Escrituras Sagradas kelimi lioku ilaika lio kofeka yo Amerika, oku upisa kelivulu lia Mateo. Kunyamo wo 2010, ci soka 27 kalivulu o Testamento Yokaliye, a pongoluiwa ale kelimi lioku ilaika ASL.

Handi vali, Olombangi Via Yehova vi kasi oku pongolola olonepa vikuavo Viembimbiliya kalimi atãlo oku ilaika.

Momo lie ku lingiwila upange waco? Olombangi Via Yehova via limbuka okuti Embimbiliya lia sonehiwa kelimi omanu va vangula, lina okuti ovisitatũi lalimue eteke va li lilongisile. Oku pongoluila Embimbiliya kelimi lioku ilaika vupopi wa leluka kuenda wa suapo, cecela okuti ovisitatũi vialua vi kuata elomboloko liovina via sonehiwamo kuenda oku kuata ukamba uwa la Suku. Nye omanu va siata oku yeva vutima poku tambula Embimbiliya liaco?

Umalẽhe umue ocisitatũi wa popia hati: “Kanyamo a pita eci elivulu lia Mateo lia sandekiwa, nda limbuka ocisola Yehova Suku a ndi kuetele kuenje cilo loku sandekiwa kuelivulu Liefetikilo nda limbuka okuti ocisola caco ca li vokiya. Yehova o kasi oku linga aliangiliyo osi oco ndu u kũlĩhe.

Ukãi umue ocisitatũi wa popia hati: “Olondimbukiso viaco via leluka oku kuata elomboloko! Embimbiliya liaco nda li sola calua. Nda limbuka okuti Yehova o yongola okuti ndi tanga Embimbiliya liosi, oco ndi kuate elomboloko lia suapo liatiamẽla kokuaye. Upopi waco u ñomõhisa kuenda u ñuatisa oku situlula ovisimĩlo viange ku Suku poku likutilila.