Skip to content

Olombangi Via Yehova

Select language Umbundu

Va Popeliwa Koku Li Ponda

Va Popeliwa Koku Li Ponda

Poku kundila konjo lanjo, Olombangi vivali Via Yehova via veta kepito limue. Ulume umue wa sumua calua, wa yikula epito kuenda konyima yaye kua kala ukolo umue wa kutiwila volusoka.

Eci ulume waco a laleka Olombangi Via Yehova oco va iñile, ovo va pula esunga lieci ukolo wa kutiwila volusoka. Eye wa popia hati wa yonguile oku li ponda, pole wa yeva omunu umue wa kala oku veta kepito kuenje wa nõlapo oku yikula. Olombangi Via Yehova via sapela laye kuenje vo wambata kondotolo yimue kuna a kuatisiwa.

Esapulo eli lia mõlẽha vukanda wasapulo kofeka yo Belgica, pole halioko lika. Olombangi Via Yehova via kuatisa omanu valua oku popeliwa koku li ponda. Kũlĩhĩsa asapulo akuavo atiamẽla kondaka yaco a tunda kolonepa viosi violuali.

Ukãi umue kofeka yo Grécia wa soneha ndoco: “Nda kuata ocitangi cimue lulume wange kuenje ca ndi sumuisa calua. Esumuo liange lia luile calua kuenje nda nõlapo oku li ponda. Ocisimĩlo coku li ponda, ca enda oku ndi kavuluisa, momo nda yonguile oku malako esumuo liaco.

Noke, ukãi waco wa sanda ekuatiso kolondotolo. Eci pa pita otembo yimue, eye wa sanga Olombangi Via Yehova, kuenje wa fetika oku lilongisa Embimbiliya loku enda enda kolohongele. Eye wa soneha ndoco: “Nda sanga ocisola cocili cina nda sandiliya vokuenda kuanyamo alua. Nda sanga akamba vocili, vana okuti ndi pondola oku va kolela. Ndi kuete ombembua lesanju, kuenda si sakalala lovina vi keya kovaso yoloneke.

Ombangi yimue ya Yehova kofeka yo Inglaterra wa soneha ndoco: “Ukãi umue nda kũlĩha wa ndi telefonalela lesakalalo lialua kuenda wa ndi sapuila hati o liponda vuteke waco. Ndo lomboluila atosi amue a sangiwa vo Despertai! ya Kupemba wo 2008 ya lombolola asunga amue a kuatisa oku yuvula oku li ponda kuenda nda tanga ovinimbu vimue Viembimbiliya vi lembeleka. Ndaño okuti eye o kasi oku liyaka lovitangi vialua, pole ka sokolola vali oku li ponda.

Kofeka yo Gana, Ombangi yimue ya Yehova o tukuiwa hati, Michael, olonjanja vimue wa enda oku sapela lumãlẽhe umue ukãi kocitumãlo caye cupange. Eteke limue Michael, wa limbuka okuti ukãi waco wa sumua calua kuenje wo pula esunga lieci a sumuila.

Ukãi waco wo sapuila okuti o yongola oku li ponda momo ulume waye wa sanda ukãi ukuavo. Michael wa lembeleka umãlẽhe waco kuenda wo wĩha alivulu avali atiamẽla Kembimbiliya. Ulandu umãlẽhe waco a tanga, wo kuatisa oku liwekapo oku li ponda. Eye wa amamako oku lilongisa Embimbiliya kuenje cilo wa linga Ombangi ya Yehova.

Ukanda umue wasapulo kofeka yo Estados Unidos, ya sapula okuti umãlẽhe umue Ombangi ya Yehova, osimbu a kala kupange woku kunda wa limbuka okuti ekãlu limue lia talama pole lia kala oku talavaya.

Eye wa popia hati: “Nda mola omangueira ya sokekiwa kelove liowisi. Omangueira yaco ya enda toke pepito liekãlu kuenda ya kutiwa lelikatula.”

“Nda lupukila kekãlu kuenda eci nda lengelela ponjanela nda mola ukãi umue o kasi oku lila vokati kekãlu liaco li kasi oku tunda owisi. Nda kaluka loku popia hati: ‘Nye o kasi oku linga?’

Eci nda yikula epito, nda mola omãla vatatu va tumãla komangu yokonyima. Nda yikula epito kuenje ukãi waco wa popia hati: ‘Ndi sukila oku fa! Ndi sukila oku fa! Ndi fila kumosi lomãla vange!’

“Ame nda popia hati: ‘Ku ka ci linge! Eyi hayoko onjila yoku tetulula ovitangi!’

“Eye wa tambulula hati: ‘ndi sukila oku enda kilu. Omãla vange ndi va ambata.’

“Eye wa amamako loku lila, kuenje ame nda kekama kolongolo. Velivala liaco nda fetikavo oku lila. Ndo sapuila vali hati: ‘Ku ka ci linge!’ Noke, nda kapa okuoko kuange konyima yaye kuenje lutate ndo upamo.

“Noke eye wa kaluka hati: ‘Popela omãla vange!’

“Omãla voluĩla ovoko avo kokuange. Va kala omãla vavali vakãi okuti umue o kuete anyamo akuãla, ukuavo o kuete anyamo atãlo kuenda okamõla kulume ka kuete anyamo avali. Ovo va tumãlele komangu yokonyima, kuenda ka va kũlĩhĩle okuti va laikele oku fa.”

“Eci va tunda vekãlu, nda ima ekãlu liaco. Noke katãlo ketu tua tumãla kewe limue kuenje nda sapuila ina yaco hati: ‘Ndomboluileko ocitangi o kasi oku liyaka laco.’

Olombangi Via Yehova vi tenda omuenyo ndombanjaile yimue yi tunda Kululiki wetu. Volulali luosi ovo va likolisilako oku lembeleka omanu vana va kuete vangandiavo va li ponda kuenda oku kuatisa vana va seteka oku li ponda.