Skip to content

Olombangi Via Yehova

Select language Umbundu

Oku Tumbikiwa Kuombala Yolombangi Via Yehova Kofeka yo Europa Central

Oku Tumbikiwa Kuombala Yolombangi Via Yehova Kofeka yo Europa Central

Olombangi via Yehova vi kuete eci ci soka 15 kolofiliyale voluali luosi. Yimue pokati kavio, ombala yofeka yo Europa Central, kuenda oyo yi sangiwa ko Selters kofeka Alemanha. Ofiliyale yaco yi sangiwa vocitumãlo cimue ci tukuiwa hati, Steinfels okuti kelimi lio alemão onduko yaco yi lomboloka “Ewe.”

Ombala yo ko Europa Central ya tumbikiwa keteke 21 yosãi ya Kupupu wo 1984. Poku linga ocipito ca 30 kanyamo, ombala ya leleka omanu va kasi ocipepi, vakualomilu kuenda asongui ovocitumãlo. Ocipito caco ca kuata osapi ha ti: “30 kanyamo vo Selters,” kuenda ca lingiwa oku upisa keteke 23 toke 25 yosãi ya Kupemba wo 2014.

Vokuenda kuocipito caco, ci pitahãla olohulukãi vitatu komanu veya oku kũlĩha ocitumãlo caco. Usongui umue okuti tunde eci a fetika oku talavaya lombiali yopocitumãlo ci panda ale 30 kanyamo wa popia hati: “Oku nyula Ombala Yolombangi Via Yehova ocina cimue ci likasi.” Eye wa amisako hati: “Toke cilo ndi komõha calua poku ivailuka ndomo ombala ko Steinfels ya tungiwa lonjanga oku upisa kunyamo wo 1979 toke 1984.”

Atosi a Velapo Ocipito Caco

Konẽle yimue yocitumãlo caco, pa kala osapi hati: “Afendeli va Yehova vo Europa Central.” Omanu va kala oku nyula, va kuata epuluvi lioku kũlĩha ulandu Wolombangi Via Yehova vokuenda kueci ci soka 120 kanyamo vofeka yaco. Toke cilo omanu va pondola oku nyula ombala.

Kua kalavo ocitumãlo cimue pa kala oviña vimue Viembimbiliya vi kuete esilivilo okuti ka via siatele. Pokati koviña viaco pa kala Embimbiliya limue liatete lia sonehiwa kelimi lio Alemão kunyamo wo 1534 kuenda onepa yimueYembimbiliya Poliglota ya sandekiwa la Elias Hutter, kunyamo wo 1599, okuti lia sonehiwa kueci ci soka 12 kalimi. Handi vali, pa kalavo onepa yi lekisa ovina viosimbu, olokuadro kuenda olovideo vi lekisa okuti olonumbi Viembimbiliya vi kuete handi esilivilo koloneke vilo.

Vokuenda kuapasu avali, omanu va kuata epuluvi lioku kũlĩha omuenyo weci ci pitahãla ohulukãi yalume kuanda akãi va kasi kombala haivo va talavayamo. Onepa yatete losapi hati: “Ndomo tu kasi,” omanu va nyula va mola vimue pokati kolohondo. Ovo va kuata epuluvi liokulia vokusinya kuenda oku mola oloneleho via posoka. Ukãi umue wa nyula wa popia hati: “Ocitumãlo cilo ca posoka calua!”

Onepa yavali yi tukuiwa hati: “Upange,” ya lekisa olomakina vioku upa olokopia, oku panga alivulu kuenda oku a tumisa. Omanu va nyula va mola ndomo alivulu aco a pangiwa loku a tuma kueci ci pithãla 50 kolofeka. Ulume umue wa popia hati: “Sia la sima okuti Olombangi Via Yehova ocisoko cimue ci sangiwa voluali luosi.” Alivulu avo a siata oku eciwa voluali luosi. Oku linga upange loku tenda lika ekuatiso liomanu va lieca olumue, ocikomo cimue.”

Omanu vanyula kũlĩha onumbi yetu yo internet jw.org

Onepa yimue yi likasi ya kala utala umue wa lekisa onumbi yo internet Yolombangi Via Yehova, okuti o jw.org. Omanu vakuavitunga viosi va kuata epuluvi lioku tala ovindekaise kuenda olovideo, kuenje apulilo alua va kuatele, a tambuluiwa.

Noke lioku kũlĩha aciwa upange Wolombangi Via Yehova voluali luosi, omanu valua va nyula va tunda lesanju kuenda va komõha omo liovina va mola. Ulume umue wa popia hati: “Sia kuatele ovisimĩlo viasunguluka viatiamẽla Kolombangi Via Yehova, pole cilo ndi sukila oku pongolola ovisimĩlo viange.” Ukãi ukuavo wa popia olonjanja vialua hati: “Etali lia kala eteke lia malako olonepele viosi.”

^ tini. 17 Ovolandu wunyamo wo 2014

^ tini. 21 Ovolandu wunyamo wo 2014

^ tini. 24 Ovolandu wunyamo wo 2014