Olombangi Via Yehova vi Tenda Ndati Oku Linyãla?
Ocisimĩlo cetu ca kunamela kueci Embimbiliya li popia catiamẽla kolohuela kuenda koku linyãla. Suku eye wa angiliya olohuela. Onjongole ya Suku yeyi okuti, ulume lukãi noke yoku kuela vamamako oku kala pamosi lomunga. Ndomo ci lekisiwa Vembimbiliya, ocina ci koka okuti a va vakuele va linyãla, ukahokolo.—Mateo 19:5, 6, 9.
Olombangi via Yehova vi kuatisa hẽ vana va yongola oku linyãla?
Oco, volonjila via litepa:
Lekuatiso lialivulu. Olo revista vietu, alivulu kuenda olovideo olonjanja viosi, mu sandekiwa ovipama vi kuatisa olohueli, ndaño muẽle vana va molẽha ndu okuti ka va kuete ndomo va potolola ocitangi cavo. Tala ovipama ndeci: “Manter o compromisso com o seu casamento,” “Aprenda a perdoar,” kuenda “Recuperar a confiança.”
Olohongele. Olohongele vietu viekongelo, olohongele vimbo kuenda viofeka, olonjanja viosi vi eca alungulo awa kolohueli. Alungulo aco a kunãmela Vembimbiliya.
Akulu vekongelo. Alume vaco va eca ekuatiso kolohueli vi yongola oku linyãla, poku va lekisa alungulo a sangiwa Vembimbiliya ndeci, elungulo li sangiwa ku Va Efeso 5:22-25.
Akulu vekongelo va tava hẽ oku linyãla Kuombangi yimue ya Yehova?
Sio. Ndaño ceci akulu vekongela va kuatisa olohueli vimue, ovo ka va sapuila ulume ale ukãi eci a sukila oku linga. (Va Galatia 6:5) Nda umue o nõlapo oku linyãla, pole, ka kuli esunga liuwecelela oku ci linga, ka citava okuti o kuela onjanja yavali.—1 Timoteo 3:1, 5, 12.
Olombangi via Yehova vi tenda ndati oku litepa?
Embimbiliya li lungula okuti, olohueli vi sukila oku kala pamosi ndaño okuti ekalo ka lialelukile. (1 Va Korindo 7:10-16) Ovitangi vimue vi pondola oku potoluiwa pocati colohutililo, lekuatiso lialungulo Embimbiliya kuenda poku li lekisa ocisola.—1 Va Korindo 13:4-8; Va Galatia 5:22.
Pole, Akristão vamue va nõlapo oku litepa lulume waye ale lukãi waye omo liovitangi vimue ndeci:
Nda ulume ka yongola vali oku tekula epata.—1 Timoteo 5:8.
Nda ulume ale ukãi okuti, omuenyo waye u kasi kohele omo lioku vetiwa calua volohuela.—Osamo 11:5.
Nda ulume ale ukãi o linga cosi citava oco a tateke ukuavo oku vumba Suku. Ndeci, ulume ale ukãi, pamue o kisika Ombangi ya Yehova oku sinila olonumbi via Suku. Lonjila ndeyi, una o kasi oku kisikiwa o liyeva okuti, oku litepa oyo onjila ya sunguluka yoku “pokola ku Suku ndombiali, komanu hakoko.”—Ovilinga 5:29.