Alume Vakuãla va Endela Kotuvalu Kuenda Ove Ku yevala onjuela yalua! Otuvalu tukũala tu kuete unene walua kuenda vana va endelako, va kasi oku linga ovina vimue vikomohĩsa kuenda ulandu waco ndomo wa lomboluiwa Vembimbiliya, ci kasi ndu okuti tu letiwe! Okavalo katete kayela kuenda u wa endelako, osoma yimue yi komõhisa. Konyima yaye ku kũai okavalu ka kusuka, okuti wa endelako wopa ombembua ya kala pokati komanu. Konyima yaco kua kuama okavalu katekãva kuenda wa endelako o kuete ombalãsa peka. Velivala liaco kua yevela esapulo limue li koka usumba liokuti, ku kala ekambo liokulia. Oku sulako nda mola okavalu ka yeluluka ka lekisa okuti, ku kala ovovei kuenda ovitangi vikuavo vi koka olofa!​—Esituluilo 6:1-8.

“Onjanja yatete eci nda tanga ulandu watiamẽla kotuvalu tukuãla, nda komõha calua. Nda simile okuti, eteke liesombiso lieya kuenda sia lipongiyile handi oco ndi puluke.”​—Crystal.

“Nda komõha calua eci nda mola otuvalu tukũala tu kuete avala a litepa kuenda ava va endelako. Pole, nda sanjuka calua eci nda kuata elomboloko liolokavalu viaco.”​—Ed.

Nye o sima catiamẽla kulandu owu Wembimbiliya? Ove hẽ o saluka ndeci Crystal? Ale wa kala nda Ed? Ndaño oco, ocijonde colokavalu vikũala, owo ulandu wa kũlĩhĩwa calua u sangiwa Vembimbiliya, kelivulu Liesituluilo. Wa Kũlĩha hẽ okuti oku kuata elomboloko liulandu waco ci pondola oku ku kuatisa? Ndamupi? Suku o vetiya vosi oku kuata elomboloko kuenda oku pokola kovina via sonehiwa kelivulu Liesituluilo. Nda wa ci linga o ka kuata esanju.​—Esituluilo 1:1-3.

Ocili okuti omanu vamue va kuete usumba omo liocinjonde catiamẽla kolokavalu vikuãla, pole eci haicoko ocimãho culandu waco. Omo liaco, ocinjonde caco ci pondola oku pamisa ekolelo liomanu valua kuenda oku va kuatisa oku kuata elavoko lia velapo kovaso yoloneke. Ulandu waco u pondolavo oku ku pamisa! Tanga ulandu waco.