Oku sapela kuocili ku lingiwa eci ove lomãla vove vu sapeli locili, catiamẽla kovisimĩlo viene.

Ka ca lelukile oku sapela lamalẽhe. Elivulu limue lia popia okuti, “Kanyamo a pita, pamue ca kala ndu okuti, o kuete elianjo lioku kũlĩha ondongosi omuenyo womõlove. Ci lomboloka okuti, osimbu omãla ka va kulile, ovo va sapuila cosi kolonjali viavo. Eci va kula, ka va sapuila cosi kolonjali kuenje olonjali ka vi kũlĩha ovisimĩlo viomãla vavo.” Ocili okuti, eli olio epuluvi omãla va sukila oku sapela calua okuti, kosimbu ci sule!

Sapela lavo vapuluvi osi ovo va sukila oku ci linga. Ndaño ci lomboloka oku sapela lavo toke vokati kuteke.

“Pamue o setekiwa oku popia hati: ‘Ove o yongola oku sapela lame cilo? Eteke liosi lia tu pita pamosi!’ Tu sukila hẽ oku kelõhala omãla nda ovo va yongola oku tu sapuila cimue? Olonjali vi yongola okuti, oco omãla va sukila oku linga.”—Lisa.

“Si sole oku pekela ekumbi lia enda. Pole, olombangulo viwa nda kuata lomãla vange amalẽhe, via lingiwa noke lio vokati kuteke.”—Herbert.

CECI EMBIMBILIYA LI POPIA: “Omunu lomunu ka kamameko oku sanda olonjongole viaye muẽle, pole, te viomunu ukuavo.”—1 Va Korindo 10:24.

Yuvula ovina vi ku tateka. Isia umue wa popia hati: “Olonjanja vimue eci omãla vange va sapela lame, ndi sokolola kovina vikuavo. Si kuete ndomo ndi ci limbika, momo ovo va limbuka okuti si kasi oku yevelela lutate!”

Nda wa siata oku linga ndeci isia u, ima otelevisãu, ivalako otelefone yove ale otablet. Yevelela lutate kueci omõlove a kasi oku popia. Lekisa okuti wa kapako ocitangi eye a kasi oku liyaka laco, ndaño okuti esakalalo liaye li molẽha ndu ka li silivila calua.

“Tu sukila oku lekisa komãla vetu okuti, ovisimĩlo viavo vi kuete esilivilo kokuetu. Nda ovo ka va ci limbukile, omãla vetu ka va tu sapuila cimue ale va ka sanda ekuatiso liomanu vakuavo.”—Maranda.

“Ku ka pumbe epandi, ndaño okuti ovisimĩlo viomõlove ka via sungulukile.”—Anthony.

CECI EMBIMBILIYA LI POPIA: “Lavululi ndomo vu yeva.”—Luka 8:18.

Sanda oku sapela lavo vapuluvi olomapalo. Olonjanja vimue ka ci leluka kamalẽhe oku sapela lolonjali okuti va li luluvala polo la polo.

“Eci tu enda lekãlu kocitumãlo cimue, tua siata oku sanga epuluvi lioku sapela. Poku kala umue konele yimue, ukuavo konele yikuavo, cecelela olombangulo viwa okuti, oku sapela polo la polo ci sule.”—Nicole.

Vapuluvi oku lia, apuluvi awa oku sapela.

“Vepuluvi liondalelo, tua siata oku li sapuila ovina viwa levi vĩvi via pita keteke liaco. Eci ci tu kapa vomunga kuenje tu kolela okuti, ka tu sukila oku liyaka lovitangi lika lietu.”—Robin.

CECI EMBIMBILIYA LI POPIA: “Omunu lomunu a kale ukuanjanga koku yevelela, [kuenda] a livale koku popia.”—Tiago 1:19.