Yovi 36:1-33
-
Elihu o sivaya unene wa Suku ka u konomuisiwa (1-33)
36 Elihu wamisako hati:
2 “Kuata ño epandi lame, osimbu ndi vangula,Momo handi ñuete olondaka vioku vangula ndonumiwa ya Suku.
3 Ame ndi ka vangula cosi nda kũlĩha,Kuenda ndi ka sandeka esunga lia Una wa ndi panga.+
4 Ocili okuti, olondaka viange haviuhembiko;Una wa lipua kukũlĩhĩso,+ o kasi palo, kovaso yove.
5 Ocili muẽle okuti, Suku ukuonene+ kuenda ka likali laumue;Eye wa velapo kunene waye welomboloko.*
6 Eye ka ka teyuila omuenyo wolondingaĩvi,+Pole, eye o ka sombisa lesunga vana va talisiwa ohali.+
7 Eye ka tindula ovaso aye ku vakuesunga;+Eye o va tumbika kovialo kumue lolosoma*+ kuenje va kemãlisiwa otembo ka yi pui.
8 Pole, nda ovo va kutiwa laliengeLoku kuatiwa lovikolo viohali,
9 Eye o situlula kokuavo eci ovo va siata oku linga,Lakulueya avo ana a kokiwa lepela liavo.
10 Eye o situlula ovatũi avo oco a va pindiseKuenda o va sapuila oco va kale ocipãla leci cĩvi.+
11 Nda ovo vo pokola kuenda vo vumba,Oloneke viavo komuenyo, vi ka kala vielau,Kuenda anyamo avo a ka kala esanju.+
12 Pole, nda ka va pokuile, va ka pondiwa losipata*+Kuenda va ka fa lekambo liukũlĩhĩso.
13 Vana va kuete utima wondingaĩvi* va ka soleka ocikumbiti.
Ka va liyula oku pinga ekuatiso ndaño muẽle ceci eye a va kangisa.
14 Ovo va fa osimbu handi va kasi amalẽhe,+Va pumbila* kumosi omuenyo lovipuepue vialume vio vonembele.+
15 Pole, Suku* o popela vakuahali vokuenda kuohali yavo;Eye o situlula ovatũi avo eci va talisiwa ohali.
16 Eye o ku upa kongusu yohali+Kuenje oku ambata kocitumãlo cimue ca tanda, kuna ka kuli oku likupika,+Kuenda ove o ka lembelekiwa lokulia kuwa komesa yove.+
17 Kuenje ove o ka sanjukila esombiso liolondingaĩvi,+Eci ku tukuiwa onima yesombiso kuenda esunga liamamako.
18 Pole, kuata utate oco onyeño ka yi ka ku kokele ocikumbiti,*+Kuenda ku ka ecelele oku yapuisiwa lovitukiko vialua.
19 Anga hẽ oku liyula kuove kuoku pinga ekuatisoAle elikolisilo liosi o linga, vi ka ku yovola kohali?+
20 Ku ka livele oco uteke wiye,Eci omanu va takata povitumãlo viavo.
21 Kuata utate oco ku ka tiukile koku linga eci cĩvi,Poku nõla eci okuti, ohali sio.+
22 Tala! Suku wa kemãla kunene;Ulongisi upi o sokisiwa laye?
23 Helie wa songuila* onjila yaye+Ale wa popia kokuaye hati: ‘Eci wa linga ndeti cĩvi’?+
24 Ivaluka oku kemãlisa ovilinga viaye,+Vina omanu va imbila ovisungo.+
25 Omanu vosi va siata oku mola ovilinga viaco,Omunu o vi muĩla ocipãla.
26 Ocili, unene wa Suku walua calua okuti, etu ka tu pondola oku kuata elomboloko liawo.+Etendelo lianyamo aye ka li tẽliwa oku li tenda.*+
27 Eye o londisa atosi ovava;+Kuenje atosi aco a linga ombela lombundu;
28 Noke alende a sukumũla ovava aco;+Kuenje a lokela komanu.
29 Kuli hẽ umue okuti, o tẽla oku kuata elomboloko lioku lisandula kualende,Lovilemĩlo vi tunda vombalaka yaye?+
30 Tala ndomo eye a sandula ociliakulo*+ caye kilu liavioLoku sitika alondo* okalunga.
31 Pokati kovina evi ndeti, eye o tekula* omanu;Eye eca kokuavo okulia kualua.+
32 Lovaka aye o sitika ociliakulo,Kuenje o ci tiamisila kocimãho calio.+
33 Ocilemĩlo caye ci sapula eci catiamẽla kokuaye,Ndaño muẽle ocunda, ci sapula u* o kasi oku iya.
Atosi Pombuelo
^ Lit., “utima.”
^ Ale pamue, “Eye o tumãlisa olosoma.”
^ Ale “luta umue.”
^ Ale “onanguluke.”
^ Ale pamue, “Va sulila.”
^ Lit., “Eye.”
^ Ale “oku pandula locikumbiti.”
^ Ale pamue, “wo pisa; wo kisika oku li lomboluila ko.”
^ Ale “ka li kũlĩhĩsiwa.”
^ Lit., “ocinyi.”
^ Lit., “olombombo.”
^ Ale pamue, “o teyuila ocitangi co.”
^ Ale pamue, “ceci.”
