Yeremiya 29:1-32
29 Evi ovio olondaka viukanda uprofeto Yeremiya a tuma oku upisa ko Yerusalãi oco vi ende kakulu va supa pokati komanu olomandekua, kovitunda, kovoprofeto kuenda komanu vosi vana Nevukandesa ambatele kumandekua, poku tunda ko Yerusalãi toke ko Bavulono,
2 noke lia Soma Yekoniya,+ ina ya soma,*+ vakesongo kelombe, olombuale vio Yuda kuenda vio ko Yerusalãi, olomesele la vakuakutela utale* va tunda vo Yerusalãi.+
3 Eye wa tuma ukanda peka lia Elasa omõla a Siafane+ kuenda lia Gemariya omõla a Hilikiya, vana Soma Sedekiya+ wo ko Yuda a tuma ko Bavulono ku Soma Nevukandesa wo ko Bavulono. Ukanda waco wa popia hati:
4 “Ca popia Yehova ukualohoka, Suku ya Isareli, komanu vosi olomandekua vana nda ecelela okuti, va enda kumandekua poku tunda ko Yerusalãi oku enda ko Bavulono ceci hati:
5 ‘Tungi olonjo kuenda kalimo. Kũli oviti viapako kuenda li kapako aco.
6 Kueli akãi loku cita omãla valume lomãla vakãi; sandeli akãi omãla vene valume kuenda eci omãla vene vakãi oco va kueliwe okuti, va vakuatavo omãla valume lomãla vakãi. Livokiyi kuenda ko ka tepuluki.
7 Sandi ombembua oco yi kale volupale luna ame nda ku kapi kumandekua kuenda likutililiko olupale luaco ku Yehova, momo ombembua yalio yi ka lomboloka ombembua kokuene.+
8 Momo ca popia Yehova ukualohoka Suku ya Isareli ceci hati: “Ko ka eceleli oku yapuisiwa lovaprofeto vene la vakuakutãha va kasi pokati kene+ kuenda ko ka yeveleli olonjoi va kasi oku lota.
9 Momo ‘ovo va kasi oku vu imbili owanji wuhembi vonduko yange. Ame sia va tumile,’+ oco Yehova a popia.”’”
10 “Momo ca popia Yehova ceci hati: ‘Eci ku tẽlisiwa 70 kanyamo ko Bavulono, ndi ka vu ivaluki+ kuenda ndi ka tẽlisa ohuminyo yange yiwa yoku vu neni vali vocitumãlo eci.’+
11 “‘Momo nda kũlĩha ciwa ovisimĩlo ndu vu kueteli,’ oco Yehova a popia, ‘ovisimĩlo viombembua okuti, haviohaliko,+ oco ngece kokuene ekalo liwa kuenda elavoko limue.+
12 Kuenje ene vu ka mbilikiya kuenda vu keya kokuange vocakati cohutililo kuenje ame ndi ka vu yeveleli.’+
13 “‘Ene vu ka ndi sandiliya+ kuenje vu ka ndi sanga, momo vu ka ndi sandiliya lutima wene wosi.+
14 Ndi ka ecelela okuti ene vu ndi sanga,’+ oco Yehova a popia. ‘Kuenda ndi ka ongolola olomandekua viene loku vu kongeli pokati kolofeka viosi kuenda kovitumãlo vina ndo sanduili,’+ oco Yehova a popia. ‘Kuenje ndi ka vu neni vali kocitumãlo cina nda ecelela okuti wendi kumandekua.’+
15 “Pole, ene wa popi hoti: ‘Yehova wa tu katuila ovaprofeto ko Bavulono.’
16 “Momo ca popia Yehova kosoma ya tumãla kocalo ca Daviti+ kuenda komanu vosi va tunga volupale lulo, vamanjene vana ka va ambatiwile kumue lene kumandekua ceci hati:
17 ‘Ca popia Yehova ukualohoka ceci hati: “Ñasi oku tuma kokuavo osipata, onjala kuenda efengi*+ kuenje ndi ka va lingisa ndakuyu a vola* hao ãvi calua okuti, ka a tava oku a lia.”’+
18 “‘Ndi ka va katukila losipata,+ lonjala kuenda lefengi kuenje ndi ka ecelela okuti ovo va kala ocikuata cimue cocinjoko kovosoma osi o kilu lieve+ kuenda esiñalo locikuata cimue coku komõha, ocina cimue coku sika ovilua+ kuenda cesanumũlo pokati kolofeka viosi kuna ndi va sanduila,+
19 momo ka va yevelele kolondaka viange vina nda tuma kokuavo lakuenje vange ovaprofeto,’ oco Yehova a popia ‘poku va tuma olonjanja vialua.’*+
“‘Pole, ene ka wa yeveleli,’+ oco Yehova a popia.
20 “Omo liaco, yeveleli ondaka ya Yehova amanu vosi vu kasi kumandekua, ene ndo tundisi ko Yerusalãi oku vu tumi ko Bavulono.
21 Ca popia Yehova ukualohoka Suku ya Isareli catiamẽla ku Ahava, omõla a Kolaya kuenda catiamẽla ku Sedekiya, omõla a Maaseya vana va kasi oku imbila owanji wuhembi vonduko yange+ ceci hati: ‘Ñasi oku va eca peka lia Soma Nevukandesa wo ko Bavulono kuenje eye o ka va kunduila kovaso yene.
22 Kuenda eci ci ka pita lavo ci ka kala ndesiñalo li vanguiwa lolomandekua viosi vio ko Yuda, ko Bavulono liokuti: “Yehova a linge love ndeci a linga la Sedekiya kuenda la Ahava, vana soma yo Bavulono a yoka vondalu!”
23 momo ovo va linga ocina cimue ci kutisa osõi ko Isareli,+ poku linga ukahokolo lakãi va vana va lisungue lavo kuenda oku vangula olondaka viesanda vonduko yange okuti, sia va handelekele.+
“‘“Ame Una wa ci kũlĩha kuenda ame ndimbangi yaco,”+ oco Yehova a popia.’”
24 “Kuenje ku Semaya+ wo ko Nehelami o ka popia okuti,
25 ‘Ca popia Yehova ukualohoka Suku ya Isareli ceci hati: “Omo okuti ove wa tuma ovikanda vonduko yove komanu vosi va kasi ko Yerusalãi, ku Sofoniya+ omõla a Maaseya, ocitunda kuenda kovitunda viosi, poku popia hati,
26 ‘Yehova wa ku lingisa ocitunda pomangu yocitunda Yehoyada, oco o linge usongui wonjo ya Yehova, oco o lave omunu wosi eyui una okuti, o li lingisa nduprofeto loku u kapa kovikumbi;+
27 oco hẽ, momo lie kua lemẽlele Yeremiya u Anatote+ una o kasi oku li lingisa nduprofeto kokuene?+
28 Momo eye wa tuma esapulo limue kokuetu ko Bavulono liokuti: “Umandekua u ka kala otembo yalua! Tungi olonjo kuenda kalimo. Kũli oviumbo kuenda li apako avio,+—”’”’”
29 Eci ocitunda Sofoniya+ a tangela ukanda waco kovaso yuprofeto Yeremiya,
30 ondaka ya Yehova yeya ku Yeremiya yiti:
31 “Tuma esapulo komanu vosi va kasi kumandekua liokuti: ‘Ca popia Yehova catiamẽla ku Semaya wo ko Nehelami ceci hati: “Omo okuti, Semaya wa ku imbili owanji ndaño sio tumile kuenda wa seteka oku ku vetiyi oku tava kovohembi,+
32 omo liaco, ca popia Yehova ceci hati: ‘Ñasi oku yambula Semaya wo ko Nehelami kuenda ovitumbulukila viaye. Lomue pokati kepata liaye o ka puluka pokati komanu ava kuenda eye ka ka mola ovina viwa ndi ka lingila omanu vange,’ oco Yehova a popia, ‘momo eye wa vetiya vakuavo oku sinĩla Yehova.’”’”
Atosi Pombuelo
^ Ale “ñala yukãi.”
^ Ale pamue, “vakuakutunga ovimbaka.”
^ Ale pamue, “a tuika.”
^ Ale “uvei.”
^ Lit., “oku pasuka selo loku tuma.”
