Yehosua 24:1-33
-
Yehosua o pitulula ulandu wa Isareli (1-13)
-
Elungulo lioku vumba Yehova (14-24)
-
“Ame kumue lepata liange, tu ka vumba Yehova” (15)
-
-
Ocisila Yehosua a linga la Isareli (25-28)
-
Oku fa kua Yehosua kuenda oku kendiwa kuaye (29-31)
-
Akepa a Yosefe a kendiwa ko Sekeme (32)
-
Oku fa kua Eleasa kuenda oku kendiwa kuaye (33)
24 Noke Yehosua wongoluila ovikoti viosi via Isareli vo Sekeme kuenda wa kovonga akulu va Isareli, lasongui vavo, lolonganji viavo la vakesongo kavo+ kuenje ovo va talama kovaso a Suku yocili.
2 Yehosua wa sapuila omanu vosi hati: “Eci ca popia Yehova Suku ya Isareli ceci hati: Kosimbu ‘vakukululu yene+ oku kongelamo+ Terahi isia ya Avirahama haeye isia ya Nahore, va kala kesinya likuavo Liolui* kuenda va enda oku vumba olosuku vikuavo.+
3 “‘Vokuenda kuotembo, ndopa kukululu yene Avirahama+ kesinya likuavo Liolui* kuenda nda ecelela okuti, eye o ñuala ofeka yosi yo Kanana kuenda nda lingisa okuti ocitumbulukila* caye cilua.+ Nda eca kokuaye Isake;+
4 noke ku Isake nda eca Yakoba kuenda Esau.+ Kuenje ku Esau nda eca Omunda Seire ndocipiñalo caye;+ kuenda Yakoba kumue lomãla vaye va lokila Kegito.+
5 Noke nda tuma Mose la Arone+ kuenda nda veta o Egito lafengi ana nda lingila pokati kavo+ kuenje nda ku upi vofeka yaco.
6 Eci ndopa vakukululu yene Kegito+ leci ene wa pitĩli kokalunga, va Egito va landula va isiene lakãlu wuyaki lalume vakuakuendela kotuvalu toke Kokalunga Kakusuka.+
7 Ovo va fetika oku kalukila Yehova+ kuenje ame nda kapa owelema pokati kene la va Egito noke nda volumuĩla okalunga kuenje ka va sitika+ kuenda ovaso ene a mola ovina nda linga Kegito.+ Noke ene wa kali vekalasoko vokuenda kuanyamo* alua.+
8 “‘Kuenje nda ku neni vofeka ya va Amori vana va kala konele yikuavo* yo Yordão kuenda ovo va liyaka lene.+ Pole, ame nda va eca peka liene, oco vu piñali ofeka yavo kuenda nda va kunduila kovaso ene.+
9 Noke Balaka omõla a Sipore soma yo Moavi wa katuka kuenda wa liyaka la Isareli. Eye wa pañinya Baliame omõla a Beore oco a ku siñali.+
10 Pole, ame sia tavele oku yeva Baliame.+ Omo liaco, eye wa ku sumũlũisi olonjanja vialua+ kuenda ame nda ku yovoli peka liaye.+
11 “‘Noke ene wa yoki o Yordão+ kuenje wa pitĩli vo Yeriko.+ Kuenje asongui* vo ko Yeriko, la va Amori, la va Perisi, la va Kanana, la va Hiti, la va Girigasi, la va Hivi kuenda va Yevusi, va liyaka lene, pole, nda va eca peka liene.+
12 Kuenje osimbu ka wa pitĩlili, nda lingisa okuti, va sumua* kuenda nda tundisa kovaso ene+ olosoma vivali via va Amori. Pole, eci ka ca lingiwile omo liosipata yene ale ohonji yene.+
13 Nda eca kokuene ofeka yimue ene ka wa talavayeli kuenda alupale ana ka wa tungili+ kuenje wa tungimo. Ene vu kasi loku lia koviumbo viayuva kuenda koviti violiveira vina ka wa kũlili.’+
14 “Omo liaco, sumbili Yehova, u vumbi lutima wosi* kuenda lesunga*+ kuenje upi pokati kene olosuku vina vakukululu yene va vumba konele yikuavo Yolui* lo Kegito+ kuenda vumbi Yehova.
15 Kaliye nda oku vumba Yehova cĩvi kovaso ene, li nõleli ene muẽle etaili una vu ka vumba,+ ci kaile olosuku vina vakukululu vene va vumba konele yikuavo Yolui*+ ale olosuku via va Amori vana wa tungi vofeka yavo.+ Pole, ame kumue lepata liange, tu vumba Yehova.”
16 Kuenje omanu va tambulula vati: “Ka ca sungulukile kokuetu oku siapo Yehova loku vumba olosuku vikuavo.
17 Yehova Suku yetu eye wa tu upa kumue la va isietu vofeka Yegito,+ konjo yupika+ kuenda eye wa linga ovikomo evi vinene kovaso etu+ kuenda eye wa tu lava vonjila yosi muna etu tua endela lo pokati komanu vosi tua pita.+
18 Yehova wa tundisa omanu vosi oku kongelamo va Amori, vana va kala vofeka yilo osimbu handi ka tua kailemo. Omo liaco, etu tu vumbavo Yehova momo eye Suku yetu.”
19 Noke Yehosua wa sapuila omanu hati: “Ene ka vu tẽla oku vumba Yehova momo, eye o Suku yimue yi kola;+ Eye o Suku yimue yi yongola okuti, omanu vo fendela lika eye.+ Eye ka ka ecela akulueya* ene lakandu ene.+
20 Nda ene wa sipo Yehova loku vumba olosuku viñi, eye o ka vu ñualelipo loku vu kunduli noke yoku vu lingili ovina viwa.”+
21 Pole, omanu va sapuila Yehosua vati: “Hacoko, etu tu ka vumba Yehova!”+
22 Omo liaco, Yehosua wa sapuila omanu hati: “Ene vulombangi viene muẽle okuti, lonjongole yene muẽle wa nõlipo oku vumba Yehova.”+ Kuenje ovo va tambulula vati: “Etu tulombangi.”
23 “Omo liaco, kunduli olosuku viñi vina vi kasi pokati kene kuenda tiamisili ovitima viene ku Yehova Suku ya Isareli.”
24 Omanu va sapuila Yehosua vati: “Tu ka vumba Yehova Suku yetu kuenda tu ka pokola kondaka yaye!”
25 Omo liaco, Yehosua wa linga ocisila cimue lomanu keteke liaco kuenje wa tumbika ociholo cimue kuenda ocihandeleko kokuavo ko Sekeme.
26 Kuenje Yehosua wa soneha olondaka evi velivulu Liocihandeleko ca Suku+ kuenda wopa ewe limue linene+ loku li kapa vemẽhi liuti umue unene u kasi ocipepi locitumãlo ci kola ca Yehova.
27 Yehosua wamisako oku sapuila omanu vosi hati: “Tali! Ewe eli li ka linga ombangi pokati ketu,+ momo lia yeva ovina viosi Yehova a tu sapuila kuenda olio li ka kala ndombangi kokuene, oco okuti ka vu likali Suku yene.”
28 Omo liaco, Yehosua wa tuma omanu oco va ende okuti, omunu lomunu kocipiñalo caye.+
29 Noke liovina evi, Yehosua omõla a Nune ukuenje wa Yehova, wa fa eci a kuata 110 kanyamo.+
30 Kuenje ovo vo kenda vocikanjo cocipiñalo caye ko Timinata-Sera+ kovaimbo a kasi kolomunda via Efarimi konano Yomunda Gasi.
31 O Isareli yamamako oku vumba Yehova koloneke viosi via Yehosua kuenda koloneke viosi viakulu vana vamamako oku kala lomuenyo noke lia Yehosua, haivo va kũlĩhĩle ovilinga viosi via Yehova vioku kuatisa Isareli.+
32 Akepa a Yosefe+ ana va Isareli va tunda lao Kegito, a kendiwa vo Sekeme vonepa yimue yepia lina Yakoba a landele komãla va Hamore+ isia ya Sekeme leci ci soka 100 kolosiekele violopalata;+ kuenje olio lia linga ocipiñalo comãla va Yosefe.+
33 Handi vali, Eleasa omõla a Arone wa fa.+ Omo liaco, vo kenda Komunda yomõlaye Finehase,+ yina ya eciwile kokuaye kovaimbo a kasi kolomunda via Efarimi.
Atosi Pombuelo
^ Okuti, o Ferati.
^ Okuti, o Ferati.
^ Lit., “ombuto.”
^ Lit., “oloneke.”
^ Okuti, konele yutundilo.
^ Ale pamue, “vamuẽle yolofeka.”
^ Ale pamue, “usumba; ocinjoko.”
^ Ale “lonjila yimue ka yi kuete etime.”
^ Ale “locili.”
^ Okuti, o Ferati.
^ Okuti, o Ferati.
^ Ale “esino.”
