Yehosua 14:1-15
14 Eci oco va Isareli va tambula ndocipiñalo vofeka yo Kanana, yina Eleasa ocitunda kuenda Yehosua omõla a Nune lasongui volonjo via va isia viovikoti via Isareli, va eca kokuavo oco va yi piñale.+
2 Ocipiñalo ca eciwa kovikoti ecea lomeyu, ca lingiwa locela+ ndomo Yehova a ci handelekele pocakati ca Mose.+
3 Mose wa ecele ocipiñalo kovikoti vikuavo vivali lomeyu konele* yikuavo yo Yordão+ kuenje ku va Lewi ka ecele ocipiñalo lacimue pokati kavo.+
4 Ovitumbulukila via Yosefe via tendiwa vovikoti vivali okuti,+ Manase kuenda Efarimi;+ kuenje ovo ka va ecele onepa yimue yofeka ku va Lewi te lika alupale+ oku kala kuenda ovisenge viavo vioku lisila ovinyama viavo kuenda ovina vikuavo va kuata.+
5 Kuenje va Isareli va tepa ofeka ndomo Yehova a handelekele Mose.
6 Noke alume vo ko Yuda va enda ku Yehosua ko Giligali+ kuenda Kalembe+ omõla a Yefune u Kenisi wa popia laye hati: “Ove wa kũlĩha ciwa ovina Yehova a sapuila+ Mose ukuenje wa Suku+ yocili viatiamẽla kokuove kuenda kokuange ko Kadesi-Barnea.+
7 Ame nda kuata 40 kanyamo eci Mose ukuenje wa Yehova a ndi tumile ko Kadesi-Barnea oku ka kũlĩhĩsa ofeka+ kuenda ame nda tiuka lesapulo* limue liwa.+
8 Ndaño okuti vamanjange vana va endele kumue lame va kokela omanu oku kuata usumba,* pole, ame nda kuama Yehova Suku yange lutima wosi.+
9 Keteke liaco, Mose wa lisila poku popia hati: ‘Ofeka yina olomãhi viove via liata, yi linga ocipiñalo cimue kokuove lo komãla vove, momo ove wa kuama Yehova Suku yange lutima wosi.’+
10 Ndomo eye a likuminyile,+ Yehova wa ñalisa lomuenyo+ vokuenda kuanyamo aco a soka 45 tunde eci Yehova a linga ohuminyo eyi ku Mose eci o Isareli ya ñuala ñuala vekalasoko;+ Ame handi ñasi palo etaili leci ci soka 85 kanyamo.
11 Kuenje etaili, haimo nda pamẽla ndeteke lina Mose a ndi tumile. Ongusu yange yi kasi ndeci ya kala kosimbu, ci kaile kuyaki ale kovopange akuavo.
12 Omo liaco, nyĩhe ovaimbo a kasi kolomunda yina Yehova a likuminyile keteke liaco. Ndaño okuti keteke liaco wa yeva okuti, kua kala va Anaki+ kumue lalupale a kuete oviteyuilo,+ ocili okuti,* Yehova o ka kala lame+ kuenda ame ndi ka va tundisa* ndeci Yehova a likuminyile.”+
13 Kuenje Yehosua wo sumũlũisa kuenda wa eca o Hevirone ndocipiñalo ku Kalembe omõla a Yefune.+
14 Eli olio esunga lieci o Hevirone ya tiamẽlele ku Kalembe omõla a Yefune u Kenisi ndocipiñalo toke eteke lietaili, momo eye wa kuama Yehova Suku ya Isareli lutima wosi.+
15 Kosimbu onduko yo Hevirone ya kũlĩhĩwile okuti, Kiriyata-Ariva+ (Ariva wa kala ulume umue wa velelepo pokati ka va Anaki). Kuenje ofeka ya kuata epuyuko kuyaki.+
Atosi Pombuelo
^ Okuti, konele yutundilo.
^ Lit., “londaka yimue ndeci ca kala vutima wange.”
^ Lit., “va kokela utima womanu oku yenguluka.”
^ Ale “oku va lupuisa.”
^ Ale “ci molẽha okuti.”
