Olosamo 89:1-52
Masikili.* Osamo ya Etani+ u Seraye.
89 Ndi ka imba eci catiamẽla kocisola ka ci pongoloka ca Yehova otembo ka yi pui.
Ndi ka sapula lomẽla wange ocili cove kovitumbulukila viosi.
2 Momo nda popia siti: “Ocisola ka ci pongoloka ci ka pamisiwa* otembo ka yi pui,+Kuenda ove wa tumbika ciwa ocili cove kovailu.”
3 “Nda linga ocisila cimue la Daviti ukuenje wange nda nõla;+Nda lisila laye siti:+
4 ‘Ame ndi ka tumbika ciwa ocitumbulukila*+ cove otembo ka yi pui,Kuenda ndi ka pamisa ocalo cove kovitumbulukila viosi.’”+ (Sela)
5 A Yehova, ovailu a sivaya ovikomo viove,Ocili, esunga liove vekongelo liolosandu.
6 Momo, helie kovailu o pondola oku sokisiwa la Yehova?+
Helie pokati komãla va Suku+ o kasi nda Yehova?
7 Suku o sumbiwa vohongele yolosandu;+Eye unene kuenda o komõhisa ku vosi vo ñuala.+
8 A Yehova Suku ukualohoka,Helie ukuonene ndove, A Yehova?+
Ocili cove ca ku ñuala.+
9 Ove o lavulula okalunga ka tema;+Eci akimba ao a tumõha, ove o a tulumũla.+
10 Ove wa nyanyõla Rahava+ ndeci omunu umue a pondiwa.+
Lokuokuo kuove kua pama, wa sandola ovanyãli vove.+
11 Ovailu ove kuenda ilu lieve liove;+Osi leci ceyukamo,+ ove wa vi seveta.
12 Onano kuenda ombuelo ove wa vi lulika;Omunda Tavore+ Lomunda Herimone,+ vi sivaya onduko yove lesanju.
13 Okuokuo kuove kua pama;+Eka liove li kuete ongusu;+Eka liove liondio li kemãlisiwa.+
14 Esunguluko kuenda esunga, ovio ociseveto cocalo cove;+Ocisola ka ci pongoloka kuenda ekolelo vi tãi kovaso yove.+
15 Va sumũlũha omanu va kũlĩha oku kaluka kuonjolela.+
A Yehova, ovo va endela vocinyi cocipala cove.
16 Va sanjukila vonduko yove eteke liosi,Kuenda va kemãlisiwa vesunga liove.
17 Momo ove wulamba wongusu yavo,+Kuenda omo lioku taviwa love, ongusu* yetu yi kemãlisiwa.+
18 Momo ociyepelo cetu ca tiamẽla ku Yehova,Soma yetu wa tiamẽla Ku o Kola wa Isareli.+
19 Kotembo yaco, ove wa vanguila vocinjonde ku vana va ku kolela hati:
“Ame nda eca ongusu ku una wa pama;+Nda kemãlisa una nda nõla pokati komanu.+
20 Nda sanga Daviti ukuenje wange;+Ndo waveka lulela wange u kola.+
21 Eka liange li ko kuatisa,+Kuenda okuokuo kuange ku ko pamisa.
22 Laumue unyãli o ko kisika oku feta ulambu,Kuenda laumue omunu ondingaĩvi o ko talisa ohali.+
23 Ndi ka nyanyõla ovanyãli vaye kovaso aye+Kuenda ndi ka kundula vana vo nyãle.+
24 Ocili cange kuenda ocisola cange ka ci pongoloka vi kasi laye,+Kuenda vonduko yange, ongusu* yaye yi ka kemãlisiwa.
25 Ndi ka kapa eka liaye kilu liokalungaKuenda eka liaye liondio kilu liolondui.+
26 Eye o ka ndi tukula hati: ‘Ove wu Isiange,Wu Suku yange kuenda Wuhanda yepopelo liange.’+
27 Kuenje ame ndu ko lingisa uveli,+Omunu wa velapo pokati kolosoma vio kilu lieve.+
28 Ndi ka lekisa kokuaye ocisola cange ka ci pongoloka otembo ka yi pui,+Kuenda ocisila nda linga laye lalimue eteke ci ka pua.+
29 Ndi ka tumbika ocitumbulukila* caye otembo ka yi puiKuenda ndi ka lingisa okuti ocalo caye, ci kala otembo yalua ndovailu.+
30 Nda omãla vaye va siapo ocihandeleko cangeKuenda ka va endele ndomo ci likuata lasombiso ange,
31 Nda ovo va sinĩla oviholo viangeKuenda ka va kapeleko ovihandeleko viange,
32 Ndi ka yambula esino liavo lombueti+Kuenda okulueya kuavo loluhava.
33 Pole, ame lalimue eteke ndi ka siapo ocisola cange ka ci pongoloka ndu kuetele+Ndaño oku siapo esunga liange.*
34 Si ka sinĩla ocisila cange+Ale oku pongolola eci omẽla wange wa popia.+
35 Nda lisila voku kola kuange vonjanja yimosi otembo ka yi pui;Si ka vangula ovohembi ku Daviti.+
36 Ocitumbulukila* caye ci ka kala otembo ka yi pui;+Ocalo caye lalimue eteke ci ka kuata esulilo ndekumbi kovaso ange.+
37 Oco ci ka tumbikiwa loku pama otembo ka yi pui ndosãi,Ndombangi ya koleliwa kovailu.” (Sela)
38 Pole, ove muẽle wo yanduluka kuenda wo likala;+Ove wa tema lombuavekua yove.
39 Ove wa likala ocisila wa linga lukuenje wove;Wa vĩhisa ekolowa liaye poku limba posi.
40 Wa kupula ovimbaka viaye viosi viovawe;*Oviteyuilo viaye ove wa vi lingisa alunda.
41 Vosi vana va pita, vo punda;Eye o pembuiwa lava va lisungue laye.+
42 Ove wa eca eyulo kovanyãli vaye;*+Wa kokela ovanyãli vaye vosi oku sanjuka.
43 Ove wa tiulavo konyima osipata yaye,Kuenda kuo kuatisile kuyaki.
44 Ove wa sulisa ulamba wayeKuenda ocalo caye wa ci kupuila posi.
45 Ove wa tepulula oloneke viutila waye;Wo walisa losõi. (Sela)
46 A Yehova, toke otembo yipi o ka li salamisa? Otembo ka yi pui?+
Anga hẽ onyeño yove yi kamamako oku taima ndondalu?
47 Ivaluka ndomo omuenyo wange umbumbulu!+
Anga hẽ wa lulika omanu vosi elivova?
48 Omunu upi o pondola oku kala lomuenyo kuenje lalimue eteke a mola olofa?+
Anga hẽ eye o tẽla oku lipopela eye muẽle kunene Wonjembo?* (Sela)
49 A Yehova, ovilinga viove viosimbu viocisola ka ci pongoloka, vi kasi piVina wa lisila la Daviti vocili cove?+
50 A Yehova, ivaluka asepu a lingiwa kakuenje vove;Ndomo ndi sukila oku ambata* asepu omanu vosi;
51 Ndomo ovanyãli vove va imba asepu, A Yehova;Ndomo ombuavekua yove ya sepuiwa lavo kuosi yenda.
52 Yehova a sivayiwe otembo ka yi pui. Amene kuenda Amene.+
Atosi Pombuelo
^ Tala Elomboluilo.
^ Ale “ci ka kala.”
^ Lit., “ombuto.”
^ Lit., “ombinga.”
^ Lit., “ombinga.”
^ Lit., “ombuto.”
^ Lit., “Ndaño oku kala ukuesanda lesunga liange.”
^ Lit., “ombuto.”
^ Ale “ovivundilo viaye viovawe.”
^ Lit., “wa votola eka liondio liovanyãli vaye.”
^ Okuti, ocitumãlo mu kendiwa omanu va fa.
^ Lit., “oku ambata vonete.”
