Olosamo 52:1-9
Kusongui wolonjimbi. Masikili.* Osamo ya Daviti eci Doege u Edome eya kuenda wa sapuila Saulu okuti Daviti weyile konjo ya Ahimeleke.+
52 Momo lie o lipandela omo liovilinga viove vĩvi, ove angangala?+
Ocisola ka ci pongoloka ca Suku, ci kala otembo yosi.+
2 Elimi liove lia tua ndomoko,+Li sokiya oku linga eci cĩvi kuenda ovopange elimbi.+
3 Ove o sole vali evĩho okuti eci ciwa ci sule,Ove o kemba calua okuti oku vangula eci ca sunguluka ci sule. (Sela)
4 Ove o pondola oku kemba calua lelimi liove!
Ove o sole olondaka viosi vi pondola oku valula vakuene.
5 Eli olio esunga lieci Suku a ka ku nyõlela otembo ka yi pui;+Eye o ka ku kuata kuenda o ka ku tundisa vombalaka yove;+Eye o ka ku tukũla vofeka yava va kasi lomuenyo.+ (Sela)
6 Vakuesunga va ka ci mola kuenje va ka komõha,+Kuenda va ka ku yola vati:+
7 “Tala, u eye omunu okuti ka lingile Suku ocitililo* caye,+Pole, wa kolela kovokuasi aye alua+Kuenda wa kolela kasokiyo aye ãvi.”*
8 Pole, ndi ka kala nduti woliveira wa pulika vonjo ya Suku;Ekolelo liange li kala vocisola ka ci pongoloka ca Suku+ otembo ka yi pui.
9 Ndi ka ku sivaya otembo ka yi pui omo liovopange wa linga;+Kovaso ya vana va ku kolela,Ñuata elavoko vonduko yove,+ momo oyo yiwa.
