Esapulo liwa lia Marko 9:1-50

SIKA

Oku pongoluiwa kua Yesu (1-13)
Kakuenje wa kuatiwile londele o sakuiwa (14-29)
- Ku una o kuete ekolelo, ovina viosi vi tẽliwa (23)
Oku fa kua Yesu ku sapuiwa vali (30-32)
Olondonge vi lihoya nda helie wa velapo (33-37)
Wosi o tamalãla letu o kasi letu (38-41)
Ovawe ocilondokua (42-48)
“Kali lomongua vokati kene” (49, 50)

9 Handi vali, Yesu wa va sapuila hati: “Ocili, ndu sapuili siti, pokati kene vamue ka va ka fa osimbu ka va muile Usoma wa Suku oku iya lunene.”+ ² Noke yoloneke epandu, Yesu wambata Petulu, la Tiago kuenda Yoano kuenje wa lamana lavo kulika komunda yimue ya lepa calua. Kuenje wa pongoluiwa kovaso yavo;+ ³ uwalo waye wa kala oku nina okuti, kilu lieve lomue ukuakusukula ovowalo o tẽla oku u yelisa ndoco. ⁴ Kuenje Eliya la Mose va molẽhelavo kokuavo, yu va kala oku sapela la Yesu. ⁵ Noke Petulu wa sapuila Yesu hati: “A Rambei, kokuetu ciwa oku kala kulo. Nda citava tu tunga olosinge vitatu, yimue yove, yimue ya Mose, yikuavo ya Eliya.” ⁶ Petulu ka kũlĩhĩle eci a popia, momo ovo va kala lusumba walua. ⁷ Kuenje kua molẽha elende limue lia va sitika kuenda velende mua tunda ondaka+ yiti: “U Omõlange wa soliwa.+ U yeveleli.”+ ⁸ Vocipikipiki va vanja kolonele kuenje va mola okuti lomue vali wa kala lavo, te lika Yesu. ⁹ Osimbu va kala oku loka komunda, eye wa va handeleka lutõi oco ka va ka sapuileko omunu umue eci va mola,+ toke eci Mõlomunu a pinduiwa kolofa.+ ¹⁰ Ovo va kapako ondaka yaco,* pole, va kala oku lihoyisa pokati catiamẽla kueci eye a yonguile oku popia lepinduko liava va fa. ¹¹ Kuenje olondonge via fetika oku u pula vati: “Momo lie vakuavisonehua va popela vati, Eliya+ te eye iya tete?”+ ¹² Wa va kumbulula hati: “Ocili, Eliya iya kuenda o ka tumbulula ovina viosi;+ oco hẽ momo lie ca sonehiwila catiamẽla ku Mõlomunu okuti, o sukila oku talisiwa ohali yalua+ kuenda oku tatiwa lesepu?+ ¹³ Pole, ndu sapuili siti, Eliya+ weya ale, puãi va linga laye ovina viosi va panga, ndomo ca sonehiwa catiamẽla kokuaye.”+ ¹⁴ Eci va pitĩla kolondonge vikuavo, va limbuka okuti owiñi walua wa va ñuala kuenda vakuavisonehua va kala oku lihoyisa lavo.+ ¹⁵ Pole, eci owiñi wosi wo mola, va komõha kuenje va lupukila kokuaye oco vo lame. ¹⁶ Omo liaco, eye wa va pula hati: “Nye vu kasi oku lihoyisa lavo?” ¹⁷ Kuenje umue wa kala pokati kowiñi wo tambulula hati: “Olongisi, nda nena omõlange kokuove, momo o kuetiwe lespiritu liu lingisa ocitende.+ ¹⁸ Kuosi espiritu liaco liu kuata, liu wimba posi, vomẽla mu tunda efelefele, o likeleketa ovayo kuenda ka kuata ongusu. Nda pinga kolondonge viove oco va tundise ondele yaco, pole, ka va tẽlele oku ci linga.” ¹⁹ Yesu wa va sapuila hati: “Acitumbulukila ca kamba ekolelo,+ toke otembo yipi ñala lene? Toke pi ndi pandikisa lene? U neni kokuange.”+ ²⁰ Vo nenela kakuenje kaco kuenje eci espiritu lia mola Yesu lia fetika oku tanyisa okamõla. Noke yoku kupukila posi, wa tiñoloha loku tunda efelefele vomẽla. ²¹ Noke wa pula isiaco hati: “Eye o kasi laco tunde otembo yipi?” Eye hati: “Tunde vutila, ²² pamue yu wimba vondalu ale vovava, oco yu ponde. Pole, nda ove wa panga, tu kuatele ohenda kuenda tu kuatise.” ²³ Yesu wo sapuila hati: “Wa popia hoti, ‘Nda wa panga’! Ku una o kuete ekolelo ovina viosi vi tẽliwa.”+ ²⁴ Vonjanja yaco, haico isia yomõla a kaluka lolukandi hati: “Ñuete ekolelo! Nda nda kamba ekolelo ñuatise!”+ ²⁵ Yesu eci a mola okuti owiñi wa kala oku lupukila kokuavo, wa lemẽla espiritu lĩvi loku yi sapuila hati: “Aspiritu li lingisa omunu ocitende locisitatũi, hu handeleka siti, tunda vokuaye kuenda ku ka iñile vali vokuaye!”+ ²⁶ Noke yoku kaluka loku u tanyisa calua, espiritu lio tunda kuenda okamõla kambuka kuenje omanu va popia vati: “Eye wa fa!” ²⁷ Pole, Yesu wo kuata peka loku u votola kuenje eye wa talama. ²⁸ Eci va iñila vonjo yimue, olondonge viaye vio pula pokolika viti: “Momo lie ka tua tẽlelele oku yi tundisa?”+ ²⁹ Eye wa va tambulula hati: “Espiritu eli li tunda lika lohutililo.” ³⁰ Ovo va tundako, va enda ko Galilea, pole, eye ka yonguile okuti umue o kũlĩha eci eye a linga. ³¹ Momo Yesu wa kala oku longisa olondonge viaye loku vi sapuila hati: “Mõlomunu o laika oku pakuiwa peka liomanu kuenda va ko ponda,+ pole, ndaño o pondiwa, keteke liatatu o ka pinduiwa.”*+ ³² Puãi ovo ka va kuatele elomboloko lieci eye a popia kuenje va kala lohele yoku u pula. ³³ Noke va pitĩla vo Kafarinau. Eci va iñila vonjo, eye wa va pula hati: “Nye wa kali oku lihoyisa vonjila?”+ ³⁴ Vosi võha, momo vonjila va kala oku lihoyisa nda pokati kavo helie wa velapo. ³⁵ Eye wa tumãla, yu wa vilikiya olondonge Ekũi la Vivali loku vi sapuila hati: “Nda umue o yongola oku velapo, o sukila oku likapa kutito kuenda oku vumba vosi.”+ ³⁶ Kuenje wa kuata okamõla wa ka talamisa pokati kavo; yu wo kuata kapepe loku va sapuila hati: ³⁷ “Wosi o yekisa umue pokati komãla+ ava vonduko yange, o njekisavo ame; kuenda wosi o njekisa, ka njekisa lika ame, o yekisavo Una wa numa.”+ ³⁸ Yoano wo sapuila hati: “Olongisi, tua mola omunu umue wa kala oku tundisa olondele vonduko yove kuenda tua yonguile oku u tateka, momo ka endaenda letu.”+ ³⁹ Yesu wa popia hati: “Ku ko tateki, momo ka kuli omunu o linga ovilimbu vonduko yange okuti lonjanga yalua o tẽla oku popia cimue cĩvi catiamẽla kokuange. ⁴⁰ Momo wosi ka tamalãla letu, o kasi letu.+ ⁴¹ Wosi eca kokuene okopo yovava oco vu yi nyue omo wa tiamẽli ku Kristu,+ ndu sapuili siti, eye ka ka pumba onima yaye.+ ⁴² Pole, una o kapela ocilondokua umue pokati kava vatito okuti va ñolela, hĩse nda wa kapiwile ewe liombambo posingo yaye lina li ñualisiwa locimbulu, loku imbiwa vokalunga.+ ⁴³ “Nda eka liove li ku kokela ocilondokua, li tetako. Ca velapo kokuove oku tambula omuenyo lulema, oku imbiwa lovaka avali Vongehena* okuti vondalu ka imi, hacoko.+ ⁴⁴ * —— ⁴⁵ Nda omãhi yove yu ku kokela ocilondokua, yi tetako. Ca velapo kokuove oku tambula omuenyo lulema, oku nyõleha Vongehena* lolomãhi vivali, hacoko.+ ⁴⁶ * —— ⁴⁷ Kuenda nda iso liove li ku kokela ocilondokua, li tofolamo.+ Ca velapo kokuove oku iñila Vusoma wa Suku liso limosi okuti, oku imbiwa Vongehena* lovaso avali hacoko,+ ⁴⁸ muna okuti enyo ka li fi kuenda ondalu yaco ka imi.+ ⁴⁹ “Momo omanu vosi va sukila oku singiwa lomongua u kasi ndondalu.+ ⁵⁰ Omongua uwa, pole, nda omongua wa sava, vu u savulula la nye?+ Kali lomongua vokati kene,+ loku amamako oku likuatela ombembua omunu lukuavo.”+