Esapulo liwa lia Luka 3:1-38
3 Kunyamo wekũi latãlo wuviali wa Kaisare Tiberio, eci Pondiu Pilato a kala onguluvulu yo ko Yudea kuenda Herode*+ wa vialele ovivanja vio ko Galilea kuenje manjaye Filipu wa vialele kolofeka vio Iturea lo Trakoniti kuenda Lusanio wa vialele ovivanja vio ko Avilene,
2 koloneke viocitunda ca velapo Anasi kuenda Kayafa,+ ondaka ya Suku yeya ku Yoano+ omõla a Sakariya wa kala vekalasoko.+
3 Eye wa enda kovaimbo osi a kala ocipepi lo Yordão oku kunda epapatiso ndondimbukiso yoku likekembela akandu loku ecelua,+
4 ndeci ca sonehiwile velivulu liolondaka viuprofeto Isaya hati: “Ondaka ya umue yi kasi oku kalukila vekalasoko yiti: ‘Pongiyi onjila ya Yehova!* Suñamisi elila liaye.+
5 Ovimbota viosi vi yukisiwe, olomunda loviwulu via lepa vi tapike, olonjila via penga vi miũhe kuenda akungu a linge atapi;
6 kuenje omanu vosi va ka mola eyovo lia Suku.’”*+
7 Kuenje Yoano wa fetika oku sapuila owiñi weya kokuaye oku papatisiwa hati: “Ambuto yolombuta, helie wo sapuili okuti vu puluka konyeño yi laika oku iya?+
8 Omo liaco, imi apako o kuatisi oku likekembela. Ko ka fetiki oku popia kokuene muẽle hoti, ‘Tu kuete Avirahama nda isietu.’ Momo ndu sapuili siti, Suku o pondola oku votuila Avirahama omãla oku upisa kovawe a-a.
9 Ocili, ondiaviti yi kasi ale kolombombo vioviti. Uti wosi ka wimi apako awa, u tetiwa kuenje wimbiwa vondalu.”+
10 Kuenje owiñi wa kala oku u pula hati: “Oco hẽ, nye tu sukila oku linga?”
11 Wa va tambulula hati: “Omunu wosi o kuete ovowalo avali,* a litepele la una ka kuete kuenda una o kuete cimue coku lia a lingevo cimuamue.”+
12 Vakuakutambula elisimu veyavo oku papatisiwa+ kuenda vo pula vati: “Olongisi, nye tu sukila oku linga?”
13 Eye wa va tambulula hati: “Kelisimu lia kisikiwa ko ka vokiyiko.”*+
14 Vana va kala kupange wusualali lavovo vo pulisa vati: “Oco hẽ, nye tu sukila oku linga?” Wa va tambulula hati: “Ko ka sakalaisi* laumue ale oku u lundila lelimbi,+ pole, sanjukili ovina vu tambula.”*
15 Osimbu omanu va kala oku lavoka Kristu, vosi yavo va fetika oku lipula vovitima viavo catiamẽla ku Yoano vati: “Anga u eye Kristu?”+
16 Yoano wa va tambulula loku popia hati: “Catiamẽla kokuange, ame ndi vu papatisi lovava, pole, kuiya una wa mbelapo okuti ame ndi sule kuenda si sesamẽla oku kutulula ovikolo violohaku viaye.+ Eye o ko papatisi lespiritu sandu kuenda londalu.+
17 Ocipekulo caye ci kasi peka liaye oco a yelise ciwa ocimbandi caye, loku ongolola otiliku vosila yaye, pole, ovinene o ka vi timĩha londalu yina okuti ka yimiwa.”
18 Yoano wa ecavo olonumbi vialua vikuavo kuenda wamamako oku kundila omanu olondaka viwa.
19 Pole, Herode ombiali yocivanja co Galilea, omo okuti Yoano wo lemẽlele catiamẽla ku Herodiya ukãi wa manjaye leci catiamẽla kovilinga viosi vĩvi Herode a linga,
20 kovilinga viaco viosi wa vokiyako vali eci: Eye wa kapa Yoano vokayike.+
21 Eci omanu vosi va papatisiwa, Yesu wa papatisiwavo.+ Osimbu eye a kala oku likutilila ilu lia yuluka,+
22 kuenje espiritu sandu lia lokila kokuaye ndopomba kuenda kilu kua tunda ondaka yiti: “Ove Wumõlange wa soliwa; nda ku sanjukila.”+
23 Eci Yesu+ a fetika upange waye woku kunda wa kuata 30 kanyamo,+ ndeci va enda oku sima okuti,omõla a Yosefe,+omõla a Heli,
24 omõla a Matate,omõla a Lewi,omõla a Meleki,omõla a Yanai,omõla a Yosefe,
25 omõla a Matatiya,omõla a Amosi,omõla a Nahumi,omõla a Eselei,omõla a Negai,
26 omõla a Mata,omõla a Matatiya,omõla a Semeni,omõla a Yoseke,omõla a Yoda,
27 omõla a Yoanano,omõla a Resa,omõla a Seruvavele,+omõla a Sialitiyele,+omõla a Neri,
28 omõla a Meleki,omõla a Andi,omõla a Kosama,omõla a Elimadame,omõla a Ere,
29 omõla a Yesu,omõla a Eliyesere,omõla a Yorimi,omõla a Matate,omõla a Lewi,
30 omõla a Sumone,omõla a Yuda,omõla a Yosefe,omõla a Yonama,omõla a Eliakimi,
31 omõla a Melea,omõla a Mena,omõla a Matata,omõla a Natana,+omõla a Daviti,+
32 omõla a Jese,+omõla a Ovede,+omõla a Boasi,+omõla a Salimone,+omõla a Nasone,+
33 omõla a Aminadava,omõla a Arneyi,omõla a Hesirone,omõla a Peresi,+omõla a Yuda,+
34 omõla a Yakoba,+omõla a Isake,+omõla a Avirahama,+omõla a Terahi,+omõla a Nahore,+
35 omõla a Seruki,+omõla a Reu,+omõla a Peleke,+omõla a Evere,+omõla a Sela,+
36 omõla a Kainana,omõla a Aripasade,+omõla a Semi,+omõla a Noha,+omõla a Lameke,+
37 omõla a Metusele,+omõla a Enoke,omõla a Yarede,+omõla a Mahalaleli,+omõla a Kainana,+
38 omõla a Enosi,+omõla a Seti,+omõla a Adama,+omõla a Suku.
Atosi Pombuelo
^ Okuti Herode Antipasi. Tala Elomboluilo.
^ Tala Alombo. A5.
^ Ale “ndomo Suku a ka popela.”
^ Ale “uwalo ukuavo.”
^ Ale “oku kongola.”
^ Ale “oku punda.”
^ Ale “ofeto.”
