Isaya 62:1-12
-
Onduko yokaliye yo Siono (1-12)
62 Omo lio Siono, si kamamako oku ũha,+Kuenda omo lio Yerusalãi si ka puyuka
Toke eci esunga liayo li nina ndocinyi calua+
Kuenda epopelo liayo li ka taima ndocitonga.+
2 “Olofeka vi ka mola esunga liove, A Yerusalãi,*+
Kuenda olosoma viosi vi ka mola ulamba wove.+
Kuenje ove o ka tukuiwa londuko yokaliye,+Yina Yehova a ka nõla eye muẽle.
3 Ove o ka linga ekolowa limue lia fina peka lia Yehova,Ekofue limue liolosoma peka lia Suku yove.
4 Ove lalimue eteke o ka tukuiwa vali okuti, ukãi wa yandulukiwa.+
Kuenda ofeka yove lalimue eteke yi ka tukuiwa vali yupolokoso.+
Pole, ove o ka tukuiwa okuti, Esanju Liange li Kasi Vokuayo,+Kuenje ofeka yove yi ka tukuiwa okuti ukãi ohueli.
Momo Yehova o ka ku sanjukila,Kuenda ofeka yove yi ka kala ndukãi ohueli.
5 Momo ndeci ukuenje a likuela lufeko wosombo,Omãla vove valume va ka likuela love.
Suku yove o ka ku sanjukila,Ndeci sandombua a sanjukila ndombua.+
6 Nda kapa olondavululi kovimbaka viove, A Yerusalãi.
Ovio lalimue eteke vi ũha ci kaile kutanya ale kuteke.
Ene vu popia eci catiamẽla ku Yehova,Ko ka puyuki,
7 Kuenda ku ko wĩhi epuyuko toke eci a tumbulula o Yerusalãi,Ocili, toke eci eye a yi lingisa okuti omanu vosi kilu lieve va yi sivaya.”+
8 Yehova wa linga ocisila cimue leka liaye liondio, leka liaye lia pama cokuti:
“Si ka eca vali olomema viove ndokulia kovanyãli vove,Ndaño ovingendeleyi ka vi ka nyua vali kovinyu yove yokaliye, yina ove wa talavaya calua.+
9 Pole, vana va kongolola olomema viaco, va ka liako kuenda va ka sivaya Yehova;Kuenje vana vongolola ayuva va ka nyuila ovinyu yaco kovitali viange vi kola.”+
10 Piti, piti polombundi.
Yelisi onjila yomanu.+
Pangi, pangi etapalo.
Upimo ovawe.+
Kapimo ondimbukiso* yimue yomanu.+
11 Tali! Yehova wa sandeka toke kasulilo o kilu lieve hati:
“Sapuili omõla ukãi a Siono hati:
‘Tala! Eyovo liove li kasi oku iya.+
Tala! Onima yaye yi kasi laye,Kuenda ofeto eye a eca, yi kasi kovaso aye.’”+
12 Ovo va ka tukuiwa okuti omanu va kola, vana va yovuiwa la Yehova,+Kuenda ove o ka tukuiwa hati, Olupale lumue Suku a Sandiliya okuti, Olupale ka Lua Yandulukiwile.+
