Isaya 40:1-31
40 “Lembeleki, lembeleki omanu vange,” oco ca popia Suku yene.+
2 “Vanguli lelembeleko ko Yerusalãi,Kuenda imbi owanji kokuayo wokuti, oyo ya tẽlisa ale upange wayo wekisika,Okuti eko liayo lia fetiwa.+
Oyo ya tambula ekangiso peka lia Yehova omo liakandu ayo osi.”+
3 Ondaka ya umue, yi kasi oku kalukila vekalasoko yiti:
“Pongiyi onjila ya Yehova!+
Lingi vekalasoko onjila yimue+ ya suñama yi loña ku Suku yetu.+
4 Ovimbota viosi vi votuiwe,Olomunda viosi kuenda oviwulu vi suñame.
Osi ya vongoka yi ka tapika,Kuenda osi yakungu yi ka linga ocimbota co vetapi.+
5 Ulamba wa Yehova u ka situluiwa,+Kuenda omanu vosi va ka u mola.+
Momo omẽla wa Yehova owo wa ci popia.”
6 Yevelela! Umue o kasi oku vangula hati: “Sapula!”
Ukuavo o pula hati: “Nye ndi sukila oku sapula?”
“Omanu vosi va kasi ndowangu.
Ocisola cavo ka ci pongoloka, cosi ca soka ndolonelẽho vio vusenge.+
7 Owangu utalala u kukuta,Onelẽho yuwuka,+Momo espiritu lia Yehova li pita kokuayo.+
Ocili okuti, omanu va kasi ndowangu utalala.
8 Owangu utalala u kukuta,Onelẽho yuwuka,Pole, ondaka ya Suku yetu yamamako otembo ka yi pui.”+
9 Londa komunda yimue ya lepa,Okãi o nena olondaka viwa ko Siono.+
Vokiya ondaka yove longusu.
Okãi o nena olondaka viwa ko Yerusalãi.
Yi vokiya, ku ka kuate usumba.
Imba oluiya kalupale o ko Yuda luokuti: “Suku yene o kasi kulo.”+
10 Tali! Ñala Tõlo Yehova o keya lunene,Kuenda okuokuo kuaye ku ka viala,+Tali! Onima yaye yi kasi laye,Kuenda ofeto eye a eca yi kasi kovaso aye.+
11 Eye o ka tata* ocunda caye ndungombo umue.+
Lokuokuo kuaye o ka kongela pamosi olomeme,Kuenda o ka vi ambatela ponete yaye.
Eye o ka songuila lohenda olomeme vina vi nyãmisa omãla viavio.+
12 Helie wa yonga ovava osi o vokalunga leka liaye+Kuenda wa seteka olonjongo viovailu lepaluma lieka* liaye?
Helie wa kongela vonjongo yimue oneketela yo kilu lieve+Ale wa pesalisa olomunda kolombalãsaKuenda oviwulu kolombalãsa?
13 Helie wa yonga * espiritu lia Yehova,Kuenda helie o pondola oku u longisa ndondunguli yaye?+
14 Kulie eye a kũlĩhĩsa oco a kuate elomboloko,Ale helie u longisa olonjila viesunga,Ale oku u longisa ukũlĩhĩso,Loku lekisa kokuaye onjila yelomboloko liocili?+
15 Tali! Olofeka vi kasi ndetosi limue vociyenjo,Kuenda ovio vi sokisiwa ndoneketela kombalãsa.+
Tali! Eye o votola ovifuka ndoneketela.
16 Ndaño muẽle oviti vio ko Levanone ka vi tẽla oku ecelela okuti ondalu yamamako oku taima,*Kuenda ovinyama viaco viovusenge, ka vi tẽla oco vi linge ocilumba coku pia elisi.
17 Olofeka viosi kovaso aye hacimueko;+Eye o vi tenda ndocina cimue caño, ka ci kuete esilivilo.+
18 Ene vu pondola oku sokisa Suku lelie?+
Vu pondola oku popia okuti eye wa li setahãla la nye?+
19 Omesele yi panga ociñumañuma,Ukuakutela utale o ci laña lulu,+Kuenda eye o tela alienge opalata.
20 Eye o ñola uti umue oco u kaile ombanjaile yaye,+Uti umue okuti ka u voli.
Eye o sandiliya omesele yimue ya loñolohaOco yi pongiye ociñumañuma cimue ca songiwa okuti ka ci kupuka.+
21 Anga hẽ ene ka wa ci kũlĩhĩli?
Ene ka wa ci yeveli?
Ka ca sapuiwile hẽ kokuene tunde kefetikilo?
Ka wa kuateli hẽ elomboloko tunde koviseveto viongongo?+
22 Kuli umue wa tunga kilu liombunje yongongo,+Kuenda olonungi vialio vi kasi ndakundumba.
Eye o nyanyumũla ovailu ndonanga yimue ya lela,Kuenda eye o vi nyanyumũla ndombalaka yoku kalamo.+
23 Eye una o tundisa vakesongo va velapoKuenda olonganji* vio kilu lieve o vi lingisa ndocina cimue ka ci kuete esilivilo.
24 Ovio ka via kũlĩwile ciwa,Ka via wayiwile ciwa,Osongo yavio ka ya ecele olumbombo walio posi,Kuenda ofela yimue yi vi pepelela kuenje vi kukutaKuenda ofela yi vi ambata ndovinene.+
25 “Vu yongola oku ndi sokisa lelie okuti wa li setahãla lame?” oco Una o Kola a popia.
26 “Petuili ovaso ene kilu kuenda vanji.
Helie wa lulika olombungululu viosi?+
Una o vi songuila ndolohoka, poku vi tenda lumosi, lumosi;Eye o vi tukula viosi kolonduko.+
Omo liongusu yaye yalua kuenda unene waye wa piãla,+Laumue u kambapo.
27 Momo lie o popela hati, A Yakoba kuenda momo lie o popela hati, A Isareli,‘Yehova ka lete hẽ omuenyo wange,Kuenda si tambula hẽ esunga lia Suku’?+
28 Anga hẽ ove kua ci kũlĩhĩle? Anga hẽ kua ci yevele?
Yehova Ululiki wasulilo o kilu lieve, eye Suku otembo ka yi pui.+
Eye lalimue eteke a kava ale oku pua ongusu.+
Olondunge viaye ka vi konomuisiwa.*+
29 Eye eca unene ku una wa kavaKuenda eca ongusu ku una ka kuete ongusu.*+
30 Ndaño muẽle akuenje va ka kavaKuenda alume amalẽhe va ka lilondoka loku kupuka,
31 Pole, vana va lavoka ku Yehova, va ka kuata vali ongusu.
Va ka palãla kupãla ndolongonga.+
Va ka lupuka kuenje ka va kavi;Va ka enda kuenje ka va kavi.”+
Atosi Pombuelo
^ Ale “o ka lava.”
^ Ocinãla ci kasi pokati komuine unene kuenda omuine utito eci eka li oluĩwa. Tala Alombo. B14.
^ Ale pamue, “wa kuata elomboloko.”
^ Ale “ka yi pondola oku eca olohũi vi tẽla.”
^ Ale “olombiali.”
^ Ale “ka citava oku kuata elomboloko.”
^ Ale “ongusu yalua.”
