Efetikilo 16:1-16
-
Hagare la Isameli (1-16)
16 Sarai ukãi wa Avirama ko citilile omãla,+ pole, eye wa kuata upika umue ukãi u Egito okuti onduko yaye Hagare.+
2 Sarai wa sapuila Avirama hati: “Yehova ka nyĩhile uyali. Lipekela lupika wange. Pamue ndi muila omãla vokuaye.”+ Avirama wa tava kueci Sarai a popia.
3 Avirama noke yoku kala vofeka yo Kanana anyamo ekũi, Sarai ukãi wa Avirama wa eca upika waye Hagare u Egito, kulume waye Avirama oco a linge ukãi waye.
4 Avirama wa lipekela la Hagare kuenje wemina. Eci a limbuka okuti wemina, Hagare wa fetika oku pembula cime caye Sarai.
5 Noke Sarai wa sapuila Avirama hati: “Ove o kuete eko omo liesumuo liange. Ame nda eca upika wange kokuove, pole, eci a limbuka okuti wemina, wa fetika oku ndi pembula. Yehova a tetulule ocitangi caco pokati kange love.”
6 Avirama wa sapuila Sarai hati: “Ove o kuete omoko lupika wove. Linga laye eci ca ku sungulukila.” Noke Sarai wo sepula kuenje Hagare wa tila.
7 Noke ungelo wa Yehova wa sanga Hagare pono yovava vekalasoko, ono yaco yovava ya kala vonjila ya loña ko Siuri.+
8 Kuenje wo pula hati: “A Hagare, upika wa Sarai, o tundilila pi kuenda wa loña pi?” Hagare hati: “Ñasi oku tila cime cange Sarai.”
9 Ungelo wa Yehova wo sapuila hati: “Tiukila ku cime cove kuenda liketisa kokuaye.”
10 Ungelo wa Yehova hati: “Ndi ka luisa calua ocitumbulukila* cove kuenje oco ci ka livokiya calua okuti ka ci tendiwa.”+
11 Ungelo wa Yehova wamisako hati: “Ove wemina, noke o cita omõla ulume u luka Isameli,* momo Yehova wa yeva ohali yove.
12 Eye o ka tuwa ndocimbulu covusenge.* Noke eye o ka liyaka lomanu vosi kuenda omanu vosi va ka liyaka laye kuenje o ka tunga ocipepi la vamanjaye* vosi.”
13 Hagare wa sivaya onduko ya Yehova una wa sapela laye kuenda wa popia hati: “Ove wu Suku o lete ovina viosi,”*+ momo eye wa popele hati: “Anga hẽ nda mola muẽle una o ndete?”
14 Eli olio esunga lieci ocisimo caco ca tukuiwila okuti, Bere-lahai-roi.* (Ci kasi pokati ko Kadesi lo Berede.)
15 Kuenje Hagare wa citila Avirama omõla ulume kuenda omõlaco Hagare a cita, Avirama wo luka hati, Isameli.+
16 Eci Hagare a cita Isameli, Avirama wa kuata 86 kanyamo.
Atosi Pombuelo
^ Lit., “ombuto.”
^ Ci lomboloka “Suku o Yeva.”
^ Okuti, ombuto yimue yocimbulu covusenge, ndaño okuti vamue va sima okuti ongolongo. Pamue ondaka yaco yi lomboloka ocituwa coku litumĩla.
^ Ale pamue, “eye o ka kuatela ukuse vamanjaye vosi.”
^ Ale “una o ndete.”
^ Ci lomboloka “Ocisimo ca Una o Kasi Lomuenyo Okuti o Ndete.”
