Atendelo 24:1-25
24 Eci Baliame a limbuka okuti Yehova wa sanjukila* oku sumũlũisa Isareli, ka endele vali oku ka sandiliya owanji wovina vĩvi,+ pole, wa imba ovaso vekalasoko.
2 Eci Baliame a petula ovaso aye loku mola okuti Isareli wa tunga ndomo ci likuata lovikoti viaye,+ espiritu lia Suku lio wila.+
3 Eye wa ta olusapo olu hati:+
“Olondaka via Baliame omõla a Beore,Kuenda olondaka viulume umue wa patuluiwa ovaso,
4 Olondaka viomunu o yevelela ondaka ya Suku,Una wa mola ocinjonde Cukuonene Wosi,Haeye wa petamẽla posi lovaso aye a patuluiwa vievi:+
5 A Yakoba, olombalaka viove via fina calua,Kumue lolosinge viove a Isareli!+
6 Via sanjavala ndovimbota,*+Ndoviumbo vi kasi konele yolui,Ndocandala Yehova a kũla,Ndolosedru vi kasi konele yovava.
7 Ovava amamako oku supoka voviyenjo vialio vivali,Ombuto* yaco ya kũliwa ocipepi lovava alua.+
Soma yavo+ o ka velapo okuti, Agage o sule,+Kuenje usoma waye u ka kemanyiwa.+
8 Suku wo upa Kegito;Eye o kasi ndolombinga viongombe yovusenge kokuavo.
Eye o ka nyõla olofeka okuti, ovanyãli vaye,+Kuenda o ka takĩla akepa avo loku va nyõla lovisongo viaye.
9 Eye wa vutama, wa pekela ndohosi,Kuenje ndohosi, elie o lukuta oku yi pasula?
Vana va ku sumũlũisa va sumũlũisiwavo,Vana va ku siñala va siñaliwavo.”+
10 Noke onyeño ya Balaka ya wengukila Baliame. Kuenje Balaka wa pandula loku sepula Baliame poku popia hati: “Nda ku vilikiya oco o sinãle ovanyãli vange, kua ci lingile,+ pole, wa va sumũlũisa olonjanja evi vitatu.
11 Kaliye tiukila konjo lonjanga. Ame nda yonguile oku ku sumbila calua,+ pole, tala! Yehova wa ku tateka oku tambula esumbilo liaco.”
12 Baliame wa tambulula Balaka hati: “Siti nda sapuila ale kolomunga viove okuti,
13 ‘Ndaño Balaka wa nyĩhile onjo yaye yeyuka opalata lulu, nda sia lingile lacimue* ci lueya ocihandeleko ca Yehova, ci kaile eci ciwa ale ceci cĩvi. Siti ndi vangula lika olondaka Yehova a ndi sapuila’?+
14 Kaliye ndi tiukila komanu vange. Enju oco hu sapuile eci omanu ava va ka linga komanu vove kovaso yoloneke.”*
15 Eye wa ta olusapo olu hati:+
“Olondaka via Baliame omõla a Beore,Kuenda olondaka viulume wa patuluiwa ovaso,+
16 Olondaka viomunu o yevelela ondaka ya Suku,Una o kuete ukũlĩhĩso wa Fũ,Una wa mola ocinjonde Cukuonene Wosi,Poku kekama lovaso aye a patuluiwa:
17 Ame ndu ko mola, pole, haciloko;Ame ndu lavulula, pole, ka ci kala ndopo.
Ku Yakoba ku ka tunda olumbungululu lumue,+Kuenda ku Isareli+ ku ka tunda epangati limue.+
Kuenje eye o ka teya upolo wa Moavi*+Kuenda ekolõkõlo liosi liomãla venyõleho.
18 Kuenje o Edome yi linga ocipiñalo cimue,+Ocili, o Seire+ yi linga ocipiñalo covanyãli vaye,+
Osimbu Isareli a lekisa utõi waye.
19 Ku Yakoba ku ka tunda umue o ka viala,+Kuenje eye o ka nyõla vosi vana va puluka volupale.”
20 Eci a mola Amaleke, eye wamamako oku ta olusapo luaye hati:
“Amaleke eye wa kala ofeka yatete,+Pole, kesulilo o ka nyõliwa.”+
21 Eci a mola va Keni,+ wamisako lolusapo luaye hati:
“Ocitungilo cove ca koka kuenda onjo yove ya sevetiwa kesenje.
22 Pole, umue o ka timĩha Keni.*
Otembo yi pi Asuria a ka ku ambati kumandekua?”
23 Eye wamisako lolusapo luaye hati:
“Avoyo we! Helie o ka puluka eci Suku a ka linga ovina viaco?
24 Olonaviyu vi ka tunda kohulo yo ko Kitimi,+Kuenje ovio vi ka talisa ohali o Asuria,+Va ka talisa ohali Evere.
Pole, eye o ka nyõliwavo pe.”
25 Noke Baliame+ wa votoka, yu wa enda wa tiukila kocitumãlo caye. Balaka wa endavo lonjila yaye.
Atosi Pombuelo
^ Lit., “ca sunguluka kovaso aye.”
^ Ale “akango.”
^ Ale “ocitumbulukila.”
^ Lit., “ci tunda vutima wange.”
^ Ale “kesulilo lioloneke.”
^ Ale “olonembele viasongui va va Moavi.”
^ Lit., “Kaini.”
