Skip to content

Skip to table of contents

 ALOMBOLUILO A VOKIYIWAKO

Eteke Liekanga li—Lomboloka Nye?

Eteke Liekanga li—Lomboloka Nye?

VOVISIMĨLO viove Eteke Liekanga li ka kala ndati? Vamue va siata oku sima okuti olohuluwa viosi viomanu vi ka talama kovaso yocalo ca Suku. Kuenje omunu lomunu o ka sombisiwa la Suku. Ava okuti va linga eci ciwa, vak a tambula onima yoku iñila vofeka yelau kilu. Ava va linga eci cĩvi vaka enda kekangiso ka li pui. Pole, Embimbiliya hacoko li lilongisa. Olio li lekisa okuti, otembo yaco, ka yika kala otembo yoku luluma omo liusumba. Puãi, yika kala otembo yimue yelavoko kuenda yetumbuluko.

Kelivulu Liesituluilo 20:11, 12, tu tangako olondaka viupostolo Yoano viatiamẽla Keteke Liesombiso. Eye wa popia hati: “Nda mola ocalo cinene ci yela lu wa tumalako. Osi lilu via tila kovaso aye, lapa vi kala ka pa molehele. Nda molavo ava va fa, ava vanene lava vatito, va talama kovaso yocalo caco, kuenje alivulu a nyanyumuiwa. Lelivulu likuavo lia nyanyumuiwa, olio elivulu liomuenyo. Lava va fa va tetuluiwa lovina via sonehiwa valivulu, okuti lovilinga viavo.” Oco hẽ onganji yaco helie?

 Yehova Suku eye onganji ya velapo yomanu vosi. Pole, eye wa eca ocikele caco konganji yimue yikuavo. Kelivulu Liovilinga 17:31, upostolo Paulu wa lombolola okuti Suku “wa tukula eteke lioku tetuluila oluali lesunga, kuenje wa nola ale ulume o linga onganji yaco.” Onganji yaco Yesu Kristu. (Yoano 5:22) Otembo yipi hẽ Eteke Liekanga li fetika? Kuenda lika tumãla otembo yipi?

Elivulu Liesituluilo li lekisa okuti Eteke Liekanga li fetika noke yuyaki wo Harmagedo. Pana okuti Satana lolondingãivi viosi via nyõliwa ale. * (Esituluilo 16:14, 16; 19:19–20:3) Noke Satana lolondele viaye, vaka imbiwa vokayike. Kuenje vaka kalamo ohũlũkãi yanyamo. Votembo yaco, ava va soka 144.000 komanu, vaka kala olonganji kuenda vaka “viala kumue la Kristu vokuenda 1.000 kanyamo.” (Esituluilo 14:1-3; 20:1-4; Va Roma 8:17) Omo liaco, Eteke Liekanga, ka lika kala ño eteke limosi 24 kolowola. Lika tumãla eci ci soka ohũlũkãi yanyamo.

Vokuenda kuohũlũkãi yanyamo, Yesu Kristu oka “tetuluila ava va kasi lomuenyo lava va fa.” (2 Timoteo 4:1) “Ava va kasi lomuenyo” va tukuiwa ndeti, vana vatiamẽla ‘kowiñi wakahandangala’ uka puluka ko Harmagedo. (Esituluilo 7:9-17) Upostolo Yoano wa molavo okuti “ava va fa. . .va talama kovaso yocalo” cesombiso. Yesu wa likuminyile hati, ‘vosi va kasi vayambo onjivaluko va yeva ondaka ya Kristu, kuenje va tundamo.’ Eci ci lomboloka okuti vaka pinduiwa. (Yoano 5:28, 29; Ovilinga 24:15) Oco hẽ omanu vaco va ka sombisiwila ovilinga vipi?

Upostolo Yoano wa mola “alivulu a nyanyumuiwa.” Kuenje ava “va fa va tetuluiwa lovina via sonehiwa valivulu [aco], okuti lovilinga viavo.” (Esituluilo 20:12) Anga valivulu aco mua sonehiwa ovilinga omanu va linga kosimbu? Sio. Esombiso liaco ka lika tiamisiwila kueci omanu va linga kosimbu, cina okuti handi ka va file. Eci tua ci kũlĩha hẽ ndati? Embimbiliya li tu sapuila hati: “Omunu wosi wa fa wa yovuisua kakandu.” (Va Roma 6:7) Ava va fa, eci vaka pinduiwa, akandu avo ka aka ivalukiwa vali.  Alivulu a tukuiwa ndeti, ocindekaise covihandeleko vikuavo Suku aka eca. Ava vaka puluka ko Harmagedo lava vaka pinduiwa, oco va kale komuenyo otembo ka yi pui, vaka sukila oku pokola kovihandeleko via Suku oku kongelamo ovihandeleko viokaliye Yehova aka eca vokuenda kuohũlũkãi yanyamo. Omanu vaka sombisiwila ovilinga viavo vaka linga vokuenda Kueteke Liekanga.

Eteke Liekanga, lika eca kolohuluwa viomanu epuluvi lioku lilongisa ocipango ca Suku kuenda oku pokola kocipango caco. Eci ci lomboloka okuti ku ka kala upange woku longisa omanu vaco. Kuenje ‘olonungi viovoluali vika lilongisa esunga.’ (Isaya 26:9) Pole, havosiko vaka tava oku pokola kocipango ca Suku. Kelivulu lia Isaya 26:10, tu tangako hati: “Ndaño ondingaĩvi yi lingiwa ohenda, haimo ka yi lilongisa esunga; vofeka yesunga haimo yi lingainga cĩvi, kuenje ka yi mõli unene wa Yehova.” Vosi vaka linga eci cĩvi vaka pondiwa vokuenda Kueteke Liekanga.—Isaya 65:20.

Kesulilo Lieteke Liekanga, ava vaka supulukapo vaka ‘kuata omuenyo’ wa lipua. (Esituluilo 20:5) Eci ci lomboloka okuti vokuenda Kueteke Liekanga, ekalo liomanu lika tumbuluiwa ndeci lia kaile kefetikilo. Kuenje omanu vosi vaka lipua. (1 Va  Korindo 15:24-28) Noke omanu vaka nyikiwa onjanja ya sulako. Satana oka kutuluiwa. Kuenje oka kuata epuluvi lia sulako lioku seteka omanu. (Esituluilo 20:3, 7-10) Vosi vaka tamãlala laye, vaka mõla oku tẽlisiwa kuolondaka vi sangiwa Vembimbiliya via linga hati: “Olondingesunga vi piñala ofeka, vi tungamo oloneke ka vi pui.” (Osamo 37:29) Cosi eci ci lekisa okuti Eteke Liekanga lika kala esumũlũho limue linene komanu vosi vakuesunga.

^ tini. 6 Catiamẽla ko Harmagedo, tala elivulu Estudo Perspicaz das Escrituras, Volume 2, kemẽla 286-287 kuenda Volume 1, kemẽla 711-712. Kuenda elivulu Fendela Lika Suku Yocili, kocipama 20. Alivulu aco a sandekiwa Lolombangi via Yehova.