Skip to content

Olombangi Via Yehova

Select language Umbundu

AMALEHE VA PULA

Ndi Pondola Oku Liyaka Ndati Lasakalalo?

Ndi Pondola Oku Liyaka Ndati Lasakalalo?

 Nye ca siata oku ku kokela asakalalo?

Kũlĩhisa ovisimĩlo vikuaimo. Anga hẽ, wa siatavo oku kuata ovisimĩlo vimuamue?

“Si liwekapo oku sokolola: ‘Nda okuti ...? Nda nda pita locilunga cimue lekãlu?’ ‘ Nda ombalão tua endela ya kupuka?’ Asakalalo nda siata oku kuata, owo omanu vosi va siatavo oku kuata.”—Charles.

“Otembo yosi ndi kuete asakalalo. Ndekãlu limue lioku papala okuti ka li endi kocitumãlo cimue. Utue wange u ivailuka ovina vialua, pole ovina viaco ka vi kuete esilivilo!”—Anna.

“Olonjanja vimue, omanu veya kokuange loku popia hati: ‘Upa esilivilo kepuluvi o kuete lioku tanga kosikola.’ Pole, ovo ka va kũlĩhĩle esakalalo lioku tangela kosikola.’”—Daniel.

“Ndi yeva asakalalo alua okuti ombia yimue yo pressão yi sule. Olonjanja viosi nda sakalala lovina vi ka pita lame kuenda eci ndi sukila oku linga.”—Laura.

Ocili comuenyo: Tu kasi kotembo yimue Embimbiliya li tukula hati, “oloneke via sulako.” (2 Timoteo 3:1) Omo liaco, citava okuti amãlẽhe va kuatavo asakalalo ndeci akulu.

 Anga hẽ, civĩ oku kuata asakalalo?

Olonjanja vimue hacivĩko oku kuata asakalalo. Embimbiliya li popia okuti ca sunguluka oku sakalala oco tu sanjuisa omanu tu sole.—1 Va Korindo 7:32-34; 2 Va Korindo 11:28.

Ocili okuti, esakalalo evetiyo limue liwa. Sokolola oseteko o ka linga osemana yi keya. Nda wa sakalala omo lioseteko liaco, o ka fetika oku lilongisa osemana yilo, kuenje ci ka ku kuatisa oku litunda ciwa koseteko yaco!

Esakalalo ocina cimue ci pondolavo oku ku kuatisa oku limbuka olohele vimue. Umalẽhe umue o tukuiwa hati Serena wa popia ndoco: “Olonjanja vimue wa kũlĩha okuti o kasi oku linga cimue cĩvi, kuenje o fetika oku sakalala momo wa kũlĩha okuti o sukila oku linga a pongoloko. Nda kua ci lingile ku kuata ombembua.”—Tanga Tiago 5:14.

Ocili comuenyo: Esakalalo ocina cimue ciwa, nda cu ku vetiya oku linga ovina via sunguluka.

Pole, nye o sukila oku linga nda esakalalo li ku vetiya oku kuata ovisimĩlo ka via sungulukile?

Omo liasakalalo o sima okuti o kasi vonjila yimue ka ya sungulukile pole, omunu umue o pondola oku ku kuatisa oku sanga onjila ya sungululuka

Ocindekaise: Richard o kuete 19 kanyamo wa popia hati: “Nda ndi sokolola cimue ka ci kasi oku tunda ciwa, ndi sakalala calua poku sokolola onima yi yililako. Ndi sokolola ocina caco otembo yosi, kuenje ci ndi sakalaisa calua.”

Embimbimbiliya li popia okuti “utima nda wa tula etimba li kala ciwa.” (Olosapo 14:30) Esakalalo li pondola oku ku kokela uveyi ndeci evalo liutue, onjile, evalo vimo kuenda evalo liovutima.

Nye ci popiwa nda kokuove esakalolo ocina cimue ka ca sungulukile? Anga hẽ, kuli cimue o pondola oku linga?

 Ceci o sukila oku linga

  • Sokolola Ciwa nda asakalalo ove a kuete esilivilo. Oku sakalala locina cimue ca litepa loku sakalala calua. Oku sakalala calua locina cimue ca lisoka loku papalela komangu yimue ya kutiwa kuti. Omunu o pondola oku lisenga senga pole, lalimue eteke a kupuka”—Katherine.

    Embimbiliya li popia hati: “Helie pokati kene okuti omo lioku sakalala o tẽla oku vokiya ekukutu limosi komuenyo waye?” —Mateo 6:27.

    Ceci olondaka viaco vi lomboloka: Asakalalo a kuete lika esilivilo nda a ku kuatisa oku tetulula ocitangi cimue. Nda ka a ku kuatisa, li ka ku nenela vali ocitangi cimue.

  • Kũlĩha okuti eteke leteke kuli asakalalo alio. “Sokolola ciwa. Anga hẽ, ovina vi ku sakalaisa cilo ci ka kuata esilivilo hẽla?, ale osãi yi keya?, ulima wiya? ale vokuenda kuanyamo atãlo?”—Anthony

    Embimbiliya li popia hati: “Omo liaco, ko ka sakalali leteke likuavo, momo eteke liya li kuete esakalalo liayo. Eteke leteke li kuete ohali yalio.” —Mateo 6:34.

    Ceci olondaka viaco vi lomboloka. Ka ci kuete esilivilo oku sokolola kovitangi vi keya hẽla. Citava okuti vimue ka vi ya.

  • Tava kovina ku tẽla oku pongolola. “Ocina ciwa o sukila oku linga, oku lipongiyila kovitangi o pondola oku tetulula, pole, tava okuti ku ka kala ovitangi vimue okuti ku ka tẽla oku vi potolola.”—Robert.

    Embimbiliya li popia hati: “Okuyula koku litunda ka ku kasi kukualupesi ... ndaño omangu hayava valoñolõhãko, puãi cosi ciya ño ci veta ño.—Ukundi 9:11.”

    Ceci olondaka viaco vi lomboloka: Olonjanja vimue, ku ka tẽla oku pongolola ekalo, pole, o ka pongolola lika onjila ndomo o tenda ekalo liaco.

  • Tenda ovina lonjila yimue ya sunguluka. “Nda lilongisa oku kũlĩhisa ovina vi li pita lame kuenda si seteka oku sakalala calua lovina viaco. Cilo, nda kũlĩha okuti ndi sukila oku konomuisa ocina ci kuete esilivilo liavelapo kuenda oku pesela ongunsu yange kovina viaco.”—Alexis.

    Ceci Embimbiliya li popia: “Kũlĩha ovina via velapo.”—Va Filipoi 1:10.

    Ceci olondaka viaco vi lomboloka: Omunu una o tẽla oku kũlĩhisa asakalalo aye lonjila yimue ya sunguluka, ka sakalala calua lovitangi viaco.

  • Sapela lomunu umue. “Eci nda kala oku lilongisa vocisoko cepandu, poku tunda kosikola nda enda oku sakalala calua, kuenda nda enda oku kava calua keteke likuavo. Pole, olonjali viange via enda oku ndi yevelela eci nda sukilile oku sapela catiamẽla kovisimĩlo viange. Ngeca olopandu omo ovo va kala konẽle yange. Nda va kolelele kuenda nda enda oku va sapuila ovina viosi. Eci ca enda oku ñuatisa oku liyaka lasakalalo eteke likuavo.”—Marilyn

    Ceci Embimbiliya li popia: “Ohele vutima womunu yu petamisa, ondaka yohenda puãi yu petula.”—Olosapo 12:25.

    Ceci olondaka viaco vi lomboloka: Olonjali viove ale ekamba liove o pondola oku ku kuatisa oco o tepulule esakalalo.

  • Likutilila. “Ci ñuatisa oku likutilila lolukandi, momo ndi yeva ondaka yange. Kuenje, ndi pondola oku situlula ovina viosi vi ndi sakalaisa okuti ka vi kala lika vutima wange. Ci ñuatisavo oku limbuka okuti Yehova wa velapo asakalalo ange a sule.”—Laura.

    Ceci Embimbiliya li popia: “Yeki kokuaye ovilemo viene viosi, momo eye o vu tati.”—1 Petulu 5:7.

    Ceci olondaka viaco vi lomboloka: Ohutililo hacinacimueko ci lembeleka utima. Pole, onjila yimue yi ku kuatisa oku sapela la Yehova Suku. Eye o likuminya ndoco: “ Ku ka yokoke, momo ndi Suku yove! Ame hu kolisa, hu kuatisa.”—Isaya 41:10.