Skip to content

Olombangi Via Yehova

Select language Umbundu

Ndi liwekapo hẽ oku tanga?

Ndi liwekapo hẽ oku tanga?

Tala ovina o sukila oku kũlĩhĩsa

Vofeka o kasi omunu o kisikiwa oku lilongisa toke ocisoko cipi? Wa pitĩla ale kocisoko caco? Nda kua kapeleko elungulo Liembimbiliya lioku ‘pokola kolombiali’ kuenda ku tẽlisa ocisoko ci kisikiwa, o kasi oku liwekapo.—Va Roma 13:1.

Wa tẽlisa ale ovimãho viove kosikola? Ovimãho vipi o yongola oku tẽlisa kosikola? Kua ci kũlĩhile? O sukila oku ci kũlĩha! Momo nda kua ci kũlĩhile, o ka sokisiwa ndomunu wa londa vomboyo pole ka kũlĩhile oku a loña. Omo liaco, sapela lolonjali viove catiamẽla kosapi hati: “ Ovimãho Viange Kosikola.” Nda wa liwekapo oku lilongisa okuti kua tẽlisile ovimãho ove lolonjali viove wa tumbiki viatiamẽla kosikola, o kasi oku liwekapo oku tanga.

Oku liwekapo oku tanga ci sokisiwa loku tẽha vomboyo osimbu kua pitĩlile kocitumãlo enda

Momo lie o yonguila oku liwekapo oku tanga? Ovina vimue vivali vi pondola oku ci koka vievi: Oku kuatisa epata lovina va sukila ale oku lieca olumue oco o linge upange umue. Asunga amue okuti ka a sungulukile ya-a: Oku yuvula oloseteko, kuenda oku liwekapo oku linga ovopange o kosikola. Ocina ca velapo, oku limbuka esunga lieci o yonguila oku liwekapo oku tanga, nda ca sunguluka ale sio. Nda wa liwekapo oku tanga omo lioku tila ovitangi, citava okuti o ka livela.

Oku liwekapo oku tanga ci sokisiwa loku tẽha vomboyo osimbu kua pitĩlile kocitumãlo enda. Citava okuti omboyo yaco ka yi kasi ciwa kuenda omanu va endelamo ka va sungulukile. Nda wa tẽha vomboyo ku ka pitĩla oku wenda kuenda citava okuti o li lemẽha. Cimuamue haico ci pita love nda wa liwekapo oku tanga. Ka ci ka leluka oku sanga upange umue. Kuenda ndaño wa sanga upange umue citava okuti o ka tambula olombongo vitito okuti, nda havioko o tambula nda wa malele oku tanga.

Ku ka liwekepo oku tanga, pole kuata epandi kuenda seteka oku tetulula ovitangi wa siata oku liyaka lavio kosikola. Nda wa ci linga, o ka lilongisa oku kala ukuepandi kuenda o ka tẽla oku yula ovitangi o ka sanga poku sanda upange.

 Ovimãho Viange Kosikola

Vimue pokati kovimãho via velapo viokosikola, oku ku pongiya oco o kuate upange umue u pondola oku ku kuatisa oku litekula kuenda epata liove kovaso yoloneke. (2 Va Tesalonike 3:10, 12) Wa sokolola ale upange o yongola oku linga? Otembo o pesila kosikola yi ku kuatisa ndati oku li pongiyila oku tẽlisa upange waco? Oco o kũlĩhe nda ovina o lilongisa kosikola vi ka ku kuatisa tambulula apulilo akuãimo:

  • Ovina vipi ndi tẽla oku linga? (O kuete hẽ ukamba uwa lavakuene? O sole hẽ oku linga ovopange amue ndeci oku semulula ovina? Wa siata hẽ oku kuata onima yiwa poku tetulula ovitangi?)

  • Kovopange api ndi pondola oku linga ovina ndi tẽla?

  • Ovopange api a siata pocitumãlo ñasi?

  • Nye ñasi oku lilongisa okuti ci ka ndi kuatisa oku sanga upange?

  • Uloño upi ndi kasi oku lilongisa okuti u ka ndi kuatisa oku tẽlisa ovimãho viange?

Ivaluka okuti: Ocimãho cove coku tanga oku lilongisa uloño umue u ka ku kuatisa. Ku ka sande oku lilongisa vokuenda kuotembo yalua, momo ci sokisiwa loku “kala vomboyo” otembo yosi, oco o yuvule ovikele.