Skip to content

Olombangi Via Yehova

Select language Umbundu

AMÃLẼHE VA PULA

Ndi Sukila hẽ Oku Liwekapo Oku Namulala—Onepa 1

Ndi Sukila hẽ Oku Liwekapo Oku Namulala—Onepa 1

Olonjanja vimue oku liwekapo oku namulala, ci kuatisa. Kũlĩhisa ulandu wa Jill. Eye wa popia hati: “Kefetikilo nda li tendele okuti ndimunu umue o li kasi momo omunu nda kala oku namulala laye olonjanja viosi wa ndi kapeleko, wa enda oku kũlĩhisa ocitumãlo ndi kasi, omunu ndi kasi laye kuenda eci nda kala oku linga. Eye wa kuatele esepa lepata liange, capiãla enene isiange. Eci nda liwekapo oku namulala laye, ca kala ndu okuti va njupa ocilemo cimue!”

Sarah wa pitavo locitangi cimuamue. Eye wa fetika oku limbuka okuti John, ukuenje a kala oku namulala laye wa enda oku vangula olondaka vĩvi, ka ca lelukile oku u sanjuisa kuenda ka kuatele esumbilo. Sara wa popia hati: “Onjanja yimue wa pitĩla konjo yetu okuti wa cilua olowola vitatu, ka lamele ina yange eci o yikuila epito, kuenje wa popia hati: ‘Tu ende. Tua cilua.’ Eye ka popele hati, ‘Nda cilua’ pole hati, ‘Tua cilua.’ Eye wa sukilile oku pinga ongecelo ale oku lombolola esunga lieci a ciluila. Pole, ca velapo ceci okuti, eye wa sukilele oku lekisa esumbilo ku ina yange.”

Ocili okuti oku sumua omo liocituwa cimue ka ci vetiya oku liwekapo oku namulala. (Osamo 130:3) Pole, eci Sarah a limbuka okuti John wa kuatele ocituwa coku vangula lãvi kuenda ocituwa caco ca kala oku amamako, eye wa nolapo oku liwekapo oku namulala laye.

Nye o sukila oku linga nda wa limbukavo okuti omunu o kasi oku namulala laye ka ka kala ohuelli yimue yiwa? Ku ka ci tende ndocina cimue ka ci kuete esilivilo! Ndaño okuti ka ca lelukile, ciwa oku liwekapo oku namulala. Elivulu Liolosapo 22:3 li popia ndoco: “Omunu wa lunguka o mõla ũvi kuenje o lisalamisa.”

Ocili okuti oku liwekapo oku namulala pamue ka ci leluka. Pole olohuela vi kala otembo yosi. Ciwa oku tala ohali vokatembo kamue okuti ku liveli vokuenda kuomuenyo wove wosi!