Skip to content

Olombangi Via Yehova

Select language Umbundu

AMALẼHE VA PULA

Nda Lipongiyila Oku Namulãla?

Nda Lipongiyila Oku Namulãla?
  • Oku namulãla ci lomboloka nye?

  • Cipi ocimãho coku namulãla?

  • Ndi kasi ale votembo yoku namulãla?

  • Momo lie ci kuetele esilivilo oku kevelela?

Oku namulãla ci lomboloka nye?

  • Ove olonjanja vialua o tunda lomunu umue ukuavimatamata via litepa. Anga hẽ, vu kasi oku namulãla?

  • Ove o sole omunu umue ukuavimatamata via litepa. Wa siati oku litumisa asapulo kuenda oku sapela votelefone olonjanja vimue vokuenda kueteke. Anga hẽ, vu kasi oku namulãla?

  • Olonjanja viosi eci o kasi lakamba, o kala lika ponele yomunu waco. Anga hẽ, vu kasi oku namulãla?

    Citava okuti ca leluka kokuove oku tambulula epulilo liatete, pole, pamue wa sokolola calua oco o tambulule apulilo akuavo. Oku namulãla ci lomboloka nye?

Nda o kasi pokati komanu, noke ovisimĩlo viove o vi tiamisila lika komunu umue, kuenje omunu waco o tiamisilavo ovisimĩlo viaye kokuove, ci lekisa okuti vu kasi oku namulãla.

Omo liaco, etambululo liapulilo a votuiwa ndeti, oco. Ci kale okuti vu sapela votelefone, vo internet, ale vaso la vaso, nda ca kũlĩhĩwa lomanu ale sio, nda vu lekisa ovisimĩlo vioku likuela, ceca uvangi wokuti vu kasi oku namulãla.

Cipi Ocimãho coku Namulãla?

Oku namulãla ku sukila oku kuata ocimãho cimue: Oku kuatisa ulume kuenda ukãi oku nõla nda va yongola oku likuela.

Ocili okuti, vamue pokati kakamba vove ka va tendi oku namulãla ndocina cimue ci kuete esilivilo. Citava okuti va sole lika oku kala lekamba limue lilikasi, pole ka va kuete ovisimĩlo vioku likuela. Pamue, omanu va tenda lika omunu waco ndekolowa limue ale ocimalẽho cimue va yongola oku muiwa laco kuenda oku pandiyiwa.

Pole, ukamba waco ka u kala otembo yalua. Ufeko umue o tukuiwa hati, Heather wa popia hati, “Amalẽhe valua va namulãla lika vokuenda kuosemana yimosi ale vivali, noke va liwekapo.” “Ovo va tenda ukamba waco ndocina cimue ci pita ombamba okuti, ka ci va vetiya oku likuela, pole koku linyala.”

Ocili okuti, eci o namulãla lomunu umue, o vetiya ovisimĩlo viaye. Omo liaco, likolisilako oku tẽlisa ovisimĩlo viove.—Luka 6:31.

Nda o kasi oku namulãla okuti ku kuete ocisimĩlo coku kuela, o sokisiwa lomõla o papala locikuata cimue, noke o ci nasi

Ove hẽ o yonguile okuti omunu umue o papala lovisimĩlo viove ndocikuata cimue omõla a kuata noke o ci nasi? Omo liaco, ku ka ci linge komunu ukuavo! Embimbiliya li lekisa okuti ocisola “ka ci lingi akutisasõi.”—1 Va Korindo 13:4, 5.

Umalẽhe umue o tukuiwa hati Chelsea, wa popia ndoco: “Olonjanja vimue nda simĩle okuti oku namulãla ci kasi ndomapalo yimue, pole ka ca sungulukile oku ci tenda ndomapalo nda omunu umue wa kapako ukamba waco, pole ukuavo sio.”

Etosi: Oco o lipongiyile oku namulãla kuenda oku kuela, tanga ukanda wa 2 Petulu 1:5-7, kuenje nõla ocituwa cimue o sukila oku mioñolola. Noke yosãi yimosi, kũlĩhĩsa ovina wa lilongisa viatiamẽla kocituwa caco kuenda ndomo wa mioñoloha.

Ndi Kuete Ale Utunga Woku Namulãla?

  •  Kocisimĩlo cove, otembo yipi yiwa yoku fetika oku namulãla?

  •  Kaliye linga epulilo liaco ku umue pokati kolonjali viove.

Pamue atambululo aco avali a pondola oku litepa. Ale sio. Citava okuti o kasi pokati kamalẽhe valua va lekisa olondunge viokuti, va namulãla lika eci va pitĩla vutunga umue va limbuka okuti va likũlĩha ciwa.

Eci oco Danielle o kuete 17 kanyamo a nõlapo oku linga. Eye wa popia hati: “Kanyamo avali a pita, ocituwa nda enda oku sandiliya kulume umue, hacoko ndi sandiliya cilo. Toke cilo, sia li kolelele oco ndi nõle onjila yaco. Eci ndi limbuka okuti kaliye nda kũlĩha ciwa ekalo liange, oco ndi sokolola lika oku namulãla.”

Kuli esunga likuavo liwa lioku kevelela. Embimbiliya li tukula ondaka “vumalẽhe” oco li lombolole otembo okuti oloñeyi vietimba kuenda ovisimĩlo vioku kuela vi piãla. (1 Va Korindo 7:36) Oku kala olonjanja vialua lomunu umuamue osimbu o kasi votembo yaco, ci pondola oku vokiya olonjongole viove kuenda oku ku vetiya oku linga eci ka ca sungulukile.

Ocili okuti, pamue komanu vu tangela kumosi va ci tenda nduveke. Valua pokati kavo va kuete onjongole yoku lipekela. Pole, ove ku sukila oku kuata ovisimĩlo vimuamue. (Va Roma 12:2) Momo Embimbiliya li ku vetiya oku ‘tila evĩho liukahonga.’ (1 Va Korindo 6:18) Poku kevelela toke eci o pita votembo yumãlehe, o pondola oku ‘yuvula olohele.’—Ukundi 11:10.

Momo Lie ci Kuetele Esilivilo Oku Kevelela?

Oku kisikiwa oku namulãla osimbu kua lipongiyile, ci sokisiwa loku kisikiwa oku linga oseteko ya sulako yelilongiso limue kua fetikile. Ocili okuti oku linga ocina caco, nda ka ca sungulukile! Momo o sukila otembo yoku konomuisa ovipama oco o kuate ocisimĩlo cepulilo o ka sanga voseteko yaco.

Cimuamue haico ci pita loku namulãla.

Oku namulãla ocina cimue ci kuete esilivilo. Omo liaco, osimbu kua likuminyile oku namulãla lomunu umue, o sukila oku sanda otembo yoku lilongisa “ocipama” cimue ci kuete esilivilo: Ndomo o pondola oku linga akamba vawa.

Noke, eci o sanga omunu wa ku sungulukila, o ka lipongiyila olohuela viwa. Olohuela viwa vi lomboloka ukamba uwa u kasi pokati komanu vavali va li sole.

Oku kevelela oco o namulãle noke, ka ci tateka elianjo liove. Pole, ci ka ku ĩha elianjo lialua oco o ‘sanjukile oloneke viove viovomalẽhe.’ (Ukundi 11:9) O ka kuatavo epuluvi lioku mioñolola ovituwa viove, capiãla enene konepa yespiritu. —Asiõsuĩlo 3:27.

Osimbu o kevelela, o pondola oku kuata ukamba lomanu vosi. Onjila yipi ya velapo yoku ci linga? Poku pita otembo lovimunga vi songuiwa ciwa. Umãlehe umue o tukuiwa hati Tammy wa popia hati: “Ndi sima okuti poku ci linga omunu o lianja vali calua. Ciwa nda o kuete akamba valua.” Umalẽhe umue o tukuiwa hati Monica wa popia ndoco: “Oku tunda lomanu valua ciwa, momo o kũlĩha ovituwa viavo via litepa.”

Nda wa likuminya oku namulãla selo, o ka tala ohali. Omo liaco, kuata epandi. Sanda epuluvi lioku linga akamba vawa osimbu o kevelela. Noke, nda wa nõlapo oku namulãla, o ka kũlĩha ciwa ovituwa viove kuenda viomunu o yongola oku kala laye.