Skip to content

Olombangi Via Yehova

Select language Umbundu

AMÃLEHE VA PULA

Nye Ndi Sukila Oku Linga Oco Si Ka Sumue?

Nye Ndi Sukila Oku Linga Oco Si Ka Sumue?

“Olonjanja viosi ndi limbuka okuti akamba vange va sumua, ame ndi va lembeleka kuenda ndi va kuatisa oku potolola ovitangi viavo. Pole ocina cimue okuti havosiko va ci kũlĩha ceci okuti, eci nĩukila konjo, ndi li yikila vonjo kuenda ndi fetika oku lila.”—Kellie.

“Eci ndi sumua, ndi liamuha la vakuetu. Nda umue o ndaleka oco tu ka ñuale ñuale, ndi li sandela esunga limue oco si ka ende. Ndi yuvula oku lekisa kepata liange okuti nda sumua. Ovo va sima okuti si kuete ocitangi lacimue.”—Rick.

Anga hẽ wa liyevele ale nda Kellie ale nda Rick? Nda oco, ku ka sime okuti cimue cĩvi ci kasi oku li pita love. Ocili okuti, omanu vosi olonjanja vimue va sumua. Ndaño muẽle alume kuenda akãi vakuekolelo va tukuiwa Vembimbiliya va yevelevo esumuo.—1 Samuele 1:6-8; Osamo 35:14.

Olonjanja vimue, wa kũlĩha esunga lieci wa sumuila, pole olonjanja vimue sio. Anna o kuete 19 kanyamo wa popia hati: “Ku sukila oku sumuisiwa oco o sumue. Ekalo liaco citava okuti liya vocipipikipiki ndaño ku kasi oku liyaka locitangi cimue. Ka ca sungulukile, pole ca siata!”

Ndaño kuli cimue ci ku sumuisa ale sio, nye o sukila oku linga eci o sumua? Seteka ovina vikuãimo:

  1. Sapela lomunu umue. Eci Yovi a kala oku liyaka lesumuo wa popia hati: “Ndombolola kutanya okulisiõsiõla kuange!”—Yovi 10:1.

    Kellie: Ci komõhisa calua ndomo ñala noke yoku sapela lomunu umue, momo ndi cĩ okuti kuli umue wa kũlĩha ocitangi cange. Ci kasi ndu okuti omunu waco wamba ukolo oco a njupe vokasimba. Ci ka vuluisa!

  2. Soneha. Eci o sumua, seteka oku soneha catiamẽla kesumuo liaco. Daviti volosamo viaye olonjanja vimue wa situlula esumuo lia piãla. (Osamo 6:6) Oku ci linga ci ka ku kuatisa oku “tata olondunge lutate”.—Olosapo 3:21.

    Heather: Eci ndi sumua ndi sokolola ovina vialua kuenda oku soneha ci ndi kuatisa oku sokiya ciwa ovisimĩlo viange. Noke yoku situlula ovisimĩlo viove loku kuata elomboloko liwa, esumuo litepuluka.

  3. Tukula ocitangi caco vohutililo. Embimbiliya li popia okuti eci o tukula asakalalo ove vohutililo, ‘ombembua ya Suku yina ya piãla olondunge viosi, yi lava utima wove kuenda ovisimĩlo viove’.—Va Filipoi 4:6, 7.

    Esther: Nda enda oku seteka oku limbuka esunga lieci nda sumuila, pole sia ci tẽlele. Nda pinga ku Yehova oco a ñuatisa oku kuata esanju. Nda kavele omo lioku sumua, omo sia kuatele esunga liaco. Kuenje nda tẽla oku yula ocitangi caco. Lalimue eteke ku ka tende ohutililo ndocina cimue ka ci kuete esilivilo!

    Lekuatiso kuenda alikolisilo, ocitangi cove coku yeva esumuo ci pondola oku pita

    Ocisimĩlo: Poku likutilila kuama olondaka vi sangiwa Kosamo 139:23, 24. Situlula ovisimĩlo viove ku Yehova kuenda pinga kokuaye oco a ku kuatise oku limbuka esunga lieci wa sumuila.

Ku sukila oku kuama lika olonumbi via tukuiwa ndeti, o pondolavo oku kuatisiwa Londaka ya Suku, Embimbiliya. Oku yukisa ovisimĩlo viove lovolandu a sangiwa Vembimbiliya ci ku kuata oku kuata ovisimĩlo via sunguluka.—Osamo 1:1-3.

Ceci esumuo ka li piti

Ryan wa popia hati, “olonjanja vimue lomẽle ndi kuata ocisimĩlo cokuti ca velapo oku amamako oku pekela okuti si pasuka oco ndi mõle ovina vi ñokela vali esumuo.” Ryan o kuete ocitangi cesumuo okuti ka lipiti, pole hayeko lika. Ovolandu a lekisa okuti pokati kamãlehe vakuãla, umue pokati kavo o kuete ocitangi cesumuo okuti ka ci piti osimbu handi ka lingile ukulu.

O ci limbuka ndati nda o kuete ocitangi cesumuo ka li piti? Mua kongela ovina ndevi: oku tema lonjanga, onjongole yoku liamuha lavakuene, ekambo lionjongole yoku linga ovina, oku tepuluka kuonjongole yoku lia, ekambo liotulo kuenda ovisimĩlo viokuti ku kuete esilivilo ale oku livetela evelo.

Ocili okuti olonjanja vimue omanu valua va siata oku yeva ovina viaco. Pole, nda ovina viaco via mamako vokuenda kuolosema vimue, ciwa oku sapela lolonjali viove oco va sandiliye ondotolo yimue. Eye o ka limbua nda o kuete ocitangi cesumuo ka li piti.

Nda o kuete ocitangi cesumuo ka li piti, ku sukila oku kuata osõi. Lekuatiso liondotolo, omanu valua va fetika oku liyeva ciwa noke liotembo yalua yoku liyaka locitangi caco! Ndaño wa siata oku sumua, kapako olondaka vi lembeleka vi sangiwa Kosamo 34:18 viokuti: “Yehova yu ocipepi la vakuavitima via teka. O popela ava va kasi lovitima via samba.”