Skip to content

Olombangi Via Yehova

Select language Umbundu

AMÃLEHE VA PULA

Anga hẽ eye omunu wa ndi sungulukila?

Anga hẽ eye omunu wa ndi sungulukila?

Wa kũlĩha omunu umue o pondola oku kala ohueli yimue yiwa? Nda wa kũlĩha, o limbuka ndati nda eye omunu wa ku sungulukila?

Ci kuete esilivilo oku kũlĩhisa ovituwa viomunu waco okuti ku vanji lika veposo lioketimba. Olonjanja vimue, ufeko wa fina citava okuti ka koleliwile, ale ukuenje una okuti wa lianja lomanu vosi, citava okuti ka kuete ovituwa viwa. Ocili okuti, ko yongola omunu umue okuti o lianja laye, omunu umue okuti o kuete ovituwa kuenda ovimãho ndevi viove.—Efetikilo 2:18; Mateo 19:4-6.

Kũlĩha ciwa omunu waco

Tenda omunu o yongola oku kuela lonjila yimue ya sunguluka. Pole, kuata utate! Citava okuti o kasi lika oku tiamisila utima kovina o yongola oku mola. Omo liaco, ku ka kuate onjanga. Seteka oku kũlĩha ekalo liomunu waco.

Omanu valua okuti va namulala, ka va kũlĩha ciwa omunu waco. Pole, va tiamisila lika utima kovina kavali kavo va sole, ndeci: ‘Tu sole ovisikilo vimuamue.’ ‘Tu sole oku linga ovina vimuamue.’ ‘Tu li tava tava kovina viosi!’ Pole, ove ku sukila lika oku vanja kovina o lete. O sukila oku kũlĩha ‘eposo liovutima.’ (1 Petulu 3:4; Va Efeso 3:16) Ku ka tiamisile lika utima kovina u li tava tava, pole ci kuete esilivilo oku kũlĩhisa ndomo u kala eci u kuete ovisimĩlo via li tepa.

Kũlĩhisa ulandu u kuaimo:

  • Omu ukuavo o kala ndati eci tu kuata ovisimĩlo via litepa? Eye o kisika okuti ovina vi lingiwa ndomo eye a yongola okuti o kala ‘lonyeño’ ale oku vangulla ‘olondaka vi linga osõi’? (Va Galatia 5:19, 20; Va Kolosai 3:8) Ale omunu umue o lekisa esunguluko okuti o kuata onjongole yoku amamako lombembua eci a limbuka okuti eye lika o sole ocina caco?—Tiago 3:17.

  • Omunu waco ukuakukisika vakuavo oco a tambule eci a yongola, ale ukuesepa? Eye o yongola oku kũlĩha ovina viosi o linga? Nicole, wa popia hati: “Nda yevele ale omanu va namulala okuti va li hoya omo okuti mue pokati kavo ka telefonala olonjanja viosi oco a popie apa a kasi. Ndi sima okuti ocituwa caco ka ca sungulukile.”—1 Va Korindo 13:4.

  • Omanu vakuavo vo tenda ndati? Citava okuti o sapela lomanu vana vo kũlĩha osimbu, ndeci vamanji va pama kekolelo okuti va kasi vekongelo. Nda wa ci linga o ka kũlĩha nda va eca ‘uvangi uwa’ watiamẽla komunu waco.—Ovilinga 16:1, 2.