Skip to content

Olombangi Via Yehova

Select language Umbundu

AMALẼHE VA PULA

Nye ndi sukila oku linga nda ndi kuete ocitangi coku vela? Onepa 1

Nye ndi sukila oku linga nda ndi kuete ocitangi coku vela? Onepa 1

Wa kũlĩha hẽ umalẽhe umue o kuete ocintangi cimue coku vela okuti ka ci kayi? Ove hẽ o kuete uvei umue u ku tateka oku linga ovina omanu vana va kuete utunga wove va siata oku linga?

Citava okuti olonjanja vimue o yeva esumuo. Pole, Vembimbiliya mu sangiwa olonumbi vivali vi kuatisa:

  • Yehova Suku Ululiki wove, wa kũlĩha ocitangi cove. Handi vali ‘eye o ku tata.’—1 Petulu 5:7.

  • Yehova Suku oka sakula ovovei osi! O pondola oku tanga ovina viaco kelivulu lia Isaya 33:24 kuenda Esituluilo 21:1-4.

    Amalẽhe valua okuti va siata oku liyaka locitangi cuhayele, va limbuka okuti ekolelo va kuetele Suku kuenda kolohumunyo viaye lia siata oku va kuatisa. Kũlĩhisa ovolandu akuãla.

  • YEIMY

  • MATTEO

  • BRUNA

  • ANDRÉ

YEIMY

Eci nda kuata 11 kanyamo nda kala ale komangu yalola. Si tẽla oku linga ovina vitito ndeci, oku tikula ovina vimue, ndaño vina okuti vialela.

Eci nda kuata 5 kanyamo nda kuatiwa luvei wekambo liongusu vakepa okuti u ndi tateka oku linga ovina vialua. Olonjanja vimue nda siata oku sumua omo si tẽla oku linga ovina omanu va kuete utunga wange va linga. Pole, olonjali viange kuenda va manji vekongelo va siata oku ñuatisa ketimba kuenda oku pamisa ekolelo liange. Ndi talavaya kupange wakundi votembo yosi kuenda vamanji va siata oku ndi kuatisa oku longisa Embimbiliya komanu vana va lekisa onjongole.

Yesu wa popia okuti Eteke leteke li kuete ohali yalio. (Mateo 6:34) Omo liaco, eteke leteke ndi seteka oku tumbika ovimãho ndi tẽla oku linga. Ndi lavoka lesanju oluali luokaliye muna ndi ka kuata “omuenyo wocili” kuenda si ka vela vali.—1 Timoteo 6:19.

Coku sokolola: Yeimy wa sanga ekuatiso poku “tumbika ovimãho komuenyo waye.” O pondolavo oku ci linga?—1 Va Korindo 9:26.

MATTEO

Vonyima yange mua fetika oku vala eci nda kuata 6 kanyamo, kuenda kefetikilo olondotolo via popia okuti oco ndi kasi oku kula. Pole, eci pa pita unyamo umosi, va limbuka okuti nda kuata uvei wo tumor.

Nda pelaliwa, pole ndotolo wa ndi pelala wa tẽla lika oku upa ci soka 40 kolopulusendo wo tumor yaco. Pa pita lika olosãi vivali kuenda o tumor yaco ya livokiya vali ndeci ca kala tete! Tunde kotembo yaco nda siata lika oku konomuisiwa lolondotolo, oku nyua ovihemba kuenda esumuo.

Olonjanja vimue ndi yeva evalo lialua ndu okuti ndi kasi oku tomiwa lomoko ca piãla enene vonyima kuenda vonulo. Pole, sia siatele oku sokolola calua kekalo liange. Nda siata oku ivaluka okuti omanu vakuavo va liyakavo lovitangi vialua, pole, va kuete ovisimĩlo via sunguluka. Ocina ca siata oku ndi kuatisa oku kuata ovisimĩlo via sunguluka, oku kolela okuti eteke limue Yehova o ka tẽlisa ohuminyo yaye yoku malako ohali yosi.—Esituluilo 21:4.

Coku sokolola: Ohuminyo ya Suku yoku malako ohali yosi yi pondola ndati oku ku kuatisa oco o pandikise ndeci ya kuatisa Matteo?—Isaya 65:17.

BRUNA

Omo okuti uveyi wange ka u limbukiwa, omanu vamue pamue va sima okuti ndi cisiãi. Pole, ame si tẽla oku linga ovina viosi oku kongelamo upange wo vonjo, oku lilongisa kuenda oku pasuka pula.

Eci nda kuata 16 kanyamo, nda kuatiwa luvei wociteyateya okuti u livokiya vokuenda kuotembo. Si tẽla oku talavaya calua ale oku kala otembo yalua kupange woku kunda ndeci nda yonguile. Olonjanja viosi nda siata oku tanga ukanda 1 Petulu 5:7, ku popia okuti ‘yeki ku Suku ovilemo viene viosi, momo eye o vu tati.’ Oku sokolola okuti Yehova o tata omunu lomunu pokati ketu, ca siata oku ñuatisa calua.

Coku sokolola: O pondola oku kuatisiwa ndati poku tuika ocitele cove ku Yehova, ndeci Bruna a linga?—Osamo 55:22.

ANDRÉ

Omanu vamue va ndi tata ndomõla o kuete 10 kanyamo. Pole, ovo ka va kuete ekandu, momo ndi kasi muẽle ndu okuti ndi kuete utunga waco.

Eci nda kuata anyamo avali, nda kuatiwa luvei wo kanser okuti wa pitĩla toke vowoño. Olondotolo via tẽla oku sakula uvei waco, pole, ovihemba via tateka oku kula kuange. Cilo nda lepa eci cisoka 1.37 kolometulu. Omanu valua va sima okuti ñasi oku kemba eci ndi va sapuila okuti ndi kuete 18 kanyamo!

Vamanji vekongelo va ndi tata lesumbilo. Lomue o ndi sanumula ndeci va enda oku ndi linga kosikola. Ndi tava ekalo liange lonjila yimue ya sunguluka. Nda kuata epuluvi lioku kũlĩha Yehova okuti oco ocina ca velapo omunu umue a sukila oku linga! Ndaño okuti nda siata oku liyaka lovitangi vialua, pole, nda kolela okuti Yehova olonjanja viosi o ka ndi tata. Oku sokolola oluali luokaliye Yehova a likuminya, ci ndi kuatisa oku kuata ovisimĩlo via sunguluka.—Isaya 33:24.

Coku sokolola: Ndeci André a popia, momo lie oku kũlĩha Yehova oco ocina “ca velapo omunu umue a sukila oku linga”?—Yoano 17:3.