Skip to content

Olombangi Via Yehova

Select language Umbundu

EKUATISO KEPATA

Ndomo o Lekisa Ocisola Calua Kohueli Yove

Ndomo o Lekisa Ocisola Calua Kohueli Yove

Osimbu anyamo a pita olohueli ka vi lekisa vali ocisoa calua komunu lukuavo. Nda oco ci kasi oku lipita kolohuela viove, nye o sukila oku linga?

 Ceci o sukila oku kũlĩha

Oku lekisa o cisola ci kute esilivilo kolohuela. Oco omunu umue a pame loku kuata uhayele uwa, o sukila oku litekula ciwa loku nyua ovava alua. Cimuamue haico okuti oco olohuela vi pame, ci kuete esilivilo oku lekisa ocisola olonjanja viosi omunu lukuavo. Ndaño pa pita ale otembo yalua tunde eci va kuela olohueli vi sukila oku litata locisola kuenda oku likapako omunu lukuavo.

Ocisola cocili ka ci lisandela esunga. Ocisola ci sanda esanju liomanu vakuavo. Omo liaco, kuka lekise lika ocisola nda wa yongola, pole, limbuka ocisola ohueli yove a sukila, kuenda likolisilako oku ci tẽlisa.

Akãi va sukila oku va lekisila ocisola calua okuti alume ci sule. Ulume ume o sukila oku lekisa ocisola calua kukãi waye. Pole, nda eye o popia lika okuti u sole kefetikilo kuenda kesulilo lieteke ale ceci va lipekela, pamue ukaĩ waye o kuata atatahãi nda ulume waye u sole muẽle ale sio. Ci kuete esilivilo oku lekisa ocisola olonjanja viosi vokuenda kueteke.

 Ceci o sukila oku linga

Lekisa ocisola lolondaka. Olondaka vimue ndeci “ame ndu ku sole” ale “ove wa velapo komuenyo wange,” vi ka lekisa kohueli yove okuti u sole calua.

Onumbi Yembimbiliya: “Eci ci kasi vutima, oco omela u popia.”—Mateo 12:34.

Onumbi: Kuli olonjila vialua vioku lekisa ocisola. Citava okuiti osonẽha ukanda umue, ale oku tumisa esapulo limue votelofone.

Lekisa ocisola kovilinga. oku likuata kapepe, oku lisipula ale oku likuata peka, olonjila vimue vioku lekisa okuti o kasi oku vangula ocili eci o sapuila kohueli yove okuti u sole. O pondola oku lekisa ocisola cove poku u lamba lonjla yimue yiwa, oku u vanja locisola, ale oku u landela ocina cimue. O pondolavo oku linga ovina vi kuatisa ukãi wove, ndeci, oku oku ambata olonjeke, oku u kuatelako kepito, oku sukula alonga, oku sukula uwalo ale oku u lingilako ongau. Kakãi valua eci ca pitahãla koku kuatisa. Ci lomboloka ocisola ci lekisiwa kovilinga.

Onumbi Yembimbiliya: “Ka tu ka soli londaka pamue lelimi, te lovilinga kuenda locili.”—1Yoano 3:18.

Onumbi: Tata ohueli yove locisola ndeci wa kali oku namulala.

Sandi otembo yoku kala pamosi. Oku pita otembo yalua kavali ci pamisa olohuela kuenda o ka lekisa kohueli yove okuti o sole oku kala ponele yaye. Ocili okuti, ka ca lelukile oku sanda otembo yoku kala pamosi nda vu kuete omãla ale vu kuete ovina vialua vioku linga vokuenda kueteke. Citava okuti vu sokiya oku lingila ovina vimue kumosi, oloneke viosi, ndeci oku endela kumosi.

Onumbi Yembimbiliya: “Kuenje vu kũlĩha ovina via velapo”—Va Filipoi 1:10.

Onumbi: olohueli vimue okuti ka va kuete otembo yalua, va siata oku sokiya oku lingila kumosi ovina vimue olonjanja viosi, ndeci o ku enda ko bar oco va kalie, ale oku pita esulilo liosemana pamosi.

Kũlĩha ciwa ohueli yove. Omunu lomunu o kuete onjongole ya litepa yoku lekisiwa ocisola. Sapeli catiamẽla konjila ndomo omunu lomunu pokati kene a yongola oku lekisiwa ocisola kuenda nda okuti vu sukila oku vokiya koku lekisa ocisola omunu lukuavo. Noke likolisilako oku ci li linga. Ivailuka okuti: Ocisola ci kuete esilivilo lialua koku pamisa olohuela viove.

Onumbi Yembimbiliya: “Ocisola ... ka ci sandi ovina vialio muẽle.”—1 Va Korindo 13:4, 5.

Onumbi: Ku ka kisike oku ku lekisila ocisola, pole lipula ndoco: ‘Nye ndi sukila oku linga oco ohueli yange yi lekise ocisola calua kokuange?’