Etambululo Liembimbiliya

Uyaki wo Harmagedo u lomboloka uyaki wa sulako Suku a ka linga lolombiali viomanu. Koloneke vilo, olombiali viaco kuenda omanu va panga onepa kuviali waco, va patãla Suku poku likala oku pokola kuviali waye. (Osamo 2:2) Uyaki wo Harmagedo u ka malako olombiali viosi viomanu.

Ondaka Harmagedo, yi molẽha lika onjanja yimosi Vembimbiliya, kelivulu Liesituluilo 16:16. Ocitumasuku Cesituluilo, ci lombolola okuti, ‘olosoma violuali luosi,’ vi ka ‘ongoluiwila uyaki weteke linene lia Suku Ukuonene Wosi.’—Esituluilo 16:14.

Helie o ka yaka vuyaki wo Harmagedo? Yesu Kristu eye o ka songola olohoka vio kilu, loku yaka lovanyãli va Suku, kuenkje o ka va yula. (Esituluilo 19:11-16, 19-21) Vovanyãli vaco, mua kongela omanu vana va lambalala unene wa Suku kuenda va u sepula.—Esekiele 39:7.

Anga hẽ, uyaki wo Harmagedo uyaki umue u ka lingiwa kofeka yimue yo Kutundilo? Sio. Uyaki wo Harmagedo ka u ka lingiwa lika kocitumãlo cimue, pole, u ka lingiwa voluali luosi. —Yeremiya 25:32-34; Esekiele 39:17-20.

Uyaki wo Harmagedo, olonjanja vimue u lomboloka, Omunda yo ko Megido.” O Megido olupale lumue lua pangele onepa ko Isareli yosimbu. Ulandu u lekisa okuti kocitumãlo caco, kua enda oku lingiwila ovoyaki alua kuenda amue a tukuiwa Vembimbiliya. (Olonganji 5:19, 20; 2 Olosoma 9:27; 23:29) Pole, ka citava okuti o Harmagedo yi tiamisiwila kimbo limue li kasi ko Megido. Kocitumãlo caco, ka kuli omunda yimue yinene ale imbo lio Yesirele momo nda ka va suiko omanu vosi va ka yaka la Suku. Omo liaco, o Harmagedo, uyaki umue u ka lingiwa voluali luosi okuti, ovonene oluali a ka likongela koku yaka onjanja ya sulako poku lambalala uviali wa Suku.

Uyaki wo Harmagedo u ka kala ndati? Ka tua kũlĩhĩle ndomo Suku a ka talavaya lunene waye, pole, eye o kuete ovimalẽho viuyaki, ndevi a yaka lavio kosimbu ndeci: Ociwe, ocilemawe, ombela, ondalu, oviliakulo kuenda ovovei. (Yovi 38:22, 23; Esekiele 38:19, 22; Havakuki 3:10, 11; Sakariya 14:12) Ovanyãli vamue va Suku va ka li ponda pokati, pole, kesulilo, vosi va ka limbuka okuti Suku eye o kasi oku yaka lavo. —Esekiele 38:21, 23; Sakariya 14:13.

Anga hẽ, uyaki wo Harmagedo u ka malako ongongo? Uyaki wo Harmagedo ka u ka malako ongongo, momo oyo ya tungiwa oco omanu va kalemo otembo ka yi pui. (Osamo 37:29; 96:10; Ukundi 1:4) Uyaki wo Harmagedo ka u ka kundula omanu. Pole, u ka lomboloka eyovo kokuavo momo, “owiñi wakahandangala” va fendela Suku va ka puluka.—Esituluilo 7:9, 14; Osamo 37:34.

Ndaño okuti olonjanja vimue Embimbiliya li tiamisila ondaka “oluali” kongongo, pole, oyo yi tiamisiwilavo komanu vana va likala Suku. (1 Yoano 2:15-17) Eli olio esunga lieci tu popela hati, uyaki wo Harmagedo u ka kala ‘esulilo lioluali.’—Mateo 24:3, King James Version

Otembo yipi uyaki wo Harmagedo u ka lingiwa? Yesu poku lombolola catiamẽla “kohali yapiãla,” wa malusula luyaki wo Harmagedo, poku popia hati: “Catiamẽla keteke lowola yaco, lomue wa yi kũlĩha, ndaño ovangelo kilu, ndaño Omõla, te lika Isia.” (Mateo 24:21, 36) Pole, Embimbiliya li lekisa okuti, uyaki wo Harmagedo u ka lingiwa vokuenda kuoku tukuluka kua Yesu ka ku muiwa lovaso okuti, wa fetika kunyamo wo 1914.—Mateo 24:37-39.