Skip to content

Olombangi Via Yehova

Select language Umbundu

Nye ci lomboloka Ocinyama ca Tema ci Kusuka Nge ca Tukuiwa Kelivulu Liesituluilo Ocipama 17?

Nye ci lomboloka Ocinyama ca Tema ci Kusuka Nge ca Tukuiwa Kelivulu Liesituluilo Ocipama 17?

Etambululo Liembimbiliya

Ocinyama ca tema ci kusuka nge, ca tukuiwa kelivulu Liesituluilo ocipama 17, ondimbukiso yimue yocisoko cimue ci kuete ocimãho coku kongela kuenda oku songuila olofeka violuali. Kefetikilo ocisoko caco ca kala o Liga das Nações kuenda cilo olo Nações Unidas.

Ovina vi Kuatisa Oku Limbuka Ocinyama ca Tema ci Kusuka Nge

  1. Ocisoko copulitika. Ocinyama ca tema ci kusuka nge ci kuete “Ovitue epanduvali” vi lomboloka “olomunda epanduvali” kuenda “olosoma epanduvali” ale olombiali vi kuete unene. (Esituluilo 17:9, 10) Olomunda kuenda ovinyama via tema via tukuiwa Vembimbiliya, vi lomboloka olombiali.—Yeremiya 51:24, 25; Daniele 2:44, 45; 7:17, 23.

  2. Ocindekaise Covisoko Viopulitika Voluali Luosi. Ocinyama ca tema ci kusuka nge ca lisoka locinyama ci kueteovitue epanduvali ca tukuiwa kelivulu Liesituluilo ocipama 13, ci lomboloka ovisoko viopulitika voluali luosi. Ovinyama viaco vi kuete ovitue epanduvali, ekũi kolombinga kuenda olonduko vioku tomba Suku. (Esituluilo 13:1; 17:3) Oku lisetahãla kuaco ku komõhisa calua. Ocinyama ca tema ci kusuka nge ocindekaise covisoko viopulitika voluali luosi.—Esituluilo 13:15.

  3. Unene u tunda Kolombiali vikuavo. Ocinyama ca tema ci kusuka nge ‘ci kuatisiwa’ lovisoko vikuavo.—Esituluilo 17:11, 17.

  4. Ci li kuete omunga letavo. O Bavulono Yinene, okuti ocisoko catavo esanda Voluali luosi, ya tumãla kocinyama ca tema ci kusuka nge, ci lekisa okuti ocinyama caco ci kuatisiwa lovisoko viatavo esanda.—Esituluilo 17:3-5.

  5. Ci tomba Suku. Ocinyama ci kuete “olonduko vioku tomba Suku.”—Esituluilo 17:3.

  6. Ka ci kuata unene vokuenda kuotembo yimue. Ocinyama ca tema ci kusuka nge, ci ka kapiwa “vekungu,” * ale ka ci kuata unene, pole noke liotembo yimue ci tundamo.—Esituluilo 17:8.

Ocitumasuku cembimbiliya ca tẽlisiwa

Konomuisa ndomo olo Nações Unidas kuenda o Liga das Nações okuti olio lia va liangela, via siata oku tẽlisa Ocitumasuku Cembimbiliya catiamẽla kocinyama ca tema ci kusuka nge.

  1. Ocisoko copulitika. Olo Nações Unidas vi kuatisa ovisoko viopulitika poku “eca unene kasongui vavo.” *

  2. Ocindekaise covisoko viopulitika voluali luosi. Kunyamo wo 2011, olo Nações Unidas via vokiya eci ci soka 193 kasongui vavo. Etendelo liaco li lekisa okuti ovo va linga ocindekaise colofeka vialua kuenda omanu voluali.

  3. Unene u tunda Kolombiali vikuavo. Olo Nações Unidas vi kuatisiwa lasongui volofeka vikuavo kuenda yi kuete lika unene woku songola poku tambula unene u tunda kolofeka viaco.

  4. Ci li kuete omunga letavo. Cikale O Liga das Naçeões kuenda o Estados Unidos, va siata oku tambula ekuatiso liatavo esanda voluali. *

  5. Ci tomba Suku. Olo Nações Unidas via tumbikiwa oco “vi kuatise olofeka oku kuata ombembua kuenda oku kolapo.” * Ndaño okuti ocimãho caco ci mõlẽha ndu okuti ci kuete esilivilo, olo Nações Unidas vi kasi oku tomba Suku poku popia okuti vi kasi oku linga ovina Eye a popia okuti o ka vi tẽlisa lekuatiso Liusoma waye.—Osamo 46:9; Daniele 2:44.

  6. Ka ci kuata unene vokuenda kuotembo yimue. O Liga Das Nações okuti ya tumbikiwa noke Liuyaki Watete wa Lingiwa Voluali Luosi oco yi nene ombembua, ka ca tẽlẽle oku yuvula ungangala voluali luosi. Oco, ca liwekapo oku talavaya kunyamo wo 1939 eci Uyaki Wavali wa Lingiwa Voluali Luosi wa fetika. Kunyamo wo 1945 kesulilo Liuyaki Wavali wa Lingiwa Voluali Luosi, kua tumbikiwa olo Nações Unidas. Ovimãho viayo, onjila a kuama kuenda ndomo ya sokiyiwa, lia likuata levi vio Liga das Nações.

^ tini. 10 Ndomo ca lomboluiwa vo Dicionário Expositivo de Palavras do Velho e do Novo Testamento, kelimi lio Helasi ondaka yokuti “ekungu,” yi lomboloka “ocitunu cimue ca longa.” Vembimbiliya Versão Rei Jaime ondaka yaco ya pongoluiwa okuti “ocitunu cimue ka ci kuete esulilo.” Embimbiliya li tiamisila ondaka yaco pocitumãlo ale kekalo limue lioku pua elianjo kuenda oku pua unene.

^ tini. 13 Tala Ocipama 2 Cukanda wolo Nações Unidas.

^ tini. 16 Esapulo limue lia tunda katavo osi opostande vofeka yo Amérika lia lekisa okuti, kunyamo wo 1918 o Liga das Nações “yi ka linga ocisoko cimue copulitika cusoma wa Suku palo posi.” Kunyamo wo 1965, olonumiwa vietavo lio, Budismu, lio Katolika, lio Ortodoxa Oriental, lio Hinduismu, lio Islamismu, lio Judaismu, kuenda lio Postande, va liongoluila volupale luo San Francisco oco va kuatise kuenda oku likutililako olo Nações Unidas. Kunyamo wo 1979, Papa João Paulo II, wa situlula elavoko liaye okuti olo Nações Unidas “vi ka amamako oku kala ono yombembua kuenda yesunga.”

^ tini. 17 Tala Ocipama 1 Cukanda wolo Nações Unidas.