Skip to content

Olombangi Via Yehova

Select language Umbundu

Ekandu ka li Kuete Ongecelo li Lomboloka Nye?

Ekandu ka li Kuete Ongecelo li Lomboloka Nye?

Etambululo Liembimbiliya

Ekandu ka li kuete ongecelo, li tiamisiwila kovilinga vi kuamiwa lovituwa vi tateka omunu wa lueya oku tambula ongecelo ya Suku. Nye ci pondola oku vetiya omunu umue oku kuata ovituwa viaco?

Suku ecela omunu o likekembela akandu aye, o kuama ovihandeleko viaye loku lekisa ekolelo ku Yesu Kristu. (Ovilinga 3:19, 20) Pole, omunu umue o pondola oku nõlapo oku amamako oku linga ekandu okuti lalimue eteke a ka pongolola ocituwa caye ale ovilinga. Embimbiliya li popia okuti omunu waco ‘ukuotima ũvi,’ “o tĩlisa utima waye poku yapuisiwa lunene wekandu.” (Va Heveru 3:12, 13) Utima womunu waco u sokisiwa lombia yotuma ya yokiwa vofolono. Oyo ka yi pongoluiwa vali. Utima waye u tinduka ku Suku otembo ka yi pui. (Isaya 45:9) Ka kuli onumbi yi lekisa okuti omunu waco eceliwa. Omo liaco, ekandu liaye ka li kuete ongecelo.—Va Heveru 10:26, 27.

Asongui vetavo vo ko Yuda koloneke via Yesu va linga ekandu ka li kuete ongecelo. Ovo va kũlĩhĩle okuti espiritu sandu lia Suku lia enda oku eca ku Yesu unene woku linga ovikomo. Pole, va popaile okuti unene wa Yesu u tunda ku Satana.—Marko 3:22, 28-30.

Akandu a pondola oku eceliwa

  • Atonãi omo liekambo liukũlĩhĩso. Upostolo Paulu wa kala ukuatonãi ale wa enda oku sepula Suku. Pole, noke wa popia hati: “Puãi nda lekisiwa ohenda, momo nda kala vonumbi kuenda sia kuatele ekolelo.”—1 Timoteo 1:13.

  • Ukahokolo. Embimbiliya li popia eci catiamẽla komanu va pakula alume ale akãi vavo. Pole, noke va pongolola ovituwa viavo kuenje Suku wa va ecela.—1 Va Korindo 6:9-11.

“Anga hẽ nda linga ekandu limue ka li kuete ongecelo?”

Nda o nyãle akandu wa linga kuenje o linga apongoloko, ci lekisa okuti kua lingile ekandu ka li kuete ongecelo. Ndaño wa kupukila vekandu limuamue olonjanja vialua, o tambula ongecelo nda kua tĩlisile utima ku Suku.—Olosapo 24:16.

Omanu vamue va sima okuti va linga ekandu ka li eceliwa, omo lioku livetela calua evelo. Pole, Embimbiliya li tu longisa okuti ka tu ka koleli kovisimĩlo vietu olonjanja viosi. (Yeremiya 17:9) Suku ka tu ĩhile omoko yoku sombisa vakuetu oku kongelamo etu. (Va Roma 14:4, 12) Eye o pondola oku tu ecela ndaño utima wetu u tu pisa.—1 Yoano 3:19, 20.

Yuda wa linga hẽ ekandu ka li eceliwa?

Oco, wa linga. Eye wa kuatele ocikele coku tata okasia yolombongo vionembele. Omo liocipululu wa nyanaile olombongo va kapalemo. Yuda wa lekisa ndu okuti wa sakalalele lolohukuĩ. Pole, wa yonguile okuti vokasia mu kapiwa vali olombongo oco a vi nyane. (Yoano 12:4-8) Utima wa Yuda wa nõlelepo oku linga eci cĩvi okuti wa pakula Yesu 30 kolopalata. (Yoano 12:4-8) Yesu wa kũlĩhĩle okuti Yuda lalimue eteke a likekembela kovina a linga. Eli olio esunga lieci o tukuila hati, “omõla wenyõleho.” (Yoano 17:12) Eci ci lekisa okuti, Yuda poku fa ka ka pinduiwa.—Marko 14:21.

Yuda ka likekembelele lutima wosi. Momo ka situluile ekandu liaye ku Suku, pole wa ci linga kasongui vetavo vana a tumbika lavo ongombo.—Mateo 27:3-5; 2 Va Korindo 7:10.