Skip to content

Skip to table of contents

Olombangi Via Yehova

Select language Umbundu

 EMBIMBILIYA LI PONGOLOLA OMUENYO WOMANU

Sia Yonguile Oku fa!

Sia Yonguile Oku fa!
  • UNYAMO A CITIWA: 1964

  • OFEKA A CITIWILA: INGLATERRA

  • ULANDU WOMUENYO: ONJALI YIMUE UMALẼHE OKUTI WAHUKILE

OMUENYO WANGE KOSIMBU

Nda citiwila ko Paddington, olupale lumue mua kala omanu valua ko Londres, kofeka yo Inglaterra. Nda kala la ina yange kuenda va manjange vatatu akãi okuti akulu vange. Isiange ka endaile oku kala letu otembo yalua omo liocituwa caye coku nyua calua.

Eci nda kala omõla, ina yange wa ndongisa oku likutilila ovoteke osi. Nda kuatele Embimbiliya limue litito mu sangiwa elivulu Liolosamo kuenda nda enda oku soneha ovihasu loku vimba. Njivaluka olondaka nda tanga velivulu limue okuti nda vi patekela: “Eteke limue tu pekela pole ka tu pasuka vali.” Olondaka evi via ñokela oku pita uteke wosi loku sokolola catiamẽla kovaso yoloneke. Nda sokolola okuti ‘kuli ovina vikuavo komuenyo.’ ‘Momo lie ñasilili palo?’ Ame si yongola oku fa!

Nda fetika oku kuata onjongole yoku tãha. Nda seteka oku vangula lava va fa, oku nyula ayambo kumue lakamba vange vokosikola kuenda oku tala olofilme viuyaki. Tua simĩle okuti ci sanjuisa pole, ci lingisa usumba.

Eci nda fetika oku siapo oku pokola kolonjali viange nda kuata lika ekũi kanyamo. Nda fetika oku sipa kuenda nda amamako locituwa caco. Noke yotembo yimue nda fetika oku sipa epangue. Eci nda tẽlisa 11 kanyamo, nda fetika oku nyua ovina vikoluisa. Ndaño sia solele oku nyua pole, nda solaile uholua wi yililako. Nda solailevo ovisikilo kuenda oku piluka. Eci otembo yi ngecelela nda enda oku enda kovipito kuenda kolonjo vioku piluka kuteke. Ndaenda oku tila luteke kuenda oku tiuka koviteketeke osimbu hakuacile. Keteke likuavo omo okuti nda kava, nda enda oku laña kosikola. Eci ndenda kosikola, nda enda oku nyua.

Kesulilo liunyamo sia pitile kosikola. Omo okuti ina yange ka kũlĩhile ovina nda kala oku linga, wa sumuile calua kuenda wa temẽle. Tua lihoyisa kuenda nda tunda konjo. Noke nda enda konjo ya Tony ukuenje nda kala oku namulala laye, okuti wa kala o Rastafári. Eye wa litumbikile koku linga ungangala kuenda wa enda oku landisa olodroga. Eci nda tẽlisa 16 kanyamo nda cita omõla wetu.

 NDOMO EMBIMBILIYA LIA PONGOLOLA OMUENYO WANGE

 

Noke nda kũlĩha Olombangi Via Yehova konjo yimue yoku tekuila olonjali vina okuti amalẽhe kumue lomãla vavo. Asongui vopocitumãlo va nyĩha onjo yoku kala. Olombangi vivali Via Yehova via enda oku ndi nyula ame kuenda olonjali vikuavo amalẽhe. Eteke limue nda sapela lavo. Nda seteka oku lekisa kokuavo okuti va kala oku longisa uhembi. Pole, ovo va tambulula apulilo ange lonjila yimue ya sunguluka kuenda va kuama Vembimbiliya. Ocisola kuenda umbombe va lekisa, ca ndi vetiya calua. Kuenje nda tava oku lilongisa Embimbiliya lavo.

Noke yotembo yimue, nda lilongisa ovina vimue Vembimbiliya okuti via pongolola ekalo liomuenyo wange. Eci nda kala umalẽhe nda kuatele usumba woku fa. Pole, cilo nda limbuka elongiso lia Yesu liatiamẽla kepinduko! (Yoano 5:28, 29) Nda lilongisavo okuti Suku wa siata oku nata. (1 Petulu 5:7) Nda vetiyiwa calua lolondaka vi sangiwa kelivulu lia Yeremiya 29:11, ku popia hati: “Momo nda kũlĩha ovisimĩlo ñasi loku vu simĩla; ovisimĩlo viaco vioku u kuatisi, havioku-vu-lingako cĩvi, haivio vioku waveli elavoko lioloneke viya.” Nda fetika oku tava okuti ndi pondola oku kuata elavoko lioku kala otembo ka yi pui Vocumbo Celau palo posi.—Osamo 37:29.

Olombangi Via Yehova via lekisa ocisola cocili kokuange. Eci nda endele onjanja yatete kohongele yavo, nda limbuka okuti vosi va likuetele ocisola pokati! (Yoano 13:34, 35) Ocituwa caco ca litepele calua leci nda siata oku mola konembele yetu. Olombangi via Yehova via ndi yolela ndaño lovituwa nda kuatele. Ovo va sokiya otembo yoku kala lame, oku ndi tata kuenda va ndi kapeleko loku nyĩha ekuatiso nda sukilile. Nda liyeva ndu okuti nda kala vepata limue linene halio li kuete ocisola.

Poku lilongisa Embimbiliya, nda limbuka okuti nda sukilile oku linga apongoloko oco ngambate omuenyo umue u likuata lolonumbi via Suku. Ka ca lelukile kokuange oku liwekapo oku sipa akaya. Noke, nda limbuka okuti ocisikilo cimue nda enda oku yevelela ci mbetiya oku sipa eliamba, kuenje nda siapo oku yevelela ocisikilo caco. Oco ndi yuvule uholua, nda liwekapo oku endaenda kovipito kuenda kolonjo vioku piluka kuteke kuna nda enda oku vetiyiwa oku nyua. Kuenje, nda sanda akamba vokaliye va ndi vetiya oku kuata ovituwa viwa loku ndi kuatisa oku pongolola ekalo liomuenyo wange.—Olosapo 13:20.

Noke, Tony wa fetikavo oku lilongisa Embimbiliya Lolombangi Via Yehova. Osimbu Olombangi Via Yehova via tambulula apulilo aye atiamẽla Kembimbiliya, wa limbuka okuti ovina a kala oku lilongisa viocili. Eye wa linga apongoloko alua komuenyo waye ndeci: Wa siapo akamba vaye olongangala, wa liwekapo oku linga ungangala kuenda oku sipa eliamba. Oco tu sanjuise Yehova, tua nõlapo oku ambata omuenyo umue u likuata lolonumbi via Suku kuenda oku tata ciwa omõletu. Kuenje, kunyamo wo 1982 tua kuela.

“Kosimbu nda enda oku pumba otulo omo lioku sokolola ovina viatiamẽla kovaso yoloneke ale koku fa”

Ndi ivaluka okuti nda linga akonomuiso vovipama Viutala Wondavululi kuenda o Despertai! muna mu sangiwa ovolandu omanu va tẽla oku linga apongoloko komuenyo wavo okuti oco nda yonguilevo oku linga. Nda vetiyiwavo lovolandu omanu vaco! Nda nõlapo oku amamako oku ci seteka kuenda sia liwekelepo. Nda likutilila ku Yehova oco amameko oku ñuatisa. Ame la Tony tua papatisiwa kosãi Yevambi Linene yunyamo wo 1982.

NDOMO NDA KUATISIWA

Oku kuata ukamba la Yehova Suku, ca popela omuenyo wange. Ame la Tony tua limbuka okuti Yehova wa siata oku tu kuatisa kotembo yovitangi. Tua lilongisa oku kolela ku Suku eci tu liyaka lovitangi kuenda oku limbuka okuti eye olonjanja viosi o tu kuatisa oku tekula epata lietu.—Osamo 55:22.

Nda likolisilako oku kuatisa omõletu ulume kuenda ukãi oku kũlĩha Yehova ndeci nda linga. Cilo ndi kuete esanju poku limbuka okuti omãla vavo va kasivo oku vumba Suku.

Kosimbu nda enda oku pumba otulo omo lioku sokolola ovina viatiamẽla kovaso yoloneke ale koku fa. Ame la Tony olosemana viosi tua siata oku nyula akongelo Olombangi Via Yehova oco tu pamise vamanji. Tua siata oku likongela kokuavo oku longisa omanu okuti nda va kolela Yesu, va pondolavo oku kuata omuenyo ko pui.

Via sandekiwa Lolombangi Via Yehova.