Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO

Suku o Tenda Ndati Uyaki?

Suku o Tenda Ndati Uyaki?

Ove nda wa tambulula ndati epulilo eli? Omanu valua va sima okuti Suku o sanjukila uyaki. Ovo va siata oku popia okuti kosimbu Suku wa handelekele afendeli vaye oco va litenge vuyaki; ndomo ci lekisiwa Vembimbiliya. Pole, vakuavo va popia okuti Omõla a Suku wa longisa olondonge viaye oku sole ovanyãli vavo. (Mateo 5:43, 44) Omo liaco, va sima okuti ocisimĩlo ca Suku catiamẽla kuyaki ca pongoloka, kuenda koloneke vilo eye ka sanjukila vali uyaki.

Cipi ocisimĩlo cove? Suku o sanjukila hẽ uyaki? Nda oco, onepa yipi Suku a nõla oku kuatisa kuyaki wo koloneke vilo? Oku sanga atambululo kapulilo a tukuiwa ndeti ci ku kuatisa oku pongolola ovisimĩlo viove viatiamẽla kuyaki. Nda wa kũlĩha okuti Suku o sanjukila uyaki kuenda o kuete ocisimĩlo cimuamue leci cove catiamẽla kuyaki, citava okuti nda wa ci sanjukila loku kolela okuti onepa wa nõla yi yula uyaki. Pole, nda wa kala ndati nda wa limbuka okuti Suku o kuatisa onepa yikuavo yuyaki? Citava okuti nda wa pongolokela konepa Suku a kasi oku kuatisa.

Kuli ocina cikuavo ca velapo. Oku kũlĩha ndomo Suku a tenda ovoyaki, ci pondola oku pongolola ovisimĩlo viove viatiamẽla ku Suku. Nda watiamẽla komanu vana va tala ohali omo liuyaki, ocili okuti nda ca ku vetiya oku kũlĩha etambululo liepulilo eli: Anga hẽ Suku eye wa siata oku koka ovoyaki loku ecelela ohali yi tunda kuyaki, kuenda ka kapeleko ohali yomanu, ndomo vamue va siata oku sima?

O ka komõha calua poku limbuka okuti etambululo Liembimbiliya lia litepa calua lovisimĩlo via tukuiwa ndeti. Ocili okuti tunde kosimbu ocisimĩlo ca Suku catiamẽla kuyaki ka ca pongolokele. Tu kũlĩhĩsi eci Embimbiliya li popia ndomo Suku a tendele uyaki kosimbu, kuenda kocita catete eci Yesu a kala palo posi. Eci ci tu kuatisa oku limbuka ndomo Suku a tenda uyaki koloneke vilo, kuenda oku kũlĩha nda uyaki u ka panga onepa kekalo liomanu kovaso yoloneke.