Skip to content

Skip to table of contents

Olombangi Via Yehova

Select language Umbundu

 ULANDU WOMUENYO

Yehova wa Nyiha Calua Okuti Eci Ndi Sesamẽla ci Sule

Yehova wa Nyiha Calua Okuti Eci Ndi Sesamẽla ci Sule

Eci nda kuata ci soka 17 kanyamo nda kuatele ovisimĩlo ndevi amalẽhe vakuavo va kuete. Nda solaile oku kala lakamba vange, oku liteva kuenda oku imba ombunje. Pole, omuenyo wange wa pongoloka veteke limosi. Nda kupuka lomoto ya ndi sila ulema oku upisa kosingo toke kovolu. Tunde eci nda pita locilunga caco pa pita ale 30 kanyamo, pole toke cilo ñasi liyaka locitangi caco.

Nda kulila volupale luo Alicante, kutundilo wo Espanya. Omo okuti vepata liange mua kala ovitangi vialua, nda pita otembo yalua volokololo. Ocipepi lonjo yange pa kala ocitumãlo coku semulũla alola akãlu. Umue pokati kolonalavãi viaco o tukuiwa hati José María, wa linga ekamba liange. Wa kala omunu umue wa kapaleko ovisimĩlo viange okuti, ocina cimue ca kambelele vepata liange. Poku liyaka lovitangi, eye wa lilekisa nda manjange, ndekamba liocili, ndaño okuti tua likambelele eci ci soka 20 kanyamo.

José María wa fetikile oku lilongisa Embimbiliya Lolombangi Via Yehova. Ame ndi pondola oku popia okuti eye wa solaile Ovisonehua kuenda wa enda oku ndi sapuilako ocili Cembimbiliya. Nda lekasaile esumbilo poku u yevelela, pole lalimue eteke nda lekisile onjongole yoku kapako eci eye a enda oku popia. Nda tiamisilile utima kovina vikuavo, ndaño kua kala epuluvi lioku linga apongoloko.

OCILUNGA CIMUE CA PONGOLOLA OMUENYO WANGE

Si sole oku vangula calua catiamẽla kocilunga caco. Pole, nda limbuka okuti sia kuatele olondunge kuenda utate. Veteke limosi omuenyo wange wa pongoloka. Nda kala umalẽhe umue weyukile uhayele, pole vocipikipiki nda linga ocilema loku kapiwa vosipitali. Ka ca lelukile kokuange oku tava ekalo liaco. Nda enda oku lipula ndoco, ‘Anga hẽ kuli esunga lioku kala komuenyo?’

José María weyile oku ndi nyula kuenda lonjanga yalua wa sandiliya Olombangi Via Yehova via kala ocipepi losipitali kuenje vieya oku ndi nyula. Apasu aco a vetiya utima wange. Eci nda tunda vohondo yina okuti si nyuliwa lomanu, nda fetika oku lilongisa Embimbiliya. Nda lilongisa esunga lieci omanu va talela ohali, eci va fila kuenda esunga lieci Suku a ecelela ovina vĩvi. Nda lilongisavo catiamẽla kohuminyo ya Suku yokuti, ongongo yosi yi ka yuka lomanu va lipua muna okuti layumue o ka popia hati: “Ndi vela.” (Isaya 33:24) Ya kala onjanja yatete oku kuata elavoko liovina viwa komuenyo wange.

Eci nda tunda kosipitali ombili yange yoku lilongisa Embimbiliya ya livokiya. Lomangu yimue yalola yilikasi, nda endaile kolohongele Violombangi Via Yehova kuenda nda lingila kumosi lavo upange woku kunda. Keteke 5 ya Kuvala yunyamo wo 1988, nda papatisiwila pombasia yimue yilikasi eci nda tẽlisa 20 kanyamo. Yehova Suku wa nyĩha ovisimĩlo via sunguluka. Pole, nye ndi sukila oku linga oco ngece olopandu?

 OKU AMAMAKO LUPANGE WANGE NDAÑO LULEMA

Nda nõlapo okuti lacimue ci nateka oku linga cosi ndi tẽla kupange wa Yehova. Nda yonguile oku amamako. (1 Timoteo 4:15) Kefetikilo ka ca lelukile momo epata liange ka lia yonguile okuti ndi kala Ombangi ya Yehova. Ndaño lovitangi viaco vamanji vekongelo va ñuatisa. Ovo va ñuatisa oku endaenda kolohongele kuenda kupange woku kunda.

Vokuenda kuotembo nda limbuka okuti nda sukilile ekuatiso likuavo. Noke lioku sandiliya ekuatiso, nda sanga osipitali yimue yoku tatela ovilema volupale luo Valencia, ci soka 160 kolokilometulu konano yo Alicante. Cilo, osipitali yaco ya linga onjo yange.

Ndaño okuti ñasi kosipitali, nda nõlapo oku kundila vakuetu catiamẽla kekolelo liange

Ndaño ñasi kosipitali, haimo ñuete onjongole yoku amamako oku vumba Yehova. Omo liulema wange nda tambowaile olombongo kuenda nda landa o kombutador yimue kuenje ya kapiwa ocipepi lohama yange. Nda landavo o telefone. Oloneke viosi komẽle cifumelu cange wa enda oku yulula o kombutador kuenda o telefone yange. Oco ndi talavaye lo kombutador yange, nda enda oku talavaya lomakina yimue ya kapiwa kociyele cange. Ñuetevo uti umue okuti ndu u kuata lomẽla. Uti waco u ndi kuatisa oku soneha ovikanda vokombutador kuenda oku soneha atendelo votelefone.

Uti waco u ñuatisa oku soneha atendelo votelefone

Uloño waco wa siata oku ñuatisa ndati? Catete u nyĩha epuluvi lioku iñila vonumbi yetu yo jw.org kuenda vo OCISELEKO CALIVULU VO INTERNET. Ovimalẽho viaco via siata oku ñuatisa calua! Olonjanja vimue ndi pita olowola vialua loku lilongisa kuenda oku konomuisa alivulu oco ci ñuatise oku amamako oku kũlĩha ocili catiamẽla ku Suku kuenda kovituwa viaye. Kuenje eci ndi yeva esumuo, poku iñila Vonumbi yetu ndi sangamo cimue ci pondola oku ñuatisa.

O kombutador yange yi ñuatisa oku yevelela loku panga onepa kolohongele. Ndi pondola oku eca etambululo, oku linga olohutililo, oku linga olohundo, kuenda oku tanga Utala Wondavululi nda va nyĩha ocikele caco. Ndaño okuti si pondola oku enda Vonjango Yusoma, haimo nda kũlĩha okuti ndi panga onepa kekongelo.

O kasi oku endisa elilongiso Liembimbiliya

 Oku kuata o telefone kuenda o kombutador, ci ñuatisa oku panga onepa kupange woku kunda. Ocili okuti si pondola oku enda oku ka kundila konjo lanjo ndeci Olombangi vikuavo Via Yehova via siata oku linga. Pole, ka ci tepulula ombili yange. Oku talavaya lovimalẽho evi ci ñuatisa oku longisa vakuetu. Omo liaco, nda sanjuka omo lioku kunda lekuatiso liotelefone kuenda akulu vekongelo ndi kasi, olonjanja vimue va eca kokuange ocikele coku songola upange woku kunda lekuatiso lio telefone. Upange waco, wa siata oku kuatisa vamanji vana ka va tẽla oku enda kupange woku kunda omo liovitangi viuhayele.

O kasi oku panga onepa kefendelo liepata kumue lakamba

Omuenyo wange ka wa tiamẽlele lika kovoloño. Oloneke viosi akamba vange va siata oku iya oku ndi nyula. Va siata oku iya la vangandiavo kuenda akamba vavo, va lekisa onjongole yoku lilongisa Embimbiliya. Olonjanja vialua, va ndi pinga oco ndi longise Embimbiliya ku vana va lekisa onjongole. Vapuluvi akuavo, apata amue a siata oku ndi laleka oco mange onepa kefendelo liavo liepata. Ndi sole calua eci omãla va tumãla kohama yange loku ndi lomboluila esunga lieci va solele Yehova.

Ndi sole calua oku tambula akombe. Ohondo yange yi yuka lakamba, vamue va tunda ocipãla vakuavo va tunda ocipepi. Ocisola va lekisa kokuange ca komohĩsa olonalãvayi viosipitali ñasi. Oloneke viosi, ndi pandula Yehova omo lioku linga onepa kongongela ya vamanji.

OKU PANDIKISA

Olonjanja viosi eci omunu umue a ndi lama loku ndi pula ndomo ndi kasi, ndu kumbulula siti, “Ñasi kulo, loku pandikisa!” Nda kũlĩha okuti hameko lika ñasi oku liyaka locitangi caco. Ndaño pamue tu liyaka lovitangi viaco, Akristão vosi va kasi oku “Yaka uyaki uwa wekolelo.” (1 Timoteo 6:12) Nye ca siata oku ñuatisa oku pandikisa vokuenda kuanyamo alua? Nda siata oku likutilila olonjanja viosi, loku eca olopandu ku Yehova omo lioku eca ocimãho komuenyo wange. Nda siata oku likolisilako oku vumba Suku loku tiamisila utima wange kelavoko lio kovaso.

José Maria

Nda siata oku sokolola ndomo omuenyo u ka kala voluali luokaliye eci ndi ka yoloka loku somboka vali. Olonjanja vimue nda siata oku sewula lekamba liange José María, o kuete uveyi wociteyateya—catiamẽla koku yolokela kumosi. Ndu pula ndoco: “Helie o ka yula?” Eye o tambulula ndoco: “Ka kuli ovitangi nda helie o yula. Ca velapo ceci okuti, kavali ketu tu ka yula loku iñila voluali luokaliye.”

Ka ca lelukile kokuange oku tava ulema. Ndi ci okuti eci nda kala umalẽhe nda linga eci ka ca sungulukile kuenje ca ndi kokela ovitangi vialua. Toke cilo ndi pandula Yehova momo ka njandulukile. Eye wa nyĩha epata limue linene konepa yespiritu, onjongole yoku kala komuenyo, esanju lioku kuatisa vakuetu kuenda elavoko liwa lio kovaso yoloneke. Nda ca tavele oku tenda ovina viosi ñuete cilo, volondaka vitito mopia siti, Yehova wa nyĩha calua okuti eci ndi sesamẽla ci sule.