Skip to content

Skip to table of contents

Olombangi Via Yehova

Select language Umbundu

 EMBIMBILIYA LI PONGOLOLA OMUENYO WOMANU

Omuenyo Wange wa Kala Oku Nyõleha

Omuenyo Wange wa Kala Oku Nyõleha
  • UNYAMO A CITIWA: 1952

  • KOFEKA A CITIWILA: ESTADOS UNIDOS

  • ULANDU WOMUENYO: WA KALA ONGANGALA

OMUENYO WANGE KOSIMBU:

Nda kulila ko Los Angeles, California, ko Estados Unidos, okuti volosanjala viosi nda kũlĩhiwile omo liocituwa cange coku yaka kuenda oku fenya olodroga. Olonjali viange via kuatele omãla epandu, ame nda kala omõla wavali.

Ina yange wa tu tekuila vetavo lio postande. Pole, osimbu nda kala oku kula nda fetika oku linga ovina ka via sungulukile. Vovialumingu, nda enda oku kala kocimunga coku imba ovisungo vonembele. Vokuenda kuosemana, omuenyo wange nda u tiamisilile lika koku enda kovipito, oku fenya olodroga loku linga upuepue.

Nda kala ukuacinyeño usa kuenda ongangala. Cosi ca moleha kokuange oco ndi yaka laco. Ovina nda lilongisa konembele ka via ñuatisile. Nda kuatele ocituwa coku popia hati, “Oku fetuluinya kua—Ñala kuenda ame ndi cimalẽho caye!” Kunyamo wo 1960 osimbu nda kala oku tanga elilongiso lia pita pokati, nda vetiyiwa oku tiamẽla kocisoko citukuiwa hati, Panteras Negras, ocimunga cimue ca kũlĩhĩwile omo lionjongole yavo yoku teyuila omanu. Nda li kongela kocisoko ci tukuiwa hati, ocimunga colondonge ci teyuila ekalo liomanu. Olonjanja vimue tua enda oku ñuala ñuala vatapalo loku yuela kuenda oku yika osikola.

Oku ñuala ñuala vatapalo loku yuela ka kua tẽlisile onjongole yange yoku kala ongangala. Omo liaco, nda fetika oku panga onepa kuyaki wolonepele viakova. Eteke limue ame lakamba vange tua ka talele o filme yimue vosinema, ya kala oku lekisa ohali yolomandekua vi tunda vo Afrika via kala ko Estados Unidos. Omo okuti ka tua solele ulandu waco, tua fetika oku tipula amalẽhe ovindele va kala vosinema. Oku sulako tua endele vosanjala ya kala ocipepi, oku sandiliya ovindele loku vi tipula.

Vokuenda kuotembo ame la va manjange, tua kũlĩhĩwile calua omo liungangala wetu. Tua kuata ovitangi lolombiali. Umue pokati ka vamanjange umalẽhe, wa kala usongui wocimunga cimue colongangala ca kũlĩhĩwile calua, nda nõlapo oku li kongela kokuavo. Omuenyo wange wa kala oku nyõleha.

NDOMO EMBIMBILIYA LIA PONGOLOLA OMUENYO WANGE:

Umue pokati kakamba vange olonjali viaye Olombangi Via Yehova. Ovo va ndi laleka oku enda kolohongele viavo, kuenje nda tava. Tunde opo nda limbuka okuti Olombangi Via Yehova via litepa. Vosi yavo va kuatele Embimbiliya peka loku li kuama vokuenda kuohongele. Amalẽhe vamue va linga olohundo kohongele! Nda komoha calua eci nda lilingisa okuti onduko ya Suku Yehova, loku yeva ndomo ya kala oku tukuiwa. (Osamo 83:18) Vekongelo liaco mua kala omanu valua vakuekova lialitepa, pole ka pa kale olonepele viakova.

 Kefetikilo, sia yonguile oku lilongisa Embimbiliya Lolombangi Via Yehova, pole nda sola olohongele viavo. Eteke limue luteke, osimbu nda kala kohongele Yolombangi Via Yehova, akamba vange va ka nyanele. Ovo va veta umalẽhe umue toke eci a fa, omo okuti ka tavele oku eca ocikutu caye cocipa. Oku iya eteke likuavo va kala oku litunula, omo lieci va linga. Eci va tualiwa kombonge va fetika oku yola yola. Valua pokati kavo va kapiwa vokayike. Ndi pandula calua omo sia kalele lavo kuteke waco. Nda nõlapo oku linga epongoloko komuenyo wange kuenda oku fetika oku lilongisa Embimbiliya.

Omo okuti nda pitisile kovaso ocituwa coku lekisa olonepele viakova, ocina nda mõla Kolombangi Via Yehova ca ñomohisa calua. Eci Ombangi yimue ya Yehova okuti ocindele a sukilile oku linga ungende, wa sia omãla vaye kepata limue okuti ovimbundu. Handi vali, epata limue liovindele lia yekisa konjo yavo umalẽhe umue cimbundu ka kuatele apa a kala. Nda limbuka okuti Olombangi Via Yehova via siata oku tẽlisa olondaka vi sangiwa kelivulu lia Yoano 13:35: “Kokulisola kuene pokati oko omanu vosi va—limbukila okuti vulondonge viange.” Nda limbukavo okuti nda sanga ongongela yocili.

Poku lilongisa Embimbiliya nda limbuka okuti nda sukilile oku pongolola ovisimĩlo viange. Sia pongoluile ovisimĩlo viange oco ndi kale lika ukuambembua, pole nda limbukavo okuti owo omuenyo wa sunguluka. (Va Roma 12:2) Vokuenda kuotembo nda linga apongoloko. Kosãi ya Susu yunyamo wo 1974, nda papatisiwa kuenje nda linga Ombangi ya Yehova.

Sia pongoluile ovisimĩlo viange oco ndi kale lika ukuambembua, pole nda limbukavo okuti owo omuenyo wa sunguluka

Noke lioku papatisiwa, nda sukilile oku li kandangiya kocituwa cange. Eteke limue osimbu tua kala oku kunda konjo lanjo, nda yoloka locimunu ca nyana o radio vekãlu liange. Eci pa kambele ño kamue oco ndu kuate, o radio wa yi kupuila posi kuenje wa tila. Eci nda sapuila vakuetu okuti o radio yange nda tiuka layo, ukulu umue wekongelo wa ndi pula ndoco, “a Stephen, nye nda wo linga nda wo kuatele?” Epulilo eli lia mbetiya oku sokolola kuenda oku li kolisilako oku kala ukuambembua.

Kosãi ya Mbalavipembe yunyamo wo 1974, nda fetika upange wotembo yosi, loku eca 100 colowola kupange woku longisa Embimbiliya komanu olosãi viosi. Noke nda kuata esumũlũho lioku talavaya kosungu Yolombangi Via Yehova ko Brooklyn, Nova Yorke. Kunyamo wo 1978, nda tiukila ko Los Angeles oku tata ina yange wa kala oku vela. Noke lianyamo avali, nda kuela la Aarhonda. Eye wa ñuatisa calua osimbu tua kala oku tata ina yange toke eci Inange a fa. Vokuenda kuotembo, ame la Aarhonda tua lalekiwa Kosikola yo Gileada yo Torre de Vigia, kuenje tua tumiwa ko Panama, kuna tua amamako lupange umisionaliu.

Tunde eci nda papatisiwa nda pita voloseteko vialua, okuti nda via mbetiya oku lekisa ungangala. Nda lilongisa okuti oco si ka lekise ungangala nda sukilile oku tunda pokati komanu vana va kala oku ndi sanumula ale ndi li kandangiya. Omanu valua oku kongelamo ukãi wange va ndi kuatisa oku litunda ciwa konepa yaco. Nda komõha omo liapongoloko nda linga komuenyo wange! Pole, apongoloko aco sia a lingile lika lelikolisilo liange muẽle. Nda limbuka okuti nda a linga omo liunene Wembimbiliya.Va Heveru 4:12.

NDOMO NDA KUATISIWA:

Embimbiliya lia ndi kuatisa oku kuata ocimãho komuenyo kuenda lia ndongisa oku kala ukuambembua. Kaliye si tipula vali omanu, pole ndi va kuatisa oku kuata ukamba la Suku. Nda longisavo Embimbiliya komunu una wa kala unyali wange kosikola yelilongiso lia pita pokati! Noke lioku papatisiwa tua kala kumosi vohondo yimuamue vokuenda kuotembo yimue. Tunde kotembo yaco, tua linga akamba vawa. Toke cilo, ame lukãi wange tua kuatisa eci ci pitahãla 80 komanu oku kala Olombangi Via Yehova.

Ngeca olopandu ku Yehova omo lioku ndi kuatisa oku kuata ocimãho komuenyo kuenda esanju lioku kala vongongela yocili la vamanji.