Skip to content

Skip to table of contents

Olombangi Via Yehova

Select language Umbundu

 OKU SAPELA LOMUNU O KASI POSONGO YETU

Momo Lie ku Lingiwila Ocipito Colofa Via Yesu?

Momo Lie ku Lingiwila Ocipito Colofa Via Yesu?

Ombangulo yi kuãimo, yi lekisa ndomo Ombangi ya Yehova yi sapela lomunu umue posongo yaye. Tu sokololi ndu okuti Ombangi yimue ya Yehova yi tukuiwa hati, Megan ya enda konjo yukãi umue o tukuiwa hati, Shirley oco a sapele laye.

“CI LINGILI ONJIVALUKO”

Megan: A Shirley. Nda sola calua oku ku mola konjivaluko yolofa via Yesu Kristu o Semana yapita. * Wa sola ohongele yaco?

Shirley: Nda sola oku kalako, pole oku popia muẽle ocili, sia kuatele elomboloko liovina viosi via lomboluiwa. Nda muĩle ale omanu va linga ocipito coku citiwa kua Yesu Ponatale kuenda epinduko liaye po Paskoa, pole lalimue eteke nda yevele omunu umue oku linga ocipito colofa viaye.

Megan: Ocili okuti o Natale kuenda o Paskoa ovipito vimue via siata voluali. Pole, Olombangi Via Yehova via kapako esilivilo lioku ivaluka olofa via Yesu. Nda o kuete otembo, hu lekisa esunga liaco.

Shirley: Ciwa, ñuete otembo.

Megan: Olombangi Via Yehova vi linga ocipito colofa via Yesu momo, eye wa eca onumbi yoku ci linga. Kũlĩhisa eci ca pita kuteke eci Yesu handi ka file. Anga hẽ wa yevele ale eci catiamẽla kondalelo yilikasi a linga lolondonge viaye?

Shirley: O kasi hẽ oku popia Ondalelo ya Sulako?

Megan: Oco. Oyo yi tukuiwavo okuti, Ondalelo ya Ñala. Vokuenda kuondalelo yaco, Yesu wa eca kolondonge viaye olonumbi via sunguluka. Citava hẽ oku tanga olondaka viaye vi sangiwa kelivulu lia Luka 22:19?

Shirley: Ciwa. “Wa nyañula ombolo, kuenje eci a yi panduila, wa yi timbula, yu wa yeca kokuavo hati, ‘Eli etimba liange lio wecelui. Ci lingili onjivaluiso yange.’”

Megan: Nda pandula. Kũlĩhisa onumbi Yesu a eca kesulilo liocinimbu: “Ci lingili onjivaluiso yange.” Kuenda osimbu handi ka handelekele olondonge viaye oco vo wivaluke, Yesu wa va sapuila eci ovo va sukilile oku linga oco vo wivaluke. Eye wa popia hati, omuenyo waye weciwa omo liolondonge viaye. Yesu wa situlula ocisimĩlo cimuamue, ndomo ca sonehiwa kelivulu lia Mateo 20:28. Ocinimbu caco ci popia ndoco: “Molomanu keyilile oku vumbiwa, te oku vumba, loku eca omuenyo waye ndocimuenyo coku yovola va lua.” Eli olio esunga lieci, Olombangi Via Yehova anyamo osi va lingila ocipito colofa via Yesu—oco va ivaluke ocilumba cocisembi eye a eca. Olofa via Yesu vi lomboloka omuenyo komanu vakuepokolo.

MOMO LIE OCISEMBI CA SUKILIWILE?

Shirley: Nda yevele ale omanu oku popia okuti Yesu wa fa oco tu kuate omuenyo. Pole, oku popia muẽle ocili siala kuata elomboloko liesunga liaco.

Megan: Haveko lika a Shirley. Ka ca lelukile oku kuata elomboloko liulandu wocisembi ca Yesu.  Pole, ulandu waco, u kuete esilivilo lia lua Vondaka ya Suku. Anga hẽ, citava okuti tu amamako lombangulo yetu?

Shirley: Ci tava.

Megan: Ciwa. Nda tanga ale ulandu watiamẽla kocisembi, cilo ndi seteka oku ku u lomboluila lonjila yimue ya leluka.

Shirley: Ciwa.

Megan: Oco o kuate elomboloko liocisembi, tete tu sukila oku kuata elomboloko liocitangi ca pita la Adama la Eva eci va linga ekandu vocumbo Cedene. Oco tu kuate elomboloko liulandu waco, tu tangele kumosi elivulu lia Va Roma 6:23. Citava okuti o tanga ocinimbu caco?

Shirley: Ci tava. Tu tangako ndoco: “Onima yekandu okufa, puãi ocali ca eciwa la Suku oco omuenyo ko pui vu Kristu Yesu Ñala yetu.”

Megan: Nda pandula. Tu kũlĩhĩse olondaka evi. Tete kũlĩhĩsa ndomo ocinimbu ci fetika: “Onima yekandu oku fa.” Eci, ocihandeleko cimue ca leluka Suku a tumbikile tunde kefetikilo, okuti onima yekandu oku fa. Ocili okuti, kefetikilo, lomue wa kala ukuekandu. Adama la Heva va lulikiwa okuti va lipua, kuenda omãla vavo nda va citiwa okuti va li pua. Nda ka kua kale esunga lioku fa. Adama la Heva kuenda ocitumbulukila cavo, nda va kuata omuenyo ko pui lesanju. Pole, ndomo tua ci kũlĩha ovina ka vi kasi ndeci nda via kala, ale vi kasi?

Shirley: Sio. Adama la Heva va lia kepako va va lunguile hati ka citava oku liako.

Megan: Ocili. Poku ci linga—va nõlapo oku sinĩla Suku—kuenje va linga ekandu. Omo liaco, va nõlapo ekambo lioku li pua, oco va linge vakuakandu. Onjila va nõla, ka ya kokele lika ovitangi ku Adama la Heva, pole lo ko citumbulukila cavo.

Shirley: Nye o yongola oku popia?

Megan: Linga nukule ocindekaise cimue. O sole hẽ oku panga olombolo?

Shirley: Oco! Ndi sole oku panga.

Megan: Sokolola okuti o kuete ofoloma yokaliye yoku panga olombolo. Pole, eci handi kua talavayele layo yi kupukila posi kuenje yi penga. Nye ci pita lolombolo vi pangiwa vofoloma yaco? Olombolo viaco ka vi pengivo?

Shirley: Ocili, vi penga.

Megan: Cimuamue aco, Adama la Heva poku nõlapo oku sinĩla Suku, va kuatavo “ocitangi” cekandu kuenda ekambo lioku li pua. Omo lioku kala vakuekandu eci handi ka va citile omãla, omãla vavo vosi va citiwavo “locitangi.” Vosi yavo va citiwa lovitangi vi tunda kekandu. Vembimbiliya, ondaka “ekandu” ka yi tiamisiwila lika kelinga limue pole, yi tiamisiwilavo kekalo tua piñala. Omo liaco, ndaño okuti ove lame ka tua lingile cimue civĩ, kuenda eci Adama la Heva va linga ekandu ka tua citiwile handi, pole—ci kale ocitumbulukila cavo ale ocitumbulukila cetu—vosi tua sambuisiwa lekandu liaco, lekambo lioku li pua lina li tuala kolofa. Ndomo tua ci tanga kelivulu lia Va Roma 6:23, onima yi tunda kekandu olofa.

Shirley: Eci ka ca sungulukile. Momo lie omanu va talela ohali otembo ka yi pui omo liekandu lia Adama la Heva?

Megan: O kuete esunga—ka ca sungulukile muẽle. Eci haicoko lika. Omo okuti Suku esunga liaye lia li pua, wa ecelela okuti Adama la Heva va fa omo liekandu liavo pole, etu tu citumbulukila cavo, tu kuete elavoko. Suku wa linga eliangiliyo oco tu yovuiwe kocitangi caco. Eli olio esunga lieci kua sukiliwile ocilumba cocisembi ca Yesu. Tu tange vali elivulu lia Va Roma 6:23. Noke lioku lekisa okuti, “onima yi tunda kekandu olofa,” ocinimbu caco ca lekisavo okuti: “Puãi ocali ca eciwa la Suku oco omuenyo ko  pui vu Kristu Yesu Ñala yetu.” Omo liaco, olofa via Yesu via yulula onjila yoku yovuiwa kekandu kuenda kolofa. *

CISEMBI OMBANJAILE YA—VELAPA YA SUKU

Megan: Kuli vali etosi likuavo vocinimbu eci, ndi yongola okuti o li kũlĩhisa lutate.

Shirley: Etosi li pi?

Megan: Kũlĩhisa eci ocinimbu eci ci lekisa: “Puãi ocali ca eciwa la Suku oco omuenyo ko pui vu Kristu Yesu Ñala yetu.” Nda Yesu eye wa tala ohali kuenda wa fa, poku eca omuenyo waye oco a tu yovole, momo lie ocinimbu ci lekisila okuti ocisembi “ocali ca eciwa la Suku”? Momo lie ‘hacaliko ca tunda ku Yesu’? *

Shirley: Haka. Eci sia ci kũlĩhile.

Megan: Suku wa lulika Adama la Eva, kuenda vo lueyela eci va lekisa esino vocumbo Cedene. Eye wa yeva esumuo lialua eci omãla vaye vavali palo posi, va lekisa esino kokuaye. Pole, Yehova wa sanda onjila yoku potolola ocitangi caco. * Eye wa linga esokiyo lioku tuma ociluvo cimue cespiritu oku iya palo posi, okuti ca li pua kuenda ca eca omuenyo waye ndocilumba cocisembi. Omo liaco, eliangiliyo liocisembi, ombanjaile ya tunda ku Suku. Kulivo onjila yikuavo yi lekisa okuti ocisembi ombanjaile ya Suku. Anga hẽ wa lipulile ale evalo Suku a yeva eci Yesu a pondiwa?

Shirley: Lalimue eteke nda ci sokoluile.

Megan: Ndete ovina vimue kocitali violomapalo viomãla. Ci lekisa okuti o kuete omãla.

Shirley: Ocili, ñuete vavali, ukuenje lufeko.

Megan: Omo okuti unjali, sokolola ndomo Yehova Suku, isia ya Yesu a kala eteke Omõlaye a fa. Njongola oku popia ndoco, eye wa li yeva ndati tunde kilu poku mola Omõlaye wa soliwa oku kuatiwa, oku sepuiwa loku tipuiwa? Kuenda ndamupi Isia a li yeva eci Omõlaye a valeliwa kuti loku fa?

Shirley: Citava okuti eye wa yeva esumuo lialua. Lalimue eteke nda sokoluile kondaka eyi!

Megan: Ocili okuti, ka tu tẽla oku lombolola ciwa esumuo a yeva keteke liaco. Pole tua kũlĩha okuti eye o kuete ocikembe kuenda tua kũlĩhavo esunga lieci a ecelela ovina viaco. Esunga liaco lia lomboluiwa ciwa kelivulu lia Yoano 3:16. Citava okuti o tangako?

Shirley: Oco. Tu tangako ndoco: “Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”

Ocilumba cocisembi oco ocindekaise cavelapo cocisola

Megan: Nda pandula. Tala vali kefetikilo liocinimbu eci. Oco ci popia ndoco: ‘Suku wa sola oluali.’ Etosi lieli, ocisola. Ocisola ca vetiya Suku oku tuma Omõlaye palo posi oco a tu file. Ocili okuti ocisembi, ocindekaise cocisola ca velapo. Eci oco ci vetiya Olombangi Via Yehova, oku liongolola unyamo lunyamo, oco va ivaluke olofa via Yesu. Anga hẽ eci tua sapela ca ku lomboloka?

Shirley: Ã-a, ca ndomboloka. Nda pandula omo wa sokiya otembo yoku sapela lame ulandu owu.

Kuli hẽ ulandu umue Wembimbiliya wa ku komõhisile? O yongola hẽ oku kũlĩha catiamẽla kalongiso ale ovina Olombangi Via Yehova vi tava? Nda oco, ku ka kuate ohele yoku sapela layimue Ombangi ya Yehova. Eye o ka sanjukila oku sapela love catiamẽla kulandu waco.

^ tini. 5 Olombangi Via Yehova via siata oku liongolola onjanja yimosi vunyamo oco vi linge ocipito colofa via Yesu. Unyamo ulo, ocipito conjivaluko ci ka lingiwa Votãlo 3 ya Kupupu.

^ tini. 32 Ocipama cikuavo ci ka sandekiwa kovaso yoloneke, ci ka lombolola ndomo ocilumba cocisembi ca Yesu ci tu yovola kekandu kuenda ndomo tu kuatisiwa laco.

^ tini. 36 Ndomo ca lekisiwa Vembimbiliya, Suku la Yesu, omanu vavali va li tepa. Oco o kuate alomboluilo akuavo, tala ocipama 4, velivulu Embimbiliya li Longisa Nye? lia sandekiwa Lolombangi via Yehova.

^ tini. 38 Tala Efetikilo 3:15.