Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | YESU O POPELA—KOVINA VIPI?

Olofa Kuenda Epinduko Lia Yesu—Ceci vi Lomboloka Kokuove

Olofa Kuenda Epinduko Lia Yesu—Ceci vi Lomboloka Kokuove

“Kolela Ñala Yesu kuenje o popeliwa.”Ovilinga 16:31.

Upostolo Paulu kuenda Sila, ovo va sapuila olondaka evi ku kesongo kokayike ko Makedonia volupale luo Filipu. Nye Paulu la Sila va yonguile oku popia? Oco tu kuate elomboloko ndomo oku tava ku Yesu ku kuete elitokeko loku yovuiwa kolofa, catete tu sukila oku kũlĩha esunga lieci tu fila. Kũlĩhĩsa eci Embimbiliya li longisa.

Omanu ka va lulikiwile oco va fe

“Yehova Suku wa nyañula ulume wo kapa vocumbo ce Edene ha ci limi loku ci tata. Yehova Suku wa handeleka ulume hati, ‘Oku lia ci tava oku lialia koviti viosi viocumbo. Te lika uti woku kulĩhĩsa eci ciwa leci cĩvi, owo ka ci tava oku liako, momo eteke o liako haico o fa.’”Efetikilo 2:15-17.

Suku wa kapa ulume watete, Adama vocumbo Cedene palo posi muna mue yukile ovinyama kuenda oviti via posoka. Mua kala oviti vialua viapako vina Adama a kuatele elianjo lioku liako. Pole, Yehova Suku wa tukula uti umue loku sapuila Adama okuti ka ci tava oku liako kuenda wo lungula okuti nda waliako, haico a fa.

Adama wa tendele ndati elungulo liaco? Eye wa kũlĩhile eci ci lomboloka oku fa, momo wa muile ale ovinyama oku fa. Nda Adama wa lulikiwile oco a fe, elungulo lia Suku nda ka lia kuatele elomboloko liocili kokuaye. Pole, Adama wa kũlĩhile okuti, nda wa pokola ku Suku loku yuvula okulia kepako liuti waco, o kala otembo ka yi pui—okuti ka fi.

Omanu vamue va siata oku popia hati, uti waco u lomboloka oku lipekela, pole ondaka eyi haciliko. Momo Yehova wa yonguile okuti Adama lukãi waye Heva, va ‘licita loku siata’, kuenda va ‘yukisa oluali loku lu yula.’ (Efetikilo 1:28) Elungulo eli li tiamisiwila kuti. Yehova wa tukula uti waco hati, “uti woku kulĩhĩsa eci ciwa leci cĩvi” momo wa kala ocindekaise comoko yaye yoku lekisa komanu eci ciwa leci cĩvi. Adama nda ka lile kepako liuti waco, nda ka lekisile lika epokolo liaye, pole nda wa lekisavo ocisola caye ku Una wo lulika haeye wo sumuluisa.

 Adama wa fa omo lioku sinĩla Suku

“[Suku] wa sapuila Adama hati: ‘Omo wa . . . lia kuti una nda ku handeleka, . . . o lialia okulia kuove lesalamĩho liokopolo yove, toke eteke o tiukila vali keve; momo haiko wa tundile. Ove ukueve, keve haiko o tiukila.’”Efetikilo 3:17, 19.

Adama walia kuti vohandelekele okuti ka citava oku liako. Elinga liaco lia kala esino liocili. Handi vali, lia lekisa etombo kovina viosi viwa Yehova o lingila. Adama poku lia kepako liaco, wa nyehula Yehova, loku nõlapo oku lisonguila eye muẽle kuenje co nenela ovitangi.

Ndomo Yehova a ci popele, Adama weya oku fa. Suku wa lulikile Adama “leve lioposi” kuenda wo sapuilile okuti “haiko o tiukila.” Adama ka pongolokele ociluvo cikuavo ale oku kala kocitumalo cimue ciñi. Eci a fa ka kuatele vali omuenyo, momo wa linga ndeve kuna a tundile.Efetikilo 2:7; Ukundi 9:5, 10.

Etu tu fa omo tua tunda ku Adama

“Ndeci ekandu lia iñila voluali lomunu umuamue, kuenda okufa kueya lekandu, haico okufa kua sambukila omanu vosi, momo vosi va linga ekandu.”Va Roma 5:12.

Esino ale ekandu—lia Adama lia—nena ovitangi vialua. Adama poku linga ekandu, ka pumbile lika epuluvi lioku kala 70 ale 80 kanyamo, pole wa pumba esumũlũho lioku kala otembo ka yi pui lomuenyo. Handi vali, eci Adama a linga ekandu, wa pumbavo ekalo lioku lipua kuenje ca sambukila kocitumbulukila caye cosi.

Vosi yetu tu citumbulukila ca Adama. Omo okuti tua tunda kokuaye, lomue wa linolela ekambo liaco lioku lipua lina lia tunda kekandu hailio lia nena olofa. Paulu wa lombolola ciwa ekalo lietu. Eye wa soneha hati: “Ame ndukuetimba, haime ndupika wekandu. Ndukuelamba we! Helie o mopela ketimba liokufa oku?” Noke wa tambulula epulilo liaye muẽle hati: “Mitakati Yesu Kristu, haeye Ñala yetu, a pitiye olopandu ku Suku!”Va Roma 7:14, 24, 25.

 Yesu wa eca omuenyo waye oco tu kale otembo ka yi pui

“Isiaco wa tuma Omõlaye ha lingi Upopeli woluali.”1 Yoano 4:14.

Yehova Suku wa linga eliangiliyo lioku tu yovola kekandu kuenda keyambulo liolofa. Ndamupi? Eye wa tuma Omõlaye o soliwe tunde kilu oco a citiwe ndomunu wa lipua ndeci Adama a kala. Ca litepa la Adama, ceci okuti Yesu “ka lingile ekandu.” (1 Petulu 2:22) Omo okuti wa lipuile, ka kaile vemehi liekandu kuenda wa ponduile oku kala otembo ka yi pui ndomunu wa lipua.

Yehova wa ecelela okuti, Yesu o pondiwa lovanyali vaye. Noke lioloneke vitatu, Yehova wo pindula letimba liespiritu lina a tiukila lalio kilu noke yotembo yimue. Eci a pitila kilu, Yesu wa eca ku Suku esilivilo liomuenyo waye wa lipua oco a yovole cina Adama a pumba leci a pumbisa ocitumbulukila caye. Yehova wa tava ocilumba caco, kuenje ca ecelela okuti vana va lekisa ekolelo ku Yesu va tambula omuenyo ko pui.Va Roma 3:23, 24; 1 Yoano 2:2.

Yesu wa tumbulula eci Adama a pumba. Eye wa tu fila oco tu kuate omuenyo ko pui. Embimbiliya li popia hati: “Yesu . . . wa tala ohali lokufa, oco wa futisua lulamba lesumbilo, okuti, locali ca Suku, o mahela omanu vosi okufa.”Va Heveru 2:9.

Eliangiliyo liaco li situlula ovina vialua viatiamẽla ku Yehova. Ocihandeleko ca Yehova cesunga ka ci ecelela okuti omunu ka lipuile o liyovola eye muẽle. Omo liaco, ocisola caye kuenda ohenda vio vetiya oku tẽlisa ocihandeleko caye poku tuma Omõlaye oco a ece ofeto—yondando yocisembi ndaño okuti ca tĩlile calua kokuaye.Va Roma 5:6-8.

Yesu wa pinduiwa kolofa kuenda vakuavo va ka pinduiwavo

“Kristu wa pinduiwa kuava va fa, haeye epako liatete kuava va fa. Omo okuti okufa kueya omo liomunu umuamue, epinduko liava va fa lieyavo lomunu umuamue. Momo, ndeci vosi va fa omo lia Adama, haico vosi va ka muila omuenyo vu Kristu.”1 Va Korindo 15:20-22.

Ocili okuti Yesu wa kala komuenyo kuenda wa fa, pole nye ci lekisa okuti eye wa pinduiwa? Umue pokati kuvangi waco wowu okuti, Yesu eci a pinduiwa wa moleha komanu valua volotembo via litepa. Onjanja yimue wa molehele kueci ci pitahãla 500 komanu. Eci Upostolo Paulu a sonehela ukanda waye ku va Korindo, wa lekisa okuti vamue pokati kolombangi viaco va kala handi komuenyo kuenda ca tavele okuti va imba uvangi wovina va mola kuenda evi va yeva.1 Va Korindo 15:3-8.

Eci Paulu a soneha okuti Kristu eye “epako liatete” ku vana va pinduiwa, wa kala oku lekisa okuti vakuavo va laikele oku pinduiwa noke. Yesu wa popia hati, ku keya otembo okuti, ‘vosi va kasi vayambo va tundamo.’Yoano 5:28, 29.

 Oco tu kale otembo ka pui, tu sukila oku lekisa ekolelo ku Yesu

“Omo Suku a sola ndoco oluali, oco a ecela Omõlaye wongunga okuti wosi u kolela ka fi, puãi o mola omuenyo ko pui.”Yoano 3:16.

Ovipama viatete Viembimbiliya vi lombolola ndomo olofa vieya kuenda ndomo Ocumbo Celau ca nyõleha. Ovipama via sulako vi lombolola ndomo Suku a ka malako olofa, loku tumbulula ongongo ha yi lingi Ofeka Yelau. Omanu va ka kala lesanju otembo ka yi pui. Elivulu Liesituluilo 21:4 li popia hati: “Okufa ka ku kalako vali.” Oco ohuminyo eyi yi kolisiwe, ocinimbu 5 ci popia hati: “Olondaka evi via sunguluka, kuenda viocili.” Ovina Yehova a likuminya, vi ka tẽlisiwa.

Ove hẽ o tava okuti “olondaka evi via sunguluka, kuenda viocili”? Lilongisa ovina vikuavo viatiamẽla ku Yesu kuenda lekisa ekolelo kokuaye. Nda wa ci linga, o ka taviwa la Yehova. Ove ku ka kuata lika asumũlũho aco cilo, pole o ka kuatavo elavoko liomuenyo ko pui Voluali Luokaliye palo posi muna okuti, “oku fa ka ku ka kalako vali, ndaño oku lila loku liyula lupongo laviovo ka vi ka kalako vali.”