Skip to content

Skip to table of contents

Olombangi Via Yehova

Select language Umbundu

 ULANDU WOMUENYO

Ovaso a Jairo—Onjila Yaye Yoku Fendela Suku

Ovaso a Jairo—Onjila Yaye Yoku Fendela Suku

O tẽla hẽ oku sokolola ekalo lietimba liove kalikuete ongusu, okuti ovaso ove lika? Eli olio ekalo lia manjange Jairo. Ndaño ndoco, lopo o kuete esanju komuenyo. Osimbu sia lomboluile esunga lieci eye a simila okuti ca velapo oku kala komuenyo, linga ndi lombolole ulandu waye.

Jairo wa citiwa luvei vowoño, u tukuiwa hati, spastic quadriplegia. * Omo liuvei waco, onepa yalua yetimba liaye ka yikuete ongusu. Owoño waye ka u tẽla oku eca ongusu kovimatamata vietimba, kuenje etimba lia lemãla. Omo lioku lisenga kuaye ocipikipiki olonjanja vimue Jairo wa siata oku lilemeha. Omanu va kasi ocipepi laye, nda ka va lavuluile va pondolavo oku lilemeha. Omo liaco, ovoko kuenda ovolu aye a sukila oku pandekiwa komangu yalola oco ka ka li lemẽhe.

OMUENYO UMUE KA WA LELUKILE OSIMBU A KALA OKU KULA

Oku kula kua Jairo, kuo kokela evalo lialua. Eci a kuata olosãi vitatu, wa fetika oku tanya, kuenje o kala ndu okuti wa fa. Olonjanja vialua, mãi wa enda oku wambata lonjanga kosipitali loku sima okuti wa fa.

Omo liovitangi viaco, etimba lia Jairo likuatiwa lociteyateya. Eci a kuata 16 kanyamo eye wa tunguka ombunda kuenje ca sukila oku u pelala vombunda. Ndi ivaluka ndomo Jairo a enda oku lila ovoteke osi omo lievalo.

Ulema wa Jairo wa koka okuti ovina viosi te volingilako ndeci okulia oku wala kuenda oku ka pekela. Tate la mãi, ovo va enda oku linga upange waco. Ndaño okuti Jairo osukila ekuatiso olonjanja vialua, olonjali vietu via siata oku u ivaluisa okuti omuenyo waye ka wa tambele lika komanu, pole wa tambavo ku Suku.

ONJILA YIMUE YOKU SAPELA

Omo okuti olonjali vietu Olombangi Via Yehova, via siata oku tangela Jairo ovolandu Embimbiliya tunde vutila waye. Ovo va kũlĩhile okuti omuenyo u kuata lika esilivilo nda omunu o kuete ukamba la Suku. Jairo ndaño okuti etimba liaye, li kasi oku amamako oku hongua, pole elavoko liaye liokovaso, lia pama. Omo liaco, ovo olonjanja vialua va enda oku lipula nda Jairo o pondola oku kuata elomboloko liukũlĩhĩso Wembimbiliya.

Eteke limue eci Jairo a kala omõla, Tate wopula ndoco, “A Jairo, citava oku sapela lame?” Eye wa amisako ndoco, “nda o ndi sole, sapela lame.” Eci Tate o pinga oco a vangule ondaka yimue, Jairo wa fetika oku lila. Ndaño okuti eye wa seteka oku  situlula ovisimĩlo viaye lolondaka, pole eye wa tẽla lika oku koma. Tate cosumuisa omo lioku lilisa Jairo. Kuenje ocindekaise caco ca lekisa okuti Jairo wa kuata elomboloko lieci Tate o sapuila. Pole, ocitangi ceci okuti eye ka ponduile oku vangula.

Ka papitile otembo yalua, olonjali vietu via limbuka okuti Jairo olonjanja vimue o pakula lonjanga, oco a situlula ovisimĩlo viaye leci a yevite. Ca enda oku sumuisa Jairo poku mola okuti omanu ka va kasi oku kuata elomboloko liovindekaise viaye. Pole eci olonjali viange via lilongisa ovindekaise viovaso aye kuenda eci a yongola, ocipala ca Jairo ca lekisa okuti wa sanjuka. Eyi ya linga onjila yaye yoku lekisa olopandu.

Ondotolo yimue yi kuatisa vana va kuete ocitangi coku vangula, wa tu sapuila hati oco tu sapele laye, tu sukila oku votola ovaka eci tu pinga kokuaye, oco a tambulule nda oco ale sio. Eka liondio li lomboloka okuti oco, liepĩli sio. Omo liaco, eye wa ponduile oku situlula onjongole yaye poku tulukila ovaso aye keka liasuapo.

OCINA CIMUE CA KUATA ESILIVILO KOMUENYO WA JAIRO

Olonjanja vitatu vunyamo Olombangi Via Yehova via siata oku linga olohongele vimbo kuenda viofeka, kuna ku lingiwa olohundo Viembimbiliya kowiñi walua. Jairo wa enda oku sanjuka calua vokuenda kuohundo ya vana va ka papatisiwa. Eteke limue, eci Jairo a kuata 16 kanyamo, Tate wa pula kokuaye hati, “a Jairo o yongola oku papatisiwa?” Eye wa vanja keka liondio lia Tate oco a situlule okuti o yongola oku papatisiwa. Noke Tate wamisako hati, “Ove wa likuminya ku Suku vohutililo oco u vumbe otembo ka yi pui”? Jairo wa vanjavo keka liondio lia Tate. Eci ca lekisa okuti Jairo wa tumbikile ale omuenyo waye ku Yehova.

Noke lia lomboluilo alua Embimbiliya, Jairo wa lekisavo okuti o kuete elomboloko lieci ci lomboloka epapatiso Liakristão. Kuenje Kunyamo wo 2004, wa tambulula epulilo liavelapo okuti lalimue eteke vo lingile epulilo liaco, liokuti: “Wa tumbika omuenyo wove ku Suku oco o linge ocipango caye?” Jairo wa tambulula epulilo liaco poku petula ovaso aye. Eyi oyo onjila apongiya oco a popie hati oco. Eci a tẽlisa 17 kanyamo, wa papatisiwa kuenje wa linga Ombangi ya Yehova.

OVASO A KUNAMELA KOVINA VIA SUKU

Kunyamo wo 2011 kua molẽha onjila yokaliye yoku sapela la Jairo okuti o kombutador yi lavulula ovaso aye. Ocimalẽho caco ci lavulula omõliso oco eye a kape ondimbukiso vo kombutador. Oku pakula ale oku tulukila kondimbukiso yimue, ci kasi ndo ku tioka lomuku yo kombutador. Kua sokiyiwa ekuadru limue likuete olondimbukiso  violondaka oco vi kuatise Jairo oku sapela. Eci eye a pakuila kondimbukiso yimue o software yi pongolola esapulo limue lia sonehiwa kondaka yi yevala.

Eci ukũlĩhiso wa Jairo Wembimbiliya wa vokiya, co vetiya oku kuata onjongole yoku kuatisa vakuavo konepa yespiritu. Vokuenda Kuefendelo lietu liepata, eye o vanja kokuange kuenda vo kombutador. Eyi oyo onjila yoku njivaluisa okuti ndi sukila oku soneha atambululo a ka eca vokuenda kuolohongele vietu vekongelo Liakristão.

Eye kohongele, lepandi o sandiliya vo kombutador poku tioka kondimbukiso a yongola, noke ondaka yangalavaliwa yi yevala kuvosi. Olonjanja viosi a vetiya manji umue vekongelo, eye o memenako. Umalẽhe umue ekamba lia Jairo o tukuiwa hati Alex, wa popia hati, ndi komoha calua eci ndi yeva atambululo a Jairo atiamẽla Kembimbiliya.

Jairo o talavaya lovaso aye a lavuluiwa lo kombutador kuenda ondaka ya ngalavaliwa, oco a ece atambululo kolohongele loku sapuilako vakuavo ovina a kolela

Jairo o talavaya lovaso aye oco a sapuile vakuavo ovina a kolela. Eye o ci linga poku tioka kocipama ci lekisa oviluvialuvia viocumbo cimue muli ovinyama kuenda omanu vakuapata osi va kasi vekalo limue liombembua. Eci a tulukila ovaso aye vondimbukiso yaco o kombutador yi yevalisa ondaka yokuti, “Elavoko Liembimbiliya lieli okuti, ongongo yi ka kala ocumbo celau muna ka mu ka kala vali oku vela kuenda olofa, Esituluilo 21:4.” Nda omunu a sanga wa lekisa onjongole, o tioka pondimbukiso yikuavo vo komputador yi popia hati, “O yongola oku lilongisa Embimbiliya lame?” Ca tu komohisa calua, momo sekulu yetu wa tava kelaleko liaco. Ci sanjuisa oku mola ndomo Jairo, a kuatisiwa lamanji umue ulume oku longisa Embimbiliya Sekulu yetu! Ci sanjuisavo oku mola okuti, Sekulu wa papatisiwa kohongele yofeka kosãi Yenyenye 2014 ko Madrid.

Ekolelo lia Jairo ku Suku lia siata oku limbukiwa lalongisi vaye kosikola. Rosario, ondotolo yimue yi kuatisa vana va kuete ocitangi coku vangula, wa popia hati: “Nda njongola oku likongela ketavo limue, ndi linga Ombangi ya Yehova. Nda siata oku mola ndomo ekolelo lia Jairo lia siata oku eca kokuaye ocimãho cocili komuenyo ndaño lovitangi.

Ovaso a Jairo olonjanja viosi a lekisa esanju eci ndu tangela ohuminyo Yembimbiliya yokuti: “Ocilema ci [ka] somboka ndosonge. Kuenda elimi liocitende limba ocisungo.” (Isaya 35:6) Ndaño okuti olonjanja vimue o sumua, eye wa siata oku lekisa ocituwa ciwa. Wa siata oku ci lekisa, omo liekolelo liaye ku Suku kuenda oku kala lakamba Akristão. Elavoko kuenda ekolelo liaye liapama vi eca uvangi wokuti oku vumba Yehova ndaño lovitangi, cinena onima.

^ tini. 5 Uvei wovowoño (CP) ondaka yimue yi kuamiwa oco ku lomboluiwe ovitangi viowoño vi tateka ovimatamata vietimba oku kuata ongusu. Uvei waco u pondolavo oku koka oku tanya, ekambo lionjongole yokulia kuenda ocitangi coku vangula. O spastic quadriplegia CP uvei umue wociteyateya wa tatama calua, u pondola oku kõlisa ovolu lovoko kuenda oku pengisa osingo.