Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | NDOMO O SANJUKILA UPANGE WA TĨLA

Oku Talavaya Calua—Kua Pita Kosimbu?

Oku Talavaya Calua—Kua Pita Kosimbu?

Alex, loku tula ocimuenyo o yelula okasia yikuavo a kala oku tuta vekãlu liokupange a talavaya. Noke o lipula hati: ‘momo lie ndi talavayela kupange waco ka u kuete onima layimue? Eteke lipi ndi kuata ekalo liwa? Omuenyo wange nda wa kala ciwa okuti si sukila vali oku talavaya!’

Ndeci ca pita la Alex, omanu valua koloneke vilo ka va sanjukila upange wavo. Arone, ulume umue ukuakusemulũla akãlu, wa popia hati: “Omanu valua va sima okuti oku linga upange una u kavisa etimba, ci nena elaviso. Ocisimĩlo cavo ceci: ‘Ndi linga ño upange waco toke eci ndi sanga upange ukuavo wa velapo.’”

Momo lie omanu valua va simĩla okuti ka va sukila oku linga upange u kavisa etimba? Citava okuti va siata oku vetiyiwa lovingungu viasapulo vina vi lekisa ekalo liomuenyo uwa. Mateo ulume umue ukuakusemulũla ovina, wa popia hati: “Omanu valua va siata oku popia hati, nda ove ku likolisilako oku talavaya calua oco o kuate ekalo liwa komuenyo, ku sangi onima yiwa.” Onjali yimue londuko Shane, o kuetevo ocisimĩlo caco. Eye wa popia hati: “Omanu koloneke vilo, ka va sanjukila vali oku talavaya oloneke viosi oco va fetiwe kesulilo liosãi.”

Pole, kuli omanu valua va siata oku sanjukila oku talavaya calua. Daniel o kuete 25 kanyamo okuti upange waye oku tunga olonjo, wa popia hati: “Ndi sima okuti oku talavaya calua kueca onima yiwa, capiãla enene nda wa tiamisila utima kovimãho via sunguluka.” Andre o kuete 23 kanyamo o tavavo kocisimĩlo caco. Eye wa popia hati: “Oco omunu a kuete esanju komuenyo, o sukila oku talavaya. Oku talavaya citito ka ku nena esanju komuenyo pole—ci kavisa ño etimba momo ka ci nena onima!”

Omanu vana va sokisiwa la Daniel kuenda Andre, va siata oku kuatisiwa ndati oku kuata ovisimĩlo via sunguluka viatiamẽla kupange? Ovo va kapako olonumbi Viembimbiliya komuenyo wavo. Embimbiliya ka li pisa oku talavaya calua, pole, li vetiya oku kala vakuambili yupange kuenda oku pandikisa. Pole Embimbiliya ka li tu vetiya lika oku talavaya. Olio li lekisavo ndomo tu sanjukila onima yupange wetu.

Ndamupi olonumbi Viembimbiliya vi pondola oku ku kuatisa oku sanjukila upange wove? Tu ku laleka oco o kũlĩhise vimue pokati kolonumbi viaco ndomo vi ka lomboluiwa vocipama ci kuãimo.