Skip to content

Skip to table of contents

Olombangi Via Yehova

Select language Umbundu

 EMBIMBILIYA LI PONGOLOLA OMUENYO WOMANU

Ocili Cembimbiliya ca Tambulula Apulilo Ange

Ocili Cembimbiliya ca Tambulula Apulilo Ange
  • A CITIWA: 1987

  • OFEKA A CITIWILA: AZERBAIJAU

  • ULANDU WOMUENYO: ISIAYE U MUSULUMANU KUENDA INAYE U YUDEA

OMUENYO WANGE KOSIMBU:

Nda citiwila ko Baku, Azerbajãu, ame ndi mõla wavali. Isiange wa kala ukuetavo lia va Musulumanu kuenda ina yange u Yudea. Olonjali viange via lisolele calua kuenda omunu lomunu wa sumbilile alongiso etavo liukuavo. Ina yange wa enda oku kuatisa isiange eci a linga ocipito co Ramadã, kuenda isiange wa enda oku kuatisa ina yange eci a linga ocipito co Paskoa. Konjo yetu tua kuata ociña co Alcorão, o Tora kuenda Embimbiliya.

Ame nda litendele ndu okuti nda tiamẽla ketavo lia va Musulumanu. Ndaño okuti, lalimue eteke nda pulile catiamẽla kekalo lia Suku, pole nda kuata apulilo amue a enda oku ndi sakalaisa. Nda enda oku lipula okuti, ‘Momo lie Suku a lulikila omanu, kuenda momo lie omunu noke yoku tala ohali yalua komuenyo waye o ka kangisiwa vali otembo ka yi pui vondalu yifelu?’ Omo okuti omanu va siata oku popia hati, ovina viosi vi pita voluali vi lomboloka ocipango ca Suku, nda enda oku lipula hati: ‘Anga hẽ Suku o kokela omanu ovitangi kuenje o sanjukila ohali yavo?’

Eci nda kuata 12 kanyamo, nda fetika oku likutilila olonjanja vitãlo veteke ndomo ci kisikiwa vovihilahila vietavo lia va Musulumanu. Vokuenda kuotembo yaco, ame la manjange isietu wa tu tuma oku ka tangela kosikola yimue ya va Yudea. Tua longisiwa ovihilahila vi sangiwa vociña co Tora kuenda elimi lio Heveru. Eteke leteke, osimbu ka tua fetikile oku tanga, tua enda oku likutilila ndomo ca kisikiwile vovihilahila via va Yudea. Komẽle poku likutilila nda enda oku kuama ovihilahila via va Musulumanu kuenje vokuenda kueteke, ndi likongela kolohutililo via va Yudea kosikola.

Nda enda oku sandiliya atambululo apulilo ange. Olonjanja vialua kosikola nda enda oku pulisa alongisi okuti: Momo lie Suku a lulikila omanu? Suku wa tenda ndati isiange ukuetavo lia va Musulumanu? Eye ulume umue uwa, momo lie a tendiwila okuti wa vĩha? Momo lie Suku o lulikila?” A tambululo nda tambula, ka a ñuatisile, pole a ndi sumuisa vali.

NDOMO EMBIMBILIYA LIA PONGOLOLA OMUENYO WANGE:

Ekolelo liange ku Suku lia nyõleha ko 2002. Noke yolosemana vimue eci tua ilukila ko Alemanya, Isiange wa pita locilunga cimue kuenje wa kala otembo yimue okuti ka vangula. Vokuenda kuanyamo nda enda oku  likutilila catiamẽla kuhayele kuenda kekalo liwa liepata liange. Omo lioku kolela okuti Tõlo o kuete unene lomuenyo kuenda olofa, eteke leteke nda enda oku likutilila kokuaye catiamẽla komuenyo wa isiange. Nda simĩle okuti, ku Suku ka ca tilile oku tẽlisa onjongole ya kamõla umue, ufeko. Nda kolelele okuti eye o pondola oku tambulula olohutililo viange. Pole noke isiange wa fa.

Poku sokolola okuti Suku ka lekisile ocikembe, ca ndi sumuisile calua. Nda fetika oku sima okuti, ‘Mbi nda likutilila lonjila yimue ka sungulukile, ale ka kuli Suku.’ Nda sumuile calua kuenda sia tẽlele vali oku kuama ovihilahila via va Musulumanu poku likutilila. Omo okuti sia yonguile vali oku kuama etavo likuavo, nda pitĩla petosi lioku popia hati ka kuli Suku.

Eci papita olosãi epandu, Olombangi Via Yehova via veta kepito lietu. Omo okuti ka tua kaile vakuetavo Liakristão, ame lamanjange ukãi, lesumbilo lialua tua yonguile oku va lekisa okuti va kasi oku longisa ovina viesanda. Tua va pula ndoco: “Momo lie Akristão va fendelela Yesu, ekulusu, Maria, kuenda oviñumañuma vikuavo, nda ovina viaco vi pisiwa Lovihandeleko Ekũi?” Olombangi via Yehova loku kuama Ovisonehua, via tu kuatisa oku limbuka okuti Akristão vocili ka va fendela oviñumañuma kuenda olohutililo vi sukila oku eciwa lika ku Suku. Eci ca ñomohisa calua.

Noke tua va pula ndoco: “Nye ci popiwa catiamẽla kelongiso lia Suku Umosi Muvatatu? Nda Yesu eye Suku, wa kala ndati palo posi loku pondiwa ndomunu?” Ovo lekuatiso Liembimbiliya va tambulula epulilo lietu kuenda va lombolola okuti Yesu Hasukuko kuenda ka lisokele Laye. Olombangi via Yehova via lombolola okuti, eli olio esunga lieci ka va tavela kelongiso lia Suku Umosi Muvatatu. Nda komoha calua kuenda nda sokolola ndoco, ‘Akristão ava va litepa la vakuavo.’

Pole, nda yonguile oku kũlĩha esunga lieci omanu va fila kuenda esunga lieci Suku a kasi oku ecelela ohali. Olombangi via Yehova via ndi lekisa elivulu Ukũlĩhĩso u Tuala Komuenyo ko Pui, * mu sangiwa ovipama via tambulula apulilo ange. Ovo, va fetika oku ndongisa Embimbiliya.

Onjanja yosi tu lilongisa, nda limbuka okuti a tambulula apulilo ange, ocili kuenda opiwa muẽle Vembimbiliya. Nda limbuka okuti onduko ya Suku, Yehova. (Osamo 83:18) Ocituwa caye ca velapo, ocisola. (1 Yoano 4:8) Eye wa lulika omanu momo wa yonguilevo oku va ĩha ombanjaile yomuenyo. Nda limbukavo okuti, ndaño Suku o kasi oku ecelela ohali, eye ka yi sole kuenda ndopo o ka yi malako otembo ka yi pui. Nda lilongisa okuti esino lia Adama la Heva, lia nena ovitangi komanu. (Va Roma 5:12) Vimue pokati kovitangi viaco, olofa viomanu vana tu sole, ndeci isiange. Pole, Suku o ka malako ovitangi viaco voluali luokaliye muna okuti vana va fa, va ka pinduiwa.Ovilinga 24:15.

Ocili Cembimbiliya ca tambulula apulilo ange. Nda fetika vali oku kolela okuti kuli Suku. Osimbu nda kala oku amamako oku kũlĩha ciwa Olombangi via Yehova, nda limbuka okuti ovo va likuete omunga voluali luosi. Elitokeko kuenda ocisola ci sangiwa pokati kavo ca ndi komõhisa calua. (Yoano 13:34, 35) Ovina nda lilongisa viatiamẽla ku Yehova, via ndi vetiya oku u vumba kuenje nda nõlapo oku kala Ombangi ya Yehova. Nda papatisiwa keteke 8 ya Susu wo 2005.

NDOMO NDA KUATISIWA:

Ovina nda lilongisa Vembimbiliya via pongolola calua omuenyo wange. A lomboluilo awa nda sanga Vondaka ya Suku, a ndi nenela ombembua yovutima. Nda sanga esanju kuenda elembeleko li tunda kelavoko lioku ka mola vali isiange eci a ka pinduiwa ndomo ca likuminyiwa Vondaka ya Suku.Yoano 5:28, 29.

Vokuenda kuanyamo epandu nda siata oku kuata esanju omo lioku likuela la Jonathan, ulume umue wa sumbila Suku. Kavali ketu tua lilongisa okuti ocili catiamẽla ku Suku ca suapo kuenda ca leluka, kuenda ukuasi umue ka u sokisiwa. Eli olio esunga lieci tua siatela oku kuata esanju poku sapela la vakuetu catiamẽla kekolelo kuenda kelavoko lietu li komohisa. Cilo Olombangi via Yehova ndi vi tenda okuti, Akristão vocili.

^ tini. 15 Lia sandekiwa Lolombangi via Yehova pole cilo ka li kasi oku pangiwa vali.