Skip to content

Skip to table of contents

Olombangi Via Yehova

Select language Umbundu

Anga hẽ tu Sukila Oku Likutilila ku Yesu?

Anga hẽ tu Sukila Oku Likutilila ku Yesu?

U LUME umue ukuaku linga akonomuiso, wa pulisa eci ci pitãhala 800 kamalẽhe vakuetavo a litepa, nda ovo va tava okuti Yesu o tambulula olohutililo. Ci pitahãla 60 koloporsentu va tambulula okuti Yesu o tambulula olohutililo. Pole, umãlehe umue ka tukuile onduko Yesu, pole wa soneha hati, “Suku”.

Ove hẽ cipi ocisimĩlo cove? Tu sukila hẽ oku likutilila ku Yesu ale ku Suku? * Oco tu sange etambululo liaco, catete tu kũlĩhĩsa ndomo Yesu a longisa olondonge viaye oku likutilila.

NDOMO YESU A CILONGISA KULIE TU LIKUTILILA?

Yesu wa longisa kuenda wa lekisa oku tu sukila oku tiamisila olohutililo vietu.

Vohutililo Yesu a linga ku Isiaye wo kilu, wa tu sila ongangu yiwa

ALONGISO AYE: Eci umue pokati kolondonge via Yesu o pinga hati, “A Ñala, tu longise oku likutilila,” Yesu wa tambulula hati: “Eci vu likutilila lingi hoti, ‘A Tate.’” (Luka 11:1, 2) Yesu Vohundo yaye a lingila Komunda, wa vetiya olonjeveleli viaye oku likutilila. Eye hati: “Likutilila ku So.” Wa va kolisavo poku va sapuila ndoco: “Isiene wa kũlĩha ovina vio sesameli osimbu ka wa vi pingili.” (Mateo 6:6, 8) Vuteke waye wa sulako palo posi, wa sapuila olondonge viaye hati: ‘Nda vu pinga cimue ku isia, u cihili vonduko yange.’ (Yoano 16:23) Ocili okuti, Yesu wa tu longisa oku likutilila ku Isiaye, Yehova Suku okuti haiye Isietu.Yoano 20:17.

ONGANGU YAYE: Ndeci Yesu a longisa vakuavo oku likutilila, haico a lingavo poku popia hati: “Pandu, pandu kokuove, a Tate, a Ñala yokilu loposi.” (Luka 10:21) Vepuluvi likuavo, “Yesu, oku petula ovaso aye, wa linga hati, ‘A Tate, hu pandula omo wa njeva.’” (Yoano 11:41) Eci a kala oku panda kolofa, wa likutilila hati: “A Tate, ñundika omuenyo wange povaka ove.” (Luka 23:46) Vohutililo a linga ku Isiaye wo kilu, okuti Ñala yokilu loposi”—wa sia ongangu yiwa koloñame viaye viosi. (Mateo 11:25; 26:41, 42; 1 Yoano 2:6) Anga hẽ eli olio elomboloko olondonge via Yesu via kuata kocita catete liatiamẽla kolonumbi viaye?

AKRISTÃO KOCITA CATETE VA ENDA OKU LIKUTILILA KULIE?

Noke yolosemana vimue tunde eci Yesu a tiukila kilu, olondonge viaye via kala oku lambalaliwa lovanyali vavo. (Ovilinga 4:18) Omo liaco va sanda oku likutilila—pole kulie va likutilila? “Vosi va likutilila ku Suku lutima umuamue,” loku pinga okuti eye amamako oku va kuatisa ‘vonduko yukuenje waye o kola, Yesu.’ (Ovilinga 4:24, 30) Olondonge via kuama olonumbi via Yesu viatiamẽla koku likutilila. Ovo ka va likutililile ku Yesu pole, va likutilila ku Suku.

Noke lianyamo amue, upostolo Paulu wa lombolola olonjila eye kumue la vamanji vakuavo va enda oku kuama poku likutilila. Poku sonehela Akristão eye wa popia hati: “Olonjanja viosi eci tu vu likutilila tu imba olopandu ku Suku Isia ya Ñala yetu Yesu Kristu.” (Va Kolosai 1:3) Paulu wa sonehelavo vamanjaye oco olonjanja viosi ‘vonduko ya Ñala yetu Yesu Kristu, va panduile Suku Tate ovina viosi oloneke  viosi.’ (Va Efeso 5:20) Volondaka evi tua limbuka okuti Paulu wa vetiya vakuavo oco va likutilile “ku Suku yavo kuenda Isia yovina viosi.”—pole va ci lingila vonduko ya Yesu.Va Kolosai 3:17.

Etu tu pondolavo oku lekisa ocisola cetu ku Yesu poku kuama olonumbi viaye viatiamẽla koku likutilila ndeci Akristão kocita catete va linga. (Yoano 14:15) Osimbu tu amamako oku likutilila lika ku Isietu wo kilu, olondaka vi sangiwa kelivulu Liosamo 116:1, 2, vi ka kuata esilivilo liocili kokuetu. Ovio vi popia hati: “Sole Yehova omo a yeva yeva ondaka yange . . . ndu vilikiya osimbu yosi ñasi lomuenyo.” *

^ tini. 3 Ndomo ca lomboluiwa Vovisonehua, Suku kuenda Yesu va litepa. Oco o sange elomboluilo likuavo liatiamẽla kondaka eyi, tanga ocipama 4 celivulu Embimbiliya li Longisa Nye? lia sandekiwa

^ tini. 11 Omo liaco, oco olohutililo vietu vi yeviwe la Suku, tu sukila oku likolisilako oku kuama olonumbi viaye. Oco o sange elomboluilo likuavo, tanga ocipama 17 celivulu Embimbiliya li Longisa Nye?