Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | O PONDOLA OKU KUATA UKAMBA LA SUKU

Ove hẽ wa Siata Oku Sapela la Suku?

Ove hẽ wa Siata Oku Sapela la Suku?

Omanu vana okuti akamba, va sandiliya oku sapela olonjanja viosi, ci kale poku lisanga ale vo telefone, vo Internet, vo lo video ale lovikanda. Oco tu kuate ukamba la Suku, tu sukila oku sapela laye olonjanja viosi. Tu ci linga ndati?

Tu pondola oku vangula la Yehova poku likutilila kokuaye. Oku likutilila ku Suku kua litepa loku sapela lomunu umue ukuotunga wetu. Poku likutilila tu sukila oku ivaluka okuti tu kasi oku sapela lu Luliki wetu, wa Velapo voluali. Eci ci tu vetiya oku likutilila lesumbilo liocili kuenda umbombe. Oco olohutililo vietu vi yeviwe la Suku, tu sukila oku kapako olonumbi vimue. Kũlĩhĩsa vimue pokati kolonumbi vitatu vi kuãimo.

Yatete, olohutililo vi sukila oku eciwa ku Yehova, okuti ku Yesu, “kosandu yimue,” ale kociñumañuma hakoko. (Etundilo 20:4, 5) Embimbiliya li popia ndoco: “Kovina viosi apingilo ene a sapuiwe ku Suku lolopandu volohutililo viene lalombelo ene.” (Va Filipoi 4:6) Yavali, olohutililo te vi eciwa vonduko ya Yesu Kristu, Omãla a Suku. Yesu wa lombolola ndoco: “Lomue iya ku Isia, te lame.” (Yoano 14:6) Yatatu, olohutililo vietu vi sukila oku likuata locipango ca Suku. Embimbiliya li popia ndoco: “Nda tu pinga cimue ca sungulukila ocipango caye eye o tu yeva.” *1 Yoano 5:14.

Akamba va sanda otembo yoku sapela olonjanja viosi

Ocili okuti oco omanu vavali vamameko oku kuata ukamba, va sukila oku kuata ocituwa coku sapela. Ndeci akamba va kapako olonumbi vivali vioku sapela, tu sukilavo oku ecelela okuti Suku o vangula letu kuenda oku u yevelela osimbu a vangula. Ove hẽ wa kũlĩha ndomo Suku a vangula letu?

Koloneke vilo, Yehova o “vangula” letu lekuatiso Liembimbiliya. (2 Timoteo 3:16, 17) Momo lie tu ci popela ndoco? Kũlĩhĩsa ocindekaise eci: Sokolola ndu okuti wa tambula ukanda wa tunda kekamba limue. Noke lioku u tanga, lesanju o sapuilako vakuene hati, “nda yeva esapulo lia tunda ku kamba liange!” Ove wa sapela lekamba liove poku tanga ukanda a ku tumisa. Cimuamue haico okuti, poku tanga Embimbiliya, o kasi oku ecelela okuti Yehova o sapela love. Gina, wa tukuiwa kocipama catete—wa popia hati: “Oco Suku a ndi tende ndekamba liaye, ndi sukila oku tanga ukanda waye okuti, Embimbiliya.” Noke wa amisako hati: “Oku tanga Embimbiliya oloneke viosi ci ñuatisa oku amẽla ku Suku.” Ove hẽ ecelela okuti Yehova o sapela love oloneke viosi poku tanga Embimbiliya eteke leteke? Poku ci linga, ci ku kuatisa oku kuata ukamba la Suku.

^ tini. 5 Oco o sange elomboluilo li lekisa ndomo o pondola oku kuata ukamba la Suku, tanga ocipama 17 celivulu Embimbiliya Li Longisa Nye? lia sandekiwa Lolombangi Via Yehova.