Skip to content

Skip to table of contents

Olombangi Via Yehova

Select language Umbundu

 EMBIMBILIYA LI PONGOLOLA OMUENYO WOMANU

Nda Pitisile Lika Kovaso Olonjongole Viange

Nda Pitisile Lika Kovaso Olonjongole Viange
  • UNYAMO A CITIWA: 1951

  • OFEKA A CITIWILA: ALEMANYA

  • ULANDU WOMUENYO: EPELA KUENDA OKU LITUMILA AME MUẼLE

OMUENYO WANGE KOSIMBU:

Eci nda kala omõla, epata liange lia kala ocipepi lolupale luo Leipzig, Kutundilo wo Alemanya, ocipepi lofeka yo Tcheca, kuenda kongave yo Polonia. Eci nda tẽlisa anyamo epandu, omo liupange wa isiange tua ilukila kolofeka vikuavo ndeci: Ko Brazil kuenda ko Ekuador.

Eci nda tẽlisa 14 kanyamo, nda tumiwile kosikola yimue ko Alemanya. Omo okuti olonjali viange via kala ocipãla Kombuelo yo Amerika, nda sukilile oku litekula ame muẽle. Omo liaco, nda nõlapo oku linga cosi ndi yongola. Sia simĩle okuti ovina vĩvi ndi linga vi pondola oku sumuisa omanu vakuavo.

Eci nda tẽlisa 17 kanyamo, olonjali viange via tiuka ko Alemanya. Tete nda kala kumue lavo. Pole, omo liocituwa cange coku litumila ame muẽle, sia tẽlele oku lekisa epokolo kolonjali viange. Eci nda tẽlisa 18 kanyamo nda tunda konjo.

Noke, nda fetika oku sakalala omo lioku sandiliya ocimãho comuenyo. Eci nda mõla ekalo lia litepa liomanu valua, nda limbuka okuti ocina ca velapo ndi sukila oku linga, oku kũlĩha ciwa ongongo yetu ya posoka yi kasi oku nyõliwa lomanu.

Nda tunda ko Alemanya, nda landa omoto, kuenje nda enda vo Afrika. Pole, ndeya oku tiukila kocifuka co Europa oco ndi semulũle omoto yange. Noke liotembo yimue, nda endele kohulo yokalunga kofeka Yoputu. Kuenje nda nõlapo oku liwekapo oku linga ovongende lomoto, oco ndi linge ovongende lowato.

Noke nda likongela kocimunga camalẽhe vamue va kala oku lipongiya oco va linge ungende woku yoka Okalunga ko Atlantiku. Pokati kamalẽhe vaco nda sangapo ufeko umue o tukuiwa hati Laurie okuti, eye ndeya oku kuela. Tete, tua linga ungende toke kovifuka vio Karibe. Noke yoku kala otembo yimue vocifuka co Portu Riku, tua tiukila vali ko Europa. Kuenje, tua kuata onjongole yoku sanga owato umue okuti tu u semulũla oco u linge onjo yetu. Noke liolosãi vitatu loku sandiliya owato waco, ka tua tẽlisile onjongole yetu. Momo nda ambatiwa lasualali vo ko Alemanya.

Nda kala 15 kolosãi lasualali vakuakuteyuila okalunga ko Alemanya. Vokuenda kuotembo yaco, nda tokekisa olohuela  lukãi wange Laurie, kuenje tua lipongiya oco tu amameko lomuenyo wetu woku linga ovongende. Osimbu sia endele kupange wusualali, tua landa owato umue, kuenje tua u semulũla oco tu linge lawo ovongende. Osimbu nda kala kusualali tua semulũla owato waco utito oco u tu kuatise oku linga ovongende vokalunga. Noke tua linga esokiyo lioku kala vowato waco, oco tu kũlĩhe ciwa ongongo yetu ya posoka. Eci nda tunda kupange wusualali osimbu ka tua malẽle oku semulũla owato wetu, tua li sanga Lolombangi Via Yehova, kuenje via fetika oku tu longisa Embimbiliya.

NDOMO EMBIMBILIYA LIA PONGOLOLA OMUENYO WANGE:

Tete, sia limbukile esunga lieci ndi sukilila oku linga apongoloko komuenyo wange. Omo nda tokekisile ale olohuela lukãi nda kala laye, kuenda kotembo yaco nda liwekapo oku sipa. (Va Efeso 5:5) Omo okuti tua lingile esokiyo lioku linga ovongende voluali luosi, nda simĩle okuti oku pesila otembo yetu koku tala ovina vi komõhisa Suku a lulika, oco ocina ca velapo tu sukila oku linga.

Ocili okuti, nda sukilile oku linga apongoloko—komuenyo wange. Omo okuti nda kuatele epela, nda tiamisilile lika utima kovina ndi tẽla oku linga, kuenda nda pitisile kovaso olonjongole viange muẽle.

Eteke limue, nda tanga ulandu Wohundo Yesu a lingila Komunda. (Mateo kovipama 5-7) Tete sia kuatele elomboloko liatiamẽla kesumũlũho Yesu a tukula. Eye wa popia hati, vana va kuete onjala lenyona va sumũlũha. (Mateo 5:6) Nda kuata atatahãi londaka a popia hati, vana va sukila ekuatiso va sumũlũha. Osimbu nda kala oku amamako oku lilongisa Embimbiliya nda limbuka okuti vosi yetu tu sukila oku kuata ukamba la Suku. Pole, tu sukilavo oku limbuka usuke waco osimbu ka tu kuete elomboloko liovina viaco. Yesu wa popia hati: “Vakuosuke wovutima va sumũlũha.”Mateo 5:3.

Noke yoku fetika elilongiso lietu Liembimbiliya kofeka yo Alemanya, ame kumue lukãi wange Laurie, tua ilukila kofeka yo Fransa, noke tueya oku enda ko Italia. Kolofeka viosi tua endele tua sanga Olombangi Via Yehova. Nda komõha calua omo liocisola va likuetele pokati, kuenda ukamba u kasi pokati kavo. Kuenje, nda limbukavo okuti, Olombangi Via Yehova vi li kuetele ukamba la vamanji voluali luosi. (Yoano 13:34, 35) Noke liotembo yimue ame kumue lukãi wange tua papatisiwa, kuenje tua linga Olombangi Via Yehova.

Noke liepapatiso, nda amamako oku linga apongoloko komuenyo wange. Ame kumue lukãi wange tua nõlapo oku linga ungende vokalunga kohulo yocifuka co Afrika loku yoka Okalunga ko Atlantiku, kuenje tua endele kofeka yo Estados Unidos. Eci tua pitĩla vokati kokalunga lowato wetu utito, poku mõla ovava alua nda limbuka okuti, si sokisiwa Lululiki wetu, momo o kuete unene wa velapo. Omo okuti tua kala oku linga ungende vokalunga, ka tua kuatele upange tu linga, kuenje, nda nõlapo oku pesila otembo yalua koku tanga Embimbiliya. Nda komõha calua eci nda lilongisa ovolandu atiamẽla komuenyo wa Yesu eci a kala palo posi. Ndaño wa kala omunu umue wa lipua okuti wa kuatele uloño woku linga ovina vialua, pole ka livelisilepo. Handi vali, ka pitisile kovaso olonjongole viaye muẽle, pole wa tiamisilile utima waye koku linga ocipango ca Isiaye wo kilu.

Nda limbuka okuti, ndi sukila oku pitisa kovaso Usoma wa Suku komuenyo wange

Osimbu nda kala oku sokolola ovolandu atiamẽla komuenyo wa Yesu nda limbuka okuti, ndi sukila oku pitisa kovaso Usoma wa Suku, pole nda yuvula oku tiamisila utima kovina vialua nda yonguile oku linga. (Mateo 6:33) Eci ame kumue lukãi wange tua pitĩla ko Estados Unidos, tua liwekapo oku linga ovongende, kuenje tua nõlapo oku kala kofeka yaco, oco tu tiamisile utima wetu koku fendela Yehova.

NDOMO NDA KUATISIWA:

Kosimbu, eci nda kuatele ocituwa coku likolela ame muẽle, sia tẽlele oku nõla ciwa onjila ndi kuama. Pole, cilo nda sanga ono yuloño u pondola oku ndi songuila. (Isaya 48:17, 18) Nda limbukavo esilivilo liomuenyo sia kũlĩhĩle kosimbu liatiamẽla koku fendela Yehova Suku, kuenda oku kuatisa omanu oku lilongisa ovina viatiamẽla kokuaye.

Omo okuti ame kumue lukãi wange tua kapako olonumbi Viembimbiliya, tua pamisa olohuela vietu. Tua sanjukavo calua omo lioku kuata omõla umue ukãi wa posoka calua okuti, wa kũlĩha Yehova kuenda u kuetele ocisola.

Olonjanja vimue ca tĩla oku kuata omuenyo wa leluka. Pole, lekuatiso lia Yehova tua nõlapo oku amamako oku kolela kokuaye.Olosapo 3:5, 6.