Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | USOMA WA SUKU—U LOMBOLOKA NYE KOKUOVE?

Ceci Usoma wa Suku—u Lomboloka ku Yesu

Ceci Usoma wa Suku—u Lomboloka ku Yesu

Yesu vokuenda kupange waye woku kunda palo posi, wa vangula ovolandu alua. Eye wa longisa olondonge viaye ndomo vi likutilila, ndomo va pondola oku sanjuisa Suku, kuenda ndomo va pondola oku sanga esanju liocili. (Mateo 6:5-13; Marko 12:17; Luka 11:28) Pole, eci a vangula vali enene okuti oco a solele calua, Usoma wa Suku.Luka 6:45.

Ndomo ca lomboluiwa vocipama ca pita, Yesu wa tiamisilile omuenyo waye koku “kunda kuenda oku sapula ondaka yiwa Yusoma wa Suku.” (Luka 8:1) Eye wa lieca olumue, wa linga ovongende anene kovaimbo osi a va Isareli oku longisa omanu catiamẽla Kusoma wa Suku. Ulandu watiamẽla kupange wa Yesu woku kunda, wa lomboluiwa Vavanjeliu akuãla, ana a tukula Usoma ci pitahãla 100 kolonjanja. Olondaka viaco viatiamẽla Kusoma via tukuiwa la Yesu. Pole olondaka viaco vi eca uvangi wovina vialua eye a popia viatiamẽla Kusoma wa Suku.Yoano 21:25.

Momo lie Yesu a velisililepo Usoma eci a kala palo posi? Eye wa kũlĩhĩle okuti Suku wo nõla oco a linge Osoma Yuviali waco. (Isaya 9:6; Luka 22:28-30) Pole, Yesu ka tiamisilile lika utima koku tambula unene ale ulamba. “Osimbu a kala oku enda, umue wo lupukila, kuenje eci o sanga, wo kekamela loku u pula hati: “Olongisi uwa, ndinga nye oco ndi kuate omuenyo ko pui? (Mateo 11:29; Marko 10:17, 18) Eye wa tiamisilile utima kocina cikuavo ca velapo okuti olonjongole viaye vi sule. Catete Yesu wa kũlĩhĩle eci Usoma wa Suku * u ka lingila vana a sole ndeci—Isiaye wo kilu kuenda olondonge viaye vakuekolelo.

CECI USOMA WA SUKU U KA LINGILA ISIA YA YESU

Yesu o sole calua Isiaye wo kilu. (Olosapo 8:30; Yoano 14:31) Eye wa siata oku komoha calua ovituwa via Isiaye ndeci, ocisola Caye, ocikembe, kuenda esunga Liaye. (Esinumuĩlo 32:4; Isaya 49:15; 1 Yoano 4:8) Omo liaco, Yesu wa siata oku sumua calua poku yeva ovohembi a sandekiwa atiamẽla ku Isiaye. Amue pokati kovohembi aco vava oku popia hati—Suku ka kapeleko ohali yomanu kuenda o yongola okuti tu tala ohali. Eli olio esunga limue lieci Yesu a kuatela ombili yoku kunda ‘olondaka viwa Viusoma,’ momo wa kũlĩhile okuti kovaso yoloneke—Usoma u ka malako alundi osi a lingiwa ku Isiaye. (Mateo 4:23; 6:9, 10) Ci ka lingiwa ndati?

Yehova lekuatiso Liusoma, o ka yovola omanu kohali. Eye o ka “puenya asuelela osi kovaso” omanu vakuekolelo. Eye o ka malako ovina viosi vi nena asuelela poku kũlĩhĩsa okuti, “okufa ka ku kalako vali, ndaño oku lila loku liyula lupongo laviovo ka vi kalako vali.” (Esituluilo 21:3, 4) Lekuatiso Liusoma, Suku o ka malako ohali yosi yomanu. *

 Oku kũlĩha okuti Yesu wa solele oku longisa omanu catiamẽla Kusoma, ka ci komohisa! Eye wa kũlĩhĩle okuti Usoma u ka situlula unene kuenda ohenda ya Isiaye. (Tiago 5:11) Yesu wa kũlĩhĩlevo okuti Usoma u ka kuatisa vana a sole—okuti omanu vakuekolelo.

CECI USOMA U KA LINGILA OMANU VAKUEKOLELO

Yesu osimbu keyile palo posi, wa kala la Isiaye kilu. Isia wa talavaya Lomõlaye poku lulika ovina viosi ndeci, ilu loviengele vialua violombungululu vina via posuisa ilu kuenda oviendalomuenyo via tungamo. (Va Kolosai 1:15, 16) Handi vali, ‘wa sanjukila calua’ omãla vomanu.Olosapo 8:31.

Upange wa Yesu woku kunda, wa situlula ciwa ocisola a kuatela omanu. Tunde kefetikilo wa lekisa okuti weya palo posi oku kundila olosuke “ondaka yiwa.” (Luka 4:18) Pole, Yesu wa linga vali ovina vialua okuti oku longisa omanu ci sule. Vapuluvi alua wa lekisa ocisola a kuatela omanu. Onjanja yimue eci owiñi walua wa liongoluile oku yevelela elongiso liaye, wa ‘va kuatela ohenda, kuenje wa sakula olombei viavo.’ (Mateo 14:14) Eci ulume umue ombei a lekisa ekolelo liokuti Yesu o pondola oku u sakula nda wa panga, eye wa vetiyiwa locisola. Yesu lohenda yalua wa sakula ulume waco kuenje wo sapuila hati: “Nda panga, kaya.” (Luka 5:12, 13) Eci Yesu a mõla ekamba liaye Maria o kasi oku lisiõsiõla calua omo liolofa via manjaye Lasaru, “ocikembe co kuata kuenje wa tokotelua” yu “wa lila.” (Yoano 11:32-36) Noke wa linga—ocina cimue ci komõhisa poku pindula Lasaru wa kala ale oloneke vikuãla veyambo!Yoano 11:38-44.

Yesu wa kũlĩhĩle okuti ekuatiso a kala oku eca ka li tumãla otembo yalua. Momo vana a sakula va vela vali kuenda vana a pindula va fa vali. Eye wa kũlĩhĩle okuti Usoma wa Suku owo lika u ka malako ovitangi viaco otembo ka yi pui. Eli olio esunga lieci Yesu ka lingilile lika ovikomo pole, wa lekisavo ombili yoku kunda “ondaka yiwa Yusoma.” (Mateo 9:35) Ovikomo viaye via lekisa eci Usoma wa Suku u ka lingila omanu voluali luosi. Kũlĩhĩsa eci Embimbiliya lia likuminya catiamẽla kotembo yaco.

  •  Ovitangi vioku vela ka vi ka kalako vali.

    Kotembo yaco, “ovaso olomeke a ka patuluka kuenda ovatuĩ ovisitatuĩ a ka situluka. Oco ocilema ci somboka ndosonge. kuenda elimi liocitende limba ocisungo.” Handi vali, “Layimue onungi yi [ka] popia yiti, Ndi vela.”Isaya 33:24; 35:5, 6.

  • Oku fa ka ku kalako vali.

    “Olondingesunga vi piñala ofeka, vi tungamo oloneke ka vi pui.”Osamo 37:29.

    “O takisa olumue oku fa, kuenje Ñala Yehova o puenya asuẽlẽla kovipala viosi.”Isaya 25:8.

  • Vana va fa va ka pinduiwa.

    “Vosi va kasi vayambo va yeva ondaka yaye, yu va tundamo.”Yoano 5:28, 29.

    “Kuli epinduko.”Ovilinga 24:15.

  • Vosi va ka kuata olonjo kuenda upange.

    “Va tunga olonjo kuenje va kalamo; va kũla oviumbo viayuva kuenje va lia epako liavio. Ka va tungi okuti umue wiñi o kalamo. Ka va kũli okuti umue wiñi o liako. . . . va lialia ño-o kupange wovaka avo.”Isaya 65:21, 22.

  •  Uyaki ka u ka kalako vali.

    “Imola ovita toke kesukiyo liongongo.”Osamo 46:9.

    “Olofeka ka vi likatukila vali losipata, ndaño ovita ka va vi lilongisa vali.”Isaya 2:4.

  • Ka ku ka kala vali ekambo liokulia.

    “Osi [yi ka] ima ovaima ayo. Suku, eye Suku yetu, [o ka] tu sumũlũisa.”Osamo 67:6.

    “Vofeka mu ka kala olomema via lua. Vi hunga hunga kilu liolomunda.”Osamo 72:16.

  • Uhukũi ka u ka kalako vali.

    “Elavoko liolohukũi ka li puapua.”Osamo 9:18.

    “O popela osuke eci yi vilikiya, ndaño ohukui lu ka kuete oñuatisi. O kuatela ohenda ohukui losuke. O popela ovimuenyo violosuke.”Osamo 72:12, 13.

Poku kũlĩhĩsa olohuminyo evi viatiamẽla Kusoma wa Suku, o tẽla oku limbuka esunga lieci Usoma wa Suku wa kuatela esilivilo ku Yesu? Eci a kala palo posi wa solele calua oku vangula catiamẽla Kusoma wa Suku komanu vosi va yongola oku u yevelela, momo wa kũlĩhĩle okuti Usoma u ka mãlako ovitangi viosi tu kasi oku liyaka lavio koloneke vilo.

Ove hẽ wa sanjukila olohuminyo Viembimbiliya viatiamẽla Kusoma? Nda oco, momo lie ku lilongisila ovina vikuavo viatiamẽla Kusoma? Nye o sukila oku linga oco o kolele okuti o ka tambula asumũlũho aco? Ocipama ci kuãimo ci ka tambulula apulilo ava.

^ tini. 5 Ocipama cilo ci lombolola ovisimĩlo Yesu a kuete cilo momo eye o kasi kilu kuenda tunde eci a tiukila kilu onjongole yaye yatiamẽla Kusoma ya livokiya.Luka 24:51.

^ tini. 8 Oco o sange alomboluilo akuavo a lekisa esunga lieci Suku a ecelela okuti omanu va tala ohali toke cilo, tanga ocipama 11 celivulu Embimbiliya li Longisa Nye, lia sandekiwa Lolombangi Via Yehova. Li sangiwavo vo www.jw.org.