Skip to content

Skip to table of contents

Olombangi Via Yehova

Select language Umbundu

Ovihandeleko Suku a Ecele ku va Isareli Viwa Kuenda Via Sunguluka?

Ovihandeleko Suku a Ecele ku va Isareli Viwa Kuenda Via Sunguluka?

OTEMBO yimue konyima, olombonge vimue kofeka yo kutundilo, via tava kuvangi wesanda watiamẽla kalume vamue vavali va lundiliwa okuti olomondi kuenje va pisiwa locihandeleko coku pondiwa. Omo okuti uvangi waco weya oku limbukiwa okuti wesanda, olonganji via likolisilako oku teyuila umue pokati kalume vaco kuenje wopiwa vokayike. Pole ukuavo ka va tẽlele oku u teyuila—momo otembo yaco wa pondiwa ale.

Omo okuti olonjanja vimue esunga lia siata oku pengisiwa kolombonge, Embimbiliya li lungula hati: “Esunga—[olio] lika, o kuama.” (Esinumuĩlo 16:20) Nda olonganji via kuama ocihandeleko eci, omanu va kuatisiwa. Ocihandeleko Suku a ecele ku va Isareli kosimbu ca kunamẽlele kesunga loku yuvula ocame. Tu konomuisi Ocihandeleko caco ca Suku oco tu limbuke ndomo, “olonjila viaye viosi viesunguluko.”Esinumuĩlo 32:4.

OLONGANJI “VIA LOÑOLOHA HAIVO VAKUALONDUNGE KUENDA VAKUOKŨLĨHISO”

Olonjongole viomanu vi tẽlisiwa ciwa nda olonganji via loñoloha, vakuesunga, haivo ka va kuete ocame. Ocihandeleko Suku a ecele ku va Isareli, ca lekisile okuti olonganji vi sukila oku kuata ovituwa evi. Kefetikilo liungende wavo vekalasoko, Mose vo sapuila oco a nõle “alume vamue va sunguluka, haivo va sumbila Suku, alume vocili, haivo va suvuka ovitukiko,” oco va kale olonganji. (Etundilo 18:21, 22) Noke yakũi akuãla kanyamo, eye wa tukula vali esilivilo liomanu ‘va loñoloha haivo, vakualondunge kuenda vakuokũlĩhiso,’ oco va tetuluile omanu.Esinumuĩlo 1:13-17.

Noke liovita vianyamo, Soma Yehosafata * wo ko Yuda wa handeleka olonganji hati: “Sokololi eci vu linga, momo hamunuko vu tetuluila, te Yehova una o kasi kumue lene poku tetulula. Oco, kuati usumba wa Yehova. Lunguki leci vu linga, momo ku Yehova Suku yetu ka kuli oku pengisa esunga, ndaño ocame comanu pamue oku tambula ovitukiko.” (2 Asapulo 19:6, 7) Soma wa ivaluisa olonganji okuti, nda poku tetulula ocitangi cimue va vetiyiwa locame, ale locipululu coku tambula ovitukiko, Suku o ka va kapa eko liovitangi viaco.

Eci olonganji vio ko Isareli via enda oku kuama olonumbi viaco, omanu va enda oku teyuiwa ciwa kuenda oku liyeva okuti va kolapo. Pole ocihandeleko ca Suku ca lekisilevo olonumbi vi kuatisa olonganji oku linga esombiso lia sunguluka ndaño muẽle poku potolola ocitangi cimue ca tatama. Vipi vimue pokati kolonumbi viaco?

OLONUMBI VI KUATISA OKU POTOLOLA OVITANGI LONJILA YA SUNGULUKA

Ndaño okuti olonganji vina via nõliwile via kala alume vakualondunge haivo vakuokũlĩhĩso, pole, ka va tambuile elianjo lioku kolela kolondunge viavo poku tetulula ovitangi. Yehova Suku wa va ĩhile olonumbi vi va kuatisa oku nõla olonjila via sunguluka. Tu konomuisi vimue pokati kolonumbi viaco via eciwile kolonganji via va Isareli.

Oku kũlĩhĩsa lutate. Lekuatiso lia Mose, Suku wa handeleka olonganji via va Isareli hati: “Yevi  olondaka vi kala pokati ka vakuẽle, tetuluili lesunga omunu lokuavo.” (Esinumuĩlo 1:16) Olonganji vi pondola lika oku nõla onjila yimue ya sunguluka nda via kũlĩhisa lutate ovina viosi via kongela vocitangi caco. Omo liaco, Suku wa sapuila olonganji hati poku tetulula ocitangi cimue tete: “Vu pula ciwa, loku kulĩhĩsa, loku sinda.” Olonganji osimbu ka via sokiyile oku tetulula ocitangi cimue, via sukilile oku kũlĩhisa lutate nda ondaka yaco “yocili muẽle.”Esinumuĩlo 13:14; 17:4.

Oku yevelela olombangi viaco. Ondaka yolombangi ya kuatele esilivilo poku kũlĩhisa ocitangi cimue. Ocihandeleko ca Suku ca popele ndoco: “Ka ci tava oku u pisa londaka yombangi yimosi lika. Te londaka yolombangi vivali pamue vitatu oco ci tava oku pisa omunu.” (Esinumuĩlo 19:15) Catiamẽla kolombangi viaco, Ocihandeleko ca Suku ca lekisile ndoco: “Ka ci tava oku pitisa olombonde viesanda. Ka ci tava oku likuta londingaivi hu lingi ombangi yuhembi.”Etundilo 23:1.

Oku kala ukuacili koku eca uvangi. Episo lia enda oku eciwa kombangi yuhembi, lia kala ndelungulo komanu vosi. Ocihandeleko ca lekisile okuti: “Olonganji vi pula lutate, kuenje nda ombangi yaco ombangi yuhembi, oco o linga laye ndeci eye a sokele oku linga lukuavo. Oco o yelisa evĩho pokati kene.” (Esinumuĩlo 19:18, 19) Omo liaco, nda omunu umue wa kemba kombonge oco a tambule ocipiñalo cukuavo, o feta ondando ya lisoka leci a yonguile oku tambula kukuavo. Nda wa kemba locimaho coku tuala ukuavo kolofa, o pondiwa. Onumbi eyi ya vetiyile vosi oku vangula ocili.

Oku tetulula loku yuvula ocame. Noke yoku kũlĩhisa ovina viosi via kongela vocitangi cimue, olonganji via kuatele elianjo lioku nõlapo onjila yimue. Vapuluvi aco onepa yimue yonumbi ya Suku ya kuatele esilivilo. Oyo ya popele hati: “Ko ka sumbili ocipala cosuke, ku ka kemainye ocipala cekope, puãi tetuluila ukuele lesunga.” (Ovis. 19:15) Olonganji poku tetulula ocitangi cimue nda via  limbuka okuti cocili, via sukilile oku yuvula oku vanja kocipala ale kekalo liomunu.

Olonumbi evi viosimbu via lekisiwa vocihandeleko Suku a ecele ku va Isareli, toke cilo vi kuete esilivilo. Momo nda via kapiwako, vi kuatisa olonganji vi pondola oku yuvula oku tetulula lãvi ovitangi loku pengisa esunga.

Oku kuama olonumbi vi sangiwa Vocihandeleko ca Suku ci kuatisa oku yuvula oku lueya esunga

OMANU VA KUATISIWA LESUNGA LIOCILI

Mose wa pula va Isareli hati: “Ofeka yipi yinene yi kuete ovisila loviholo viesunga ndovihandeleko evi viosi nda eca kokuene etaili?” (Esinumuĩlo 4:8) Ocili okuti, ka kua kaile ofeka yikuavo ya kuatisiwile lonjila ndeyi. Vokuenda kuviali wa Soma Salomone, una okuti eci a kala umalẽhe wa kuama ovihandeleko via Yehova, omanu “va tunga howa,” kuenda va kala lombembua loku kolapo, “va lialia, va nyuanyua, kuenda va yolela.”1 Olosoma 4:20, 25.

Pole, noke yotembo yimue va Isareli va siapo oku vumba Suku yavo. Vonduko yuprofeto Yeremiya, Suku wa va sapuila hati: “[Tala!] Ondaka ya Yehova va yi yanduluka, oco hẽ, olondunge vie vi kasi vokati kavo?” (Yeremiya 8:9) Omo liesino liavo, o Yerusalãi yeya oku linga “imbo liosonde,” lieyuka “ovombondo alio osi.” Noke ya nyõliwa kuenda ya siala elunda vokuenda kueci ci soka akũi epanduvali kanyamo.Esekiele 22:2; Yeremiya 25:11.

Uprofeto Isaya wa kala komuenyo vokuenda kuotembo yohali ya va Isareli. Poku ivaluka konyima, wa vetiyiwa oku soneha ocili catiamẽla ku Yehova Suku kuenda Kocihandeleko caye hati: “Eci olonetululo viove vi kasi kilu lieve, oco olonungi viovoluali vi lilongisa esunga.”Isaya 26:9.

Uprofeto Isaya wa kuatavo esanju lioku vetiyiwa la Suku poku soneha ocitumasuku catiamẽla kuviali wa Soma Mesiya, Yesu Kristu. Eye wa popia hati: “Esanju liaye li kala koku sumbila Yehova; Ka tetulula ndeci ci lete ovaso aye, pamue oku teta onimbu ndeci ci yeva ovatũi aye. Puãi o tetuluila olosuke lesunga, kuenje o tetela omanu vaño voluali olonimbu via sunguluka.” (Isaya 11:3, 4) Ocili okuti, omanu vana va ka linga olonungi Viuviali wa Mesiya vemehi Liusoma wa Suku, va kuete elavoko li komohisa!Mateo 6:10.

^ tini. 6 Onduko Yehosafata, yi lomboloka okuti “Yehova eye Onganji.”