Skip to content

Skip to table of contents

Olombangi Via Yehova

Select language Umbundu

 OSAPI YO KOÑOÑO | ANGA HẼ SUKU WA KU KAPAKO?

Suku Oku Lava

Suku Oku Lava

“Ovaso a Suku a lete ovilinga viomanu. Eye o kũlĩha okuenda kuaye kuosi.”YOVI 34:21.

Omõla utito o sukila oku lavuluiwa lolonjali viaye

ESUNGA LIECI OMANU VAMUE VA KUETELE ATATAHÃI: Ndomo ca lekisiwa va konomuiso a sulako, vocengele cetu colombungululu, mu sua eci ci soka 100 kolohuluwa violongongo. Omanu valua eci va vanja unene woluali, va lipula ndoco: ‘Momo lie Suku ukuonenewosi a lavuluila ovilinga viomanu vaño va kasi voluali?’

CECI ONDAKA YA SUKU YI LONGISA: Suku ka tu ihĩle lika Embimbiliya okuti noke o tu ivala. Pole o tu sapuila okuti: “Hu longisa, hu imbaimba onumbi yonjila wenda. Hu lungula, hu imba ovaso.”Osamo 32:8.

Kũlĩhĩsa ulandu wa Hagare ukãi umue wo Kegito wo kocita 20 O.Y. Omo okuti ka lekisile esumbilo ku cime caye Sarai, eye wo tundisa, kuenje wa tilila vekalasoko. Anga hẽ omo Hagare a lueya, Suku ko kapeleko vali? Embimbiliya li tambulula ndoco: “Omunga ya Yehova yo sanga.” Ungelo wo sapuila hati: “Yehova wa yeva ohali yove.” Noke Hagare wa sapuila Yehova hati: “Ove wu Suku o vanja vanja.”Efetikilo 16:4-13.

“Suku ukuakuvanja,” o pondolavo oku ku lava. Kũlĩhĩsa ocindekaise eci: Onjali yukãi ukuacisola o lavulula loku lava omãla vaye vatito. Omo okuti handi vatito va sukila oku tatiwa ciwa lolonjali viavo. Cimuamue haico, catiamẽla ku Suku. Eye o tu lava capiãla enene nda tua liketisa kuenda tu kasi oku liyaka lovitangi. Yehova wa popia hati: “Nda tunga vocitumãlo ca lepa haico ci kola. Nungavo kumue lomunu wa lipua, haeye wonjuka, okuti numbulula utima wu we lipua, kuenda utima wu wonjuka.”Isaya 57:15.

Ove pamue o lipula ndoco: ‘Suku o ndi lavulula ndati?’ Anga hẽ o lete lika ekalo lietimba liange ale o lete eci ci kasi vutima wange kuenda o sanda oku kuata elomboloko liovituwa viange?’