Skip to content

Skip to table of contents

Olombangi Via Yehova

Select language Umbundu

Wa ci Kũlĩha?

Wa ci Kũlĩha?

Omuenyo wa Pika ko Roma wa kala Ndati?

Omota yupika wo ko Roma

Kotembo yuviali wo Roma, omanu valua va linga apika omo lioku kuatiwa lasualali kuyaki. Omanu vaco va kuatiwa, va enda oku landisiwa kuenje ka va tiukila vali kolonjo viavo ale kapata avo.

Apika valua, va talavaya kovopange ohele oku fẽla ovokuasi o posi, vakuavo va talavaya kovapia loku linga ovopange akuavo o kolonjo. Apika va enda oku kisikiwa oku wala omota yutale yi kuete ocisonehua ale ondimbukiso yohuminyo yoku feta, nda noke yoku tila wa kuatiwa kuenje wa tualiwa ku cime caye. Apika vana va enda oku seteka oku tila olonjanja vialua okuti va kuatiwa, va kapiwile ondimbukiso yimue pupolo, loku sonehamo hati, F yi lomboloka ukuakutila.

Vembimbiliya kelivulu lia Filemone, ku lombolola ndomo upostolo Paulu a tuma Onesimo upika umue wa tilile oco a tiukile ku cime caye Filemone. Ndaño okuti Filemone wa kuatele omoko yoku yambula Onesimo, Paulu wo sapuila oco o “tambule,” locisola kuenda lukamba va likuetele.Filemone 10, 11, 15-18.

Momo lie olupale luo Foinike lua kemalẽle omo liavala a vumbula?

Olupale luo Foinike okuti koloneke vilo lu tukuiwa hati Olevanone, lua kemalẽle omo liotinda yi vumbula, ya pangiwila vofeka yo Turo. Soma Salomone ko Isareli wa posuisa onembele yaye “lolonanga vi vumbula” via pangiwa lomesele yofeka yo Turo.2 Asapulo 2:13, 14

Evala li vumbula lio ko Turo lia kuatele esilivilo lia velelepo kotembo yaco, momo ovina vialua via enda oku pangiwa, via sukilile avala aco. Catete, anyanga olõsi * va enda oku pipa ovina vialua vokalunga. Ci soka 12.000 kolombisi va vi pongiya oco va pange lavio otinda yoku pindala onanga yimosi. Noke, va enda oku tonyola ahotio oco ci va kuatise okupa otinda kahotio vaco. Noke lioku tenga ovina viaco, va kapako omongua, kuenje, va vi nyaleha vutanya oloneke vitatu. Kuenje, va kapa ovina viaco vetamboli lia sitikiwa, kuenda va vi felula lovava o vokalunga vokuenda kuoloneke vimue.

Omanu vo kofeka yo Foinike omo liuloño wavo kuenda oku kakatela kolomĩlu viavo, toke cilo va kasi oku amamako oku panga otinda yaco. Ovina viosimbu va enda oku panga lotinda yaco, vi sangiwa konele yo Kalunga ko Mediterrâneo, kuenda Kutakelo wo Cádiz, kofeka yo Espanya.

^ tini. 8 Ocikolowa cehotio ci kuete oku upisa 5 toke 8 kolosentimentulu.